ເມືອງປາກຊັນ ຜ່ານຮ່າງຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບຄະນະກຳມະການຄຸ້ມຄອງ ແລະ ແກ້ໄຂຂໍ້ຂັດແຍ່ງດິນບໍລິເວນນໍ້າຫ້ວຍປຶງ

ກອງປະຊຸມປຶກສາຫາລື ຮ່າງຂໍ້ຕົກລົງເຈົ້າເມືອງປາກຊັນ ວ່າດ້ວຍການແຕ່ງຕັ້ງຄະນະຮັບຜິດຊອບ ແລະ ແກ້ໄຂຂໍ້ຂັດແຍ່ງດິນບໍລິເວນນໍ້າຫ້ວຍປຶງ ເມືອງປາກຊັນ ແຂວງບໍລິຄຳໄຊ ໄດ້ຈັດຂື້ນໃນຕອນບ່າຍຂອງວັນທີ 20 ທັນວາ 2022 ຢູ່ຫ້ອງປະຊຸມໂຮງແຮມດອກຈໍາປາ ໂດຍການເປັນປະທານຂອງທ່ານ ສຸພາລັກ ໄຊຊະນະສີ ຮອງເຈົ້າເມືອງປາກຊັນ.

ໃນກອງປະຊຸມ ໄດ້ຜ່ານຮ່າງຂໍ້ຕົກລົງຂອງເຈົ້າເມືອງປາກຊັນ ວ່າດ້ວຍການແຕ່ງຕັ້ງຄະນະຮັບຜິດຊອບ ແລະ ແກ້ໄຂຂໍ້ຂັດແຍ່ງດິນບໍລິເວນນໍ້າຫ້ວຍປຶງ ເຊີ່ງຮ່າງຂໍ້ຕົກລົງສະບັບດັ່ງກ່າວ ແມ່ນອີງໃສ່ກົດໝາຍທີ່ກ່ຽວຂ້ອງຫຼາຍສະບັບ ເຊັ່ນ: ກົດໝາຍວ່າດ້ວຍອົງການປົກຄອງທ້ອງຖີ່ນ, ກົດໝາຍຊັບພະຍາກອນນໍ້າ ແລະ ກົດໝາຍອື່ນໆທີ່ກ່ຽວພັນ ລວມມີ 6 ມາດຕາ ແລະ ໄດ້ກຳນົດຈະແຈ້ງພາລະບົດບາດ, ສິດໜ້າທີ່ຄະນະກຳມະການແຕ່ລະຂັ້ນ.

ຜູ້ເຂົ້າຮ່ວມປະຊຸມ ໄດ້ປະກອບຄຳເຫັນໃສ່ຮ່າງຂໍ້ຕົກລົງຢ່າງກົງໄປກົງມາ ໃນແຕ່ລະມາດຕາ ຍົກບັນຫາມາປຶກສາຫາລື ແລະ ແລກປ່ຽນຄວາມຄິດເຫັນເຊີ່ງກັນ ແລະ ກັນ ດ້ວຍເຫດ ແລະ ຜົນ ເພື່ອເຮັດໃຫ້ຂໍ້ຕົກລົງ ມີຄວາມອຸດົມສົມບູນທາງດ້ານເນື້ອໃນ ແລະ ສອດຄ່ອງກັບສະພາບຄວາມເປັນຈິງຕາມຈຸດພິເສດຂອງທ້ອງຖິ່ນ ເຊິ່ງຕ່າງຝ່າຍໄດ້ຮັບຜົນປະໂຫຍດຮ່ວມກັນ ທັງພາກລັດ ແລະ ປະຊາຊົນທີ່ທຳການຜະລິດ, ກິດຈະກຳຕ່າງໆ ເຂດອ່າງຫ້ວຍປຶງ.

• Facebook
• Twitter
• Line