ໂດຍປະຕິບັດຕາມຂໍ້ຕົກລົງຂອງລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ ສະບັບເລກທີ 903/ປທສ, ລົງວັນທີ 30 ມີນາ 2020 ວ່າດ້ວຍການຂຶ້ນທະບຽນເລກໝາຍໂທລະສັບ ໃນລະຫວ່າງວັນທີ 2-8 ກໍລະກົດ 2020 ທີ່ຜ່ານມາ, ພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງບໍລິຄຳໄຊ ສົມທົບກັບສາຂາບໍລິສັດທີ່ໃຫ້ບໍລິການດ້ານໂທລະຄົມມະນາຄົມ ແລະ ອິນເຕີເນັດ ເຊັ່ນ: ບໍລິສັດ ສະຕາ ໂທລະຄົມ ຈຳກັດ, ບໍລິສັດ ລາວໂທລະຄົມ ມະຫາຊົນ ແລະ ບໍລິສັດ ອີທີແອລ ຈຳກັດ ໄດ້ລົງເຄື່ອນໄຫວຂຶ້ນທະບຽນເລກໝາຍໂທລະສັບ ແລະ ຊິມເນັດ ຜ່ານແອັບ 3 ແກັບ ຢູ່ 3 ເມືອງທົ່ງພຽງຄື: ເມືອງປາກຊັນ, ເມືອງທ່າພະບາດ ແລະ ເມືອງປາກກະດິງ ໂດຍການເປັນປະທານຂອງ ທ່ານ ລັງສີ ແກ້ວວິເສດ ຫົວໜ້າພະແນກ ປທສ ແຂວງ, ມີບັນດາຄະນະອຳນວຍການ ແລະ ພະນັກງານວິຊາການຂອງ 3 ບໍລະສັດໂທລະຄົມ ເຂົ້າຮ່ວມ.
ໃນການລົງເຄື່ອນໄຫວຢູ່ແຕ່ລະເມືອງນັ້ນ, ທ່ານຫົວໜ້າພະແນກ ປທສ ແຂວງ ກໍ່ໄດ້ຍົກໃຫ້ເຫັນຄວາມໝາຍຄວາມສຳຄັນຂອງການຂຶ້ນທະບຽນເລກໝາຍໂທລະສັບ ແລະ ຊິມເນັດ ເປັນຕົ້ນແມ່ນຍົກໃຫ້ເຫັນລະບຽບການຄຸ້ມຄອງ, ການນຳໃຊ້ເລກໝາຍໂທລະສັບໃນໄລຍະໃໝ່ ໃຫ້ຮັບປະກັນຂໍ້ມູນຖືກຕ້ອງ ຄົບຖ້ວນ ຊັດເຈນ, ທັນກັບສະພາບການ, ຮັບປະກັນວຽກງານປ້ອງກັນຊາດ-ປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພຂອງສັງຄົມ ແລະ ຮອງຮັບການນຳໃຊ້ເຕັກໂນໂລຊີໃໝ່; ຜ່ານການລົງເຄື່ອນໄຫວຢູ່ 3 ຈຸດດັ່ງກ່າວ ເຫັນວ່າໄດ້ຮັບຄວາມເອົາໃຈໃສ່ຈາກການນຳຂອງເມືອງ ໃນການໂຄສະນາ, ເຜີຍແຜ່, ຊຸກຍູ້ ແລະ ອຳນວຍຄວາມສະດວກໃຫ້ແກ່ທີມງານຂອງແຂວງ ໂດຍມີພະນັກງານ, ທະຫານ, ຕຳຫຼວດເຂົ້າຮ່ວມຂຶ້ນທະບຽນເລກໝາຍໂທລະສັບ ແລະ ຊິມເນັດທັງໝົດ 1.199 ເລກໝາຍ ແລະ ຈະສືບຕໍ່ລົງເຄື່ອນໄຫວຢູ່ບັນດາພະແນກການ, ກົມກອງ ອ້ອມຂ້າງແຂວງ, ເມືອງ ແລະ ບ້ານໃນຂອບເຂດທົ່ວແຂວງ ຈົນຮອດວັນທີ 31 ທັນວາ 2020 ໃຫ້ສຳເລັດ 100%, ໂດຍໄດ້ແບ່ງອອກເປັນ 3 ໄລຍະຄື: ນັບແຕ່ວັນທີ 1 ກໍລະກົດ 2020 ຫາວັນທີ 30 ພະຈິກ 2020 ແມ່ນລົງທະບຽນເລກໝາຍໂທລະສັບ ແລະ ຊິມເນັດ ທີ່ໄດ້ນຳໃຊ້ໃນປະຈຸບັນຄືນໃໝ່ທັງໝົດ ແລະ ບໍ່ອະນຸຍາດໃຫ້ເລກໝາຍໃໝ່ທີ່ຍັງບໍ່ທັນໄດ້ຂຶ້ນທະບຽນສາມາດນຳໃຊ້ໄດ້ຢ່າງເດັດຂາດ ນັບແຕ່ວັນທີ 1-31 ທັນວາ 2020 ເລກໝາຍໂທລະສັບ ແລະ ຊິມເນັດ ທີ່ຍັງບໍ່ທັນໄດ້ຂຶ້ນທະບຽນຢ່າງຖືກຕ້ອງ ລະບົບຈະລະງັບບໍ່ສາມາດໂທອອກ ແລະ ຫຼິ້ນເນັດ, ແຕ່ຍັງສາມາດຮັບໂທລະສັບ ແລະ ຮັກສາມູນຄ່າທີ່ຍັງເຫຼືອໄວ້ໃນລະບົບ; ຖ້າກາຍວັນທີ 31 ທັນວາ 2020 ເປັນຕົ້ນໄປ ເລກໝາຍໂທລະສັບ ແລະ ຊິມເນັດທີ່ຍັງບໍ່ທັນຂຶ້ນທະບຽນສຳເລັດ ຈະຖືກລົບອອກຈາກລະບົບຢ່າງຖາວອນ ຈົນກ່ວາເລກໝາຍດັ່ງກ່າວ ຈະໄດ້ຮັບການຂຶ້ນທະບຽນຢ່າງຖືກຕ້ອງ ຈິ່ງສາມາດນຳໃຊ້ໄດ້.
Users Today : 1082
Users Yesterday : 494
This Month : 8923
This Year : 128960
Total Users : 515184
Who's Online : 92