ພິທີເປີດຊຸດຝຶກອົບຮົມການສ້າງຄວາມສາມາດ ໃນການກວດສອບສານພິດຕົກຄ້າງໃນພືດຜັກ ໄດ້ຈັດຂຶ້ນໃນຕອນເຊົ້າຂອງວັນທີ 6 ຕຸລາ 2020 ຢູ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງ ໂດຍການເປັນປະທານຂອງທ່ານ ດາລາພອນ ພົນສະຫວັດດີ ຫົວໜ້າຂະແໜງປູກຝັງ, ມີຄະນະວິຊາການຈາກກົມປູກຝັງ ກະຊວງກະສິກໍາ ແລະ ປ່າໄມ້, ວິຊາການປູກຝັງ 5 ແຂວງ: ແຂວງບໍລິຄຳໄຊ, ຄໍາມ່ວນ ນະຄອນຫຼວງ, ໄຊຍະບູລີ ແລະ ແຂວງວຽງຈັນ ເຂົ້າຮ່ວມ.
ສປປ ລາວ ເປັນປະເທດໜຶ່ງ ທີ່ມີທ່າແຮງໃນການຜະລິດກະສິກຳສະອາດ ປອດໄພ ໝັ້ນຄົງ ແລະ ຢືນຍົງ ຊຶ່ງຂະແໜງການປູກຝັງ ໄດ້ກຳນົດຮູບແບບການຜະລິດກະສິກຳສະອາດ ເປັນບູລິມະສິດຕົ້ນຕໍ ຄື: ການຜະລິດກະສິກຳທີ່ດີ ແລະ ການຜະລິດກະສິກຳອິນຊີ ນອກນັ້ນ ຍັງມີທາງເລືອກຮູບແບບການຜະລິດອື່ນ ເຊັ່ນ: ການຜະລິດກະສິກຳທີ່ບໍ່ໃຊ້ຢາປາບສັດຕູພືດ ແລະ ການຜະລິດກະສິກຳແບບອະນຸລັກ ພ້ອມກັນນີ້ ຍັງໄດ້ສ້າງ ແລະ ປັບປຸງບັນດາຂໍ້ກຳນົດກົດລະບຽບ ແລະ ມາດຕະຖານຂອງແຕ່ລະຮູບແບບການຜະລິດໃຫ້ມີຄວາມເຂັ້ມແຂງ ແລະ ໃຫ້ທຽບເທົ່າກັບສາກົນ.
ໃນການຝຶກອົບຮົມໃນຄັ້ງນີ້ ຜູ້ເຂົ້າຮ່ວມຈະໄດ້ຮຽນຮູ້ທັງພາກທິດສະດີ ແລະ ປະຕິບັດຕົວຈິງ ກ່ຽວກັບເຕັກນິກການວິໄຈສານພິດຕົກຄ້າງໃນພືດຜັກ ແລະ ໝາກໄມ້ ເປັນຕົ້ນແມ່ນ ຄວາມຮູ້ທົ່ວໄປກ່ຽວກັບຢາປາບສັດຕູພືດ, ການຕິດຕາມ ແລະ ເຝົ້າລະວັງສານພິດຕົກຄ້າງ ໃນພືດຜັກ ແລະ ໝາກໄມ້, ແນວຄິດພື້ນຖານການວິເຄາະສານພິດຕົກຄ້າງໃນອາຫານ, ເຕັກນິກການສຸ່ມເກັບຕົວຢ່າງວິໄຈສານພິດຕົກຄ້າງ ດິນ, ນ້ຳ ແລະ ພືດ, ອຸປະກອນ ແລະ ສານເຄມີ ທີ່ນຳໃຊ້ເຂົ້າໃນການວິໄຈສານພິດຕົກຄ້າງ, ການກະກຽມ ແລະ ສະກັດຕົວຢ່າງ ພ້ອມທັງປະຕິບັດໂຕຈິງໃນການວິໄຈສານພິດຕົກຄ້າງ. ທັງນີ້ ກໍ່ເພື່ອເຮັດໃຫ້ຊຸດຝຶກອົບຮົມໃນຄັ້ງນີ້ໄດ້ຮັບທັງປະລິມານ ແລະ ຄຸນນະພາບ ພ້ອມນຳໄປໝູນໃຊ້ໃຫ້ເກີດປະໂຫຍດສູງສຸດ, ຊຸດຝຶກອົບຮົມໃນຄັ້ງນີ້ ຈະໄດ້ດຳເນີນໄປເປັນເວລາ 3 ວັນເຕັມຈຶ່ງສໍາເລັດ.
Users Today : 368
Users Yesterday : 485
This Month : 3961
This Year : 123998
Total Users : 510222
Who's Online : 9