ກອງປະຊຸມ ຄົບຄະນະບໍລິຫານງານສະຫະພັນນັກຮົບເກົ່າ ເມືອງປາກກະດິງ ຄັ້ງທີ 1 ສະໄຫມທີ 4

ກອງປະຊຸມຄົບຄະນະບໍລິຫານງານສະຫະພັນນັກຮົບເກົ່າ ເມືອງປາກກະດິງ ແຂວງບໍລິຄຳໄຊ ຄັ້ງທີ I ສະໄໝທີ IV ໄດ້ຈັດຂຶ້ນໃນຕອນເຊົ້າຂອງວັນທີ 24 ທັນວາ 2020 ທີ່ສະໂມສອນຫ້ອງວ່າການເມືອງ ໂດຍພາຍໃຕ້ການເປັນປະທານຂອງທ່ານ ຮອ ຂັນຕີ ພັນທະວົງ ຄະນະບໍລິຫານງານສະຫະພັນນັກຮົບເກົ່າ ແຂວງບໍລິຄຳໄຊ ປະທານສະຫະພັນນັກຮົບເກົ່າເມືອງປາກກະດິງ, ໃຫ້ກຽດເຂົ້າຮ່ວມຂອງທ່ານ ພົງສະຫວັດ ຄຳສຸກຖາວົງ ກຳມະການປະຈຳພັກເມືອງ ຮອງເຈົ້າເມືອງປາກກະດິງ, ທ່ານ ພັທ ທອງພຸດ ສຸວັນນະລາດ ຮອງປະທານສະຫະພັນນັກຮົບເກົ່າແຂວງບໍລິຄຳໄຊ ມີບັນດາຄະນະບໍລິຫານງານຕະຫຼອດຮອດຮາກຖານ ແລະ ຫົວໜ້າໜ່ວຍສະຫະພັນນັກຮົບເກົ່າພາຍໃນເມືອງ ເຂົ້າຮ່ວມ.

ກອງປະຊຸມ ໄດ້ຮັບຟັງການຜ່ານບົດສະຫຼຸບການເຄື່ອນໄຫວວຽກງານປະຈຳປີ 2020 ແລະ ທິດທາງແຜນການປີ 2021 ເຊິ່ງສະຫະພັນນັກຮົບເກົ່າເມືອງປາກກະດິງ ມີທັງໝົດ 815 ສະຫາຍ, ຍິງ 56 ສະຫາຍ, ມີ 46 ໜ່ວຍຮາກຖານ, ມີຄະນະບໍລິຫານງານ 7 ສະຫາຍ, ຍິງ 1 ສະຫາຍ.

ດ້ານວຽກງານການເມືອງແນວຄິດຖືສຳຄັນວຽກງານສຶກສາອົບຮົມການເມືອງ ແນວຄິດໂດຍຕິດພັນກັບການປະຕິບັດນະໂຍບາຍ ເຊິ່ງໄດ້ຈັດຕັ້ງປະຕິບັດຢ່າງຕໍ່ເນື່ອງຢູ່ໃນຖັນແຖວນັກຮົບເກົ່າ ພ້ອມທັງຈັດຕັ້ງສຶກສາອົບຮົມ ແກ້ໄຂບັນຫາທີ່ເກີດຂຶ້ນ ເຮັດໃຫ້ສະມາຊິກນັກຮົບເກົ່າມີຄວາມອຸ່ນອຽນທຸ່ນທ່ຽງ ບໍ່ຫົຼງເຊື່ອກົນອຸບາຍຂອງສັດຕູ ກຸ່ມຄົນບໍ່ຫວັງດີ ພ້ອມທັງເປັນແບບຢ່າງນຳໜ້າໃຫ້ພະນັກງານລຸ່ນສືບທອດ ແລະ ພັດທະນານັກຮົບເກົ່າໄດ້ດີ, ດ້ານວຽກງານຂະບວນການສ້າງຄອບຄົວຕົວແບບຮອບດ້ານໄດ້ 9 ຄອບຄົວ, ເດັ່ນບາງດ້ານ 252 ຄອບຄົວ, ເປັນຄອບຄົວພັດທະນາ ແລະ ຄອບຄົວວັດທະນະທຳ 735 ຄອບຄົວ, ພ້ອມກັນນັ້ນ ສະມາຊິກນັກຮົບເກົ່າ ຍັງໄດ້ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ , ອົງການຈັດຕັ້ງຂອງບ້ານເຊັ່ນ: ເປັນນາຍບ້ານ, ປກສ ບ້ານ, ກອງຫຼອນ, ແນວໂຮມ, ໜ່ວຍໄກ່ເກ່ຍບ້ານ ຈຳນວນ 194 ສະຫາຍ.

ກອງປະຊຸມ ຍັງໄດ້ຮັບຟັງຄຳໂອ້ລົມປະກອບຄຳເຫັນຈາກຄະນະປະທານຢ່າງກົງໄປກົງມາໂດຍສະເພາະກ່ອນອື່ນໝົດສະຫະພັນນັກຮົບເກົາຕ້ອງໄດ້ກຳແໜ້ນຮູ້ເຖິງທີ່ຕັ້ງ ແລະ ພາລະບົດບາດ,ສິດ ແລະ ໜ້າທີ່ຂອງສະຫະພັນນັກຮົບເກົ່າຂັ້ນຂອງຕົນພ້ອມກັນນັ້ນຕ້ອງໄດ້ເຮັດວຽກງານການເມືອງແນວຄິດໄປຄວບຄູ່ກັນ ເພື່ອສ້າງໃຫ້ມີຄວາມສາມັກຄີແໜ້ນແຟ້ນພາຍໃນ ແລະ ພາຍນອກຕັ້ງໜ້າຊ່ວຍເຫຼືອ ແລະ ກໍ່ສ້າງເຊິ່ງກັນ ແລະ ກັນ, ຫຼີກລ່ຽງປະກົດການຫຍໍ້ທໍ້ໃນຖັນແຖວນັກຮົບເກົ່າ ພ້ອມກັນເປັນແບບຢ່າງທີ່ດີແກ່ຊາວໜຸ່ມໃນການດຳລົງຊີວິດແບບປອດໃສຂາວສະອາດ ຕິດພັນກັບການຮັກສາມູນເຊື້ອ 3 ດີ 6 ຮັກສາ ຂອງນັກຮົບເກົ່າວາງອອກ.

 

• Facebook
• Twitter
• Line