ເຈົ້າແຂວງບໍລິຄໍາໄຊ ເຄື່ອນໄຫວວຽກງານຢູ່ເມືອງ ຄໍາເກີດ

ໃນຕອນແລງຂອງວັນທີ 07 ກຸມພາ 2020 ທ່ານ ກອງແກ້ວ ໄຊສົງຄາມ ເຈົ້າແຂວງ ບໍລິຄຳໄຊ ພ້ອມດ້ວຍຄະນະໄດ້ລົງຊຸກຍູ້ການປູກໜາກ ກຽ້ງຂອງຄອບຄົວທ່ານ ບູນເສີຍ ບຸນວົງສາ ຢູ່ບ້ານໜອງ ເມືອງ ຄຳເກີດ ແຂວງ ບໍລິຄຳໄຊ ໂດຍການນຳພາທາງຂອງທ່ານ ເພັດສະໄໝ ໄຊຍະທິຈັກ ເຈົ້າເມືອງ ຄຳເກີດ ແລະ ຂະແໜງການທີ່ກ່ຽວຂ້ອງຮ່ວມພາທາງ.

ສວນໝາກກ້ຽງຂອງຄອບຄົວທ່ານ ບຸນເສີຍ ບຸນວົງສາ ມີເນື້ອທີ່ 1 ເຮັກຕ່າ,ມີ 480 ກວ່າຕົ້ນ,ເລີ່ມປູກມາແຕ່ກາງປີ 2017 ມີແຮງງານຕົ້ນຕໍ 2 ຄົນ, ໄດ້ຮັບການຕິດຕາມ ແລະ ທາງດ້ານເຕັກນິກວິຊາການທາງດ້ານແນວພັນ ຈາກຫ້ອງການກະສິກຳ ແລະ ປ່າໄມ້ເມືອງ ເລີ່ມຈາກການກ້າເບ້ຍ, ການຕໍ່ກິ່ງຕະຫຼອດຮອດການບົວລະບັດຮັກສາ.

ປີຜ່ານມາ ໄດ້ເກັບຜົນຜະລິດອອກສູ່ທ້ອງຕະຫຼາດພາຍໃນເມືອງ ແລະ ຕ່າງເມືອງຈຳນວນໜື່ງ ໂດຍມີແມ່ຄ້າມາຮັບຊື້ຢູ່ສວນ ຂາຍໄດ້ປະມານ 30 ລ້ານກວ່າກີບ ແລະ ປີນີ້ຄາດວ່າຈະເກັບຜົນຜະລິດບໍ່ຫຼຸດ 50 ລ້ານກີບ.

ທ່ານ ສົມພົນແພງ ລາດສະສົມບັດ ຫົວໜ້າຫ້ອງການກະສິກຳ ແລະ ປ່າໄມ້ເມືອງຄຳເກີດ ຍັງໃຫ້ຮູ້ອີກວ່າ ການຜະລິດເຂົ້ານາແຊງທົ່ວເມືອງຄຳເກີດ ແຜນເບື້ອງຕົ້ນ 50 ເຮັກຕ່າ ປະຕິບັດໄດ້ 207 ເຮັກຕ່າ, ຍ້ອນສະພາບອາກາດໜາວ ແລະ ມີກະແສລົມແຮງເຮັດໃຫ້ນາແຊງເກີດເສຍຫາຍ 93 ເຮັກຕ່າ, ນອກຈາກການຜະລິດເຂົ້ານາແຊງແລ້ວ ຍັງໄດ້ຊຸກຍູ້ປະຊາຊົນປູກພືດ ແລະ ສັດ ເພື່ອຕອບສະໜອງຕະຫຼາດໃຫ້ພຽງພໍ, ປະຈຸບັນພືດພັກພາຍໃນເມືອງ ແມ່ນຕອບສະໜອງພຽງພໍ ແລະ ຍັງໄດ້ສົ່ງອອກຂາຍຕ່າງແຂວງຈຳນວນໜື່ງ.

ທ່ານ ເຈົ້າແຂວງ ຍັງໄດ້ເນັ້ນໃຫ້ການນຳຂັ້ນເມືອງ, ຂະແໜງການທີ່ກ່ຽວຂ້ອງຈົ່ງໄດ້ລົງຕິດຕາມ, ຊຸກຍູ້ການຜະລິດຂອງປະຊາຊົນເປັນປະຈຳ, ຜະລິດຕາມຄວາມຕ້ອງການຂອງຕະຫຼາດແຕ່ລະໄລຍະ.

ໃນເວລາຕໍ່ມາຂອງວັນດຽວກັນ ທ່ານ ເຈົ້າແຂວງ ບໍລິຄຳໄຊ ຍັງໄດ້ລົງກວດກາການກໍ່ສ້າງຂົວຂ້າມນໍ້າທົບ ຈຸດເຊື່ອມຕໍ່ລະຫວ່າງບ້ານທົ່ງແຄະ ແລະ ບ້ານ ນາກະດົກ, ຂົວແຫ່ງດັ່ງກ່າວນີ້ ເລີ່ມລົງມືກໍ່ສ້າງມາແຕ່ກາງເດືອນ 12 ປີ 2020 ໂດຍແມ່ນພະແນກ ພະລັງງານ ແລະ ບໍ່ແຮ່ ເປັນເຈົ້າຂອງໂຄງການ, ຮັບເໜົາການກໍ່ສ້າງໂດຍ ບໍລິສັດພັດທະນາຊົນນະບົດ, ເສົາຂົວສ້າງດ້ວຍຄອນກີດເສີມເຫຼັກ, ປູດ້ວຍໄມ້ເນື້ອແຂງ, ມີຄວາມຍາວ 72 ແມັດ, ກວ້າງ 3,5 ແມັດ, ມູນຄ່າການກໍ່ສ້າງ 1.226.222,323 ກີບ, ມາຮອດປະຈຸບັນການກໍ່ສ້າງສຳເລັດແລ້ວ 22,35 % ຂອງໜ້າວຽກທັງໝົດ, ຄາດວ່າທ້າຍເດືອນ ພຶດສະພາ ປີ 2021 ນີ້ຈະໃຫ້ສຳເລັດຕາມສັນຍາ.

ຈາກນັ້ນ ຍັງໄດ້ລົງພົບປະໂອ້ລົມ ໃຫ້ກຳລັງໃຈ ຂະບວນຄູຝຶກຫັດ ທີ່ມາຈາກວິທະຍາໄລຄູບ້ານເກີນ ແຂວງວຽງຈັນ ທີ່ມາລົງສິດສອນຢູ່ ມັດທະຍົມຕອນຕົ້ນ ທົ່ງແຄະ ເມືອງຄຳເກີດ ພ້ອມມອບເງິນຈຳນວນໜື່ງ ເພື່ອເປັນການຊຸກຍູ້ ໃຫ້ກໍາລັງໃຈຂະບວນຄູຝຶກຫັດຄັ້ງນີ້.

  

• Facebook
• Twitter
• Line