ມ.ສ ສີທ່ານາໄຊ ຈັບມື ໂຮງຮຽນເຕັກນິກວິຊາຊີບ ຄວ້າຂັນຫົວໜ້າສຶກສາແຂວງໄປຄອງ

 

ນັດຊີງຊະນະເລີດເຕະບານຊີງຂັນທ່ານຫົວໜ້າສຶກສາທິການ ແລະ ກິລາແຂວງ ໄດ້ຈັດຂຶ້ນໃນວັນທີ 5 ຕຸລາ 2020 ຢູ່ເດີນເຕະບານໂຮງຮຽນສີທ່ານາໄຊ ເປັນການຊີງໄຊກັນລະຫວ່າງ ທີມເຕະບານຊາຍ ມ.ສ ສີທ່ານາໄຊ ພົບກັບ ມ.ສ ປາກງຽບ ໃນຂະບວນການຕ້ອນຮັບວັນຄູແຫ່ງຊາດ ຄົບຮອບ 26 ປີ.

ພໍແຕ່ເລີ່ມເກມ ມ.ສ ສີທ່ານາໄຊ ກໍ່ເປີດເກມບຸກໃສ່ ແບບ ມ.ສ ປາກງຽບ ບໍ່ທັນຕັ້ງເກມ ແລະ ກໍ່ເປັນຜົນໃນນາທີທີ່ 6 ສາມາດເຈາະປະຕູ ມ.ສ ປາກງຽບ ໄດ້ສຳເລັດ ເປັນປະຕູຂຶ້ນນຳໄປກ່ອນຈາກການຍິງຫຼັກໄກ່ຂອງກອງໜ້າສີທ່ານາໄຊ ຍິງບານຂ້າມຫົວຜູ້ຮັກສາປະຕູ ປາກງຽບ ເຂົ້າໄປຢ່າງສວຍງາມ ເປັນ 1 ປະຕູຕໍ່ 0, ອີກພຽງ 4 ນາທີຕໍ່ມາ ສີທ່ານາໄຊ ຍັງເປີດເກມບຸກຕໍ່ເນື່ອງ ແລະ ມາໄດ້ປະຕູຂຶ້ນນຳໄປອີກ ເປັນ 2 ປະຕູຕໍ່ 0, ຈາກນັ້ນ ມານາທີທີ 13 ມ.ສ ປາກງຽບ ມາເລີ່ມຕັ້ງເກມໄດ້ ກໍ່ເປີດເກັມບຸກເພື່ອຫວັງຍິງປະຕູຄືນໃຫ້ໄດ້ ແຕ່ກອງໜ້າຍິງສຽດເສົາອອກໄປຢ່າງຫວຸດຫວິດ ມານາທີທີ່ 20 ກອງໜ້າຂອງສີທ່ານາໄຊ ໄດ້ໂອກາດສວນກັບຫຼຸດດ່ຽວເຂົາໄປດວນກັບຜູ້ຮັກສາປະຕູແບບບໍ່ພາດ ເປັນ 3 ປະຕູຕໍ່ 0.

ເລີ່ມເກມເຄີ່ງຫຼັງ ປາກງຽບເປັນຝ່າຍບຸກຢ່າງດຽວ ແລະ ເກືອບໄດ້ປະຕູຕີໄຂ່ແຕກ ຈາກການຫຼຸດດ່ຽວເຂົ້າໄປຍິງ ແຕ່ກອງໜ້າຍິງພາດ ບານອອກຂ້າງໄປຢ່າງໜ້າເສຍດາຍ, ມານາທີ 50 ກອງໜ້າ ສີທ່ານາໄຊ ໄດ້ໂອກາດຫຼຸດດ່ຽວເຂົ້າໄປຍິງບໍ່ພາດ ເປັນປະຕູທີ 4, ຢ່າງໃດກໍ່ຕາມ ປາກງຽບ ຍັງບໍ່ຍອມຖອຍງ່າຍໆ ຍັງເປີດເກມບຸກຕໍ່ເນື່ອງ ແຕ່ກໍ່ບໍ່ສາມາດຜ່ານກອງຫຼັງຂອງສີທ່ານາໄຊໄປໄດ້ ຈົນມາໄດ້ປະຕູທຳອິດ ໃນນາທີທີ່ 53 ແລະ ປະຕູ 2 ຈາກການຍິງຈຸດໂທດ ໄລ່ຂຶ້ນມາເປັນ 2 ຕໍ່ 4, ທັງສອງທີມຍັງສືບຕໍ່ແລກເກມບຸກໃສ່ກັນຢ່າງຕໍ່ເນື່ອງດຸເດືອດ ແຕ່ກອງໜ້າຂອງສີທ່ານາໄຊ ຍິງບານໄດ້ຄົມກວ່າ ແລະ ຍິງເຂົ້າໄປໃນນາທີສຸດທ້າຍ ເປັນປະຕູທີ 5, ຈົບເກມ ມ.ສ ສີທ່ານນາໄຊ ຖະຫຼົ່ມ ມ.ສ ປາກງຽບ ໄປ 5 ປະຕູຕໍ່ 2 ຄວ້າແຊ້ມໄປຄອງ.

ນັດຊີງທີ 3 ເປັນການພົບກັນລະຫວ່າງທີມ ພະແນກສຶກສາທິການ ແລະ ກິລາແຂວງ ກັບ ໂຮງຮຽນເຕັກນິກວິຊາຊີບ ເກມຂອງຄູ່ນີ້ກໍ່ມີຄວາມດຸເດືອດບໍ່ແພ້ກັນກັບຄູ່ຊີງ ຕ່າງຝ່າຍຕ່າງປ່ຽນກັນບຸກ ເພື່ອຈະຍິງປະຕູຂອງອີກຝ່າຍໃຫ້ໄດ້ ຜ່ານການແຂ່ງຂັນຜົນປະກົດວ່າ ພະແນກສຶກສາທິການ ແລະ ກິລາແຂວງ ເຊືອດເອົາຊະນະ ໂຮງຮຽນເຕັກນິກວິຊາຊີບ ໄປໄດ້ດ້ວຍສະກໍ 1 ປະຕູຕໍ່ 0 ປະຕູ ຍາດໄດ້ອັນດັບທີ 3 ໄປຄອງ. ເຊິ່ງການແຂ່ງຂັນ ແມ່ນໄດ້ເລີ່ມມາແຕ່ວັນທີ 1-2 ຕຸລາ 2020 ເປັນຕົ້ນມາ ທັງ 2 ປະເພດກິລາມີທີມເຂົ້າຮ່ວມທັງໝົດ 6 ທີມ ຄື: ມ.ສ ສີທ່ານນາໄຊ, ມ.ສ ປາກງຽບ, ມ.ປາຍ ປາກຊັນ, ມ.ສ ໜອງບົວ, ໂຮງຮຽນເຕັກນິກວິຊາຊີບ ແລະ ພະແນກສຶກສາທິການ ແລະ ກິລາແຂວງ.

ສຳລັບການແຂ່ງຂັນບານສົ່ງຍິງ ຊະນະເລີດໄດ້ແກ່ ໂຮງຮຽນເຕັກນິກວິຊາຊີບ, ອັນດັບ 2 ໄດ້ແກ່ໂຮງຮຽນ ມ.ປາຍ ປາກຊັນ ແລະ ອັນດັບ 3 ໄດ້ແກ່ ມ.ສ ປາກງຽບ, ສ່ວນປະເພດລາງວັນ ຊະນະເລີດ ແມ່ນໄດ້ຮັບຂັນ 1 ໜ່ວຍ ພ້ອມເງິນສົດ 300.000 ກີບ, ອັນດັບ 2 ໄດ້ຮັບເງິນສົດ 200.000 ກີບ ແລະ ອັນດັບ 3 ໄດ້ຮັບເງິນສົດ 100.000 ກີບ ໃຫ້ກຽດມອບໃນຄັ້ງນີ້ໂດຍ ທ່ານ ຄຳສີ ຍົມມະລາດ ຫົວໜ້າພະແນກສຶກສາທິການ ແລະ ກິລາແຂວງບໍລິຄຳໄຊ.

• Facebook
• Twitter
• Line