ລັກຊັບເປັນອາຈິນ ໄປບໍ່ລອດຖືກຈັບມາດໍາເນີນຄະດີ

ເຈົ້າໜ້າທີ່ວິຊາສະເພາະ ປກສ ເມືອງຄໍາເກີດ ແຂວງບໍລິຄໍາໄຊ ໃຫ້ຮູ້ວ່າ: ໃນວັນທີ 16 ທັນວາ 2022 ສາມາດກັກຕົວຜູ້ຖືກຫາທີ່ກະທໍາຜິດ ໃນຂໍ້ຫາລັກຊັບພົນລະເມືອງໄດ້ 1 ຄົນ ຄື: ທ້າວ ຈິດຕະກອນ ໂສລັດຕະນະວົງ ອາຍຸ 23 ປີ, ປະຊາຊົນ ບ້ານໂພນໄຊ ເມືອງຄໍາເກີດ ມາສືບສວນ-ສອບສວນ ເຊິ່ງຜູ້ຖືກຫາໄດ້ຮັບສາລະພາບຕໍ່ເຈົ້າໜ້າທີ່ວ່າ: ໃນໄລຍະຜ່ານມາຜູ້ກ່ຽວແມ່ນເຄື່ອນໄຫວລັກຊັບມາແລ້ວ ຈໍານວນ 4 ຄັ້ງ.

ຄັ້ງທີ 1 ແລະ ຄັ້ງທີ 2 ໃນໄລຍະກາງປີ 2022 ແມ່ນໄດ້ກໍ່ເຫດລັກຊັບຢູ່ຮ້ານຂາຍເຄື່ອງປະດັບ, ຮ້ານຊື້-ຂາຍ ເງິນ-ຄໍາ ພາຍໃນຕະຫຼາດແສນອຸດົມ ເມືອງຄໍາເກີດ ໂດຍໃຊ້ຄີມ ແລະ ໄຂຄວງ ເຈາະເພດານແລ້ວປີນຂື້ນຕາມໂຄງເຫຼັກ ແລ້ວລົງສູ່ຮ້ານ ໄດ້ເອົາສາຍຄໍຄໍາ ປະມານ 30 ກວ່າເສັ້ນ, ສາຍແຂນຄໍາ 8 ເສັ້ນ, ແຫວນສີເຫຼືອງ 15 ວົງ, ປອກຂາຄໍາ 1 ເສັ້ນ, ສາຍແຂນເງິນ ປະມານ 3 ເສັ້ນ ແລະ ເງິນສົດ 2.900.000 ກີບ, 2 ວັນຕໍ່ມາ ໄດ້ນໍາເອົາວັດຖຸທີ່ລັກໄປນັ້ນ ໄປຂາຍຢູ່ຮ້ານຂາຍຄໍາແຫ່ງໜຶ່ງໃນ ນະຄອນຫຼວງວຽງຈັນ ໄດ້ເງິນຈໍານວນ 28.000.000 ກີບ ແລະ ວັດຖຸຈໍານວນໜຶ່ງ ແມ່ນເປັນຂອງປອມຈຶ່ງບໍ່ໄດ້ຂາຍ ແລະ ເງິນຈໍານວນດັ່ງກ່າວແມ່ນໃຊ້ຈ່າຍຈົນໝົດ.

ຄັ້ງທີ 3 ໃນເວລາປະມານ 23 ໂມງ ຂອງວັນທີ 23 ພະຈິກ 2022 ໄດ້ກໍ່ເຫດລັກຊັບ ຢູ່ຮ້ານຊື້ຂາຍເງິນ-ຄໍາ ເພັນ ກີມເຮີຍ ບ້ານຫຼັກ 20 ເມືອງຄໍາເກີດ ດ້ວຍການປີນຂື້ນຕາມຄອມແອ ເຂົ້າຊ່ອງວ່າງເທິງເພດານແລ້ວໃຊ້ໄຂຄວງ ແລະ ສີ່ວ ເຈາະເພດານເປັນຮູພໍຫຼົມໂຕ ແລ້ວລອດລົງໄປໃນຮ້ານ ໄດ້ລັກເອົາສາຍແຂນຄໍາປະມານ 10 ເສັ້ນ, ຕ້າງຫູຄໍາປະມານ 10 ຄູ່, ແຜ່ນຄໍາປະມານ 5 ແຜ່ນນ້ອຍ, ເງິນຈໍານວນ 25.000.000 ກີບ, ແລ້ວ 3 ວັນຕໍ່ມາ ຜູ້ກ່ຽວໄດ້ນໍາເອົາຄໍາຈໍານວນດັ່ງກ່າວ ມາຈູດເພື່ອຫຼອມໃຫ້ເປັນກ້ອນດຽວຈົນສໍາເລັດ, 3 ວັນຕໍ່ມາຜູ້ກ່ຽວ ໄດ້ນໍາເອົາຄໍາຈໍານວນນັ້ນໄປຂາຍຢູ່ ນະຄອນຫຼວງວຽງຈັນ ໄດ້ເງິນສົດຈໍານວນ 26.000.000 ກີບ ແລ້ວນໍາໄປໄຊ້ຈ່າຍຈົນໝົດ.

ຄັ້ງທີ 4 ໃນເວລາປະມານ 22 ໂມງ ຂອງວັນທີ 10 ທັນວາ 2022 ຜູ້ກ່ຽວໄດ້ກໍ່ເຫດລັກຊັບ ໂດຍໃຊ້ມີດງັດປະຕູ ແລະ ເຫຼັກກັນຂະໂມຍທາງດ້ານຫຼັງຂອງຮ້ານ ຂອງນາງ ສຸກັນດາ ທີ່ຢູ່ດ້ານນອກຂອງຕະຫຼາດແສນອຸດົມ ເມື່ອເຂົ້າໄປໄດ້ ຜູ້ກ່ຽວໄດ້ລັກເອົາສາຍຄໍເງິນ ປະມານ 10 ກວ່າເສັ້ນ, ສາຍແຂນເງິນ ປະມານ 7 ເສັ້ນ, ແຫວນເງິນ ປະມານ 20 ວົງ, ເງິນບາດ 1.020 ບາດ, ເງິນກີບ 175.000 ກີບ ສໍາເລັດແລ້ວຈຶ່ງໄດ້ກັບອອກມາທາງເກົ່າ ແລ້ວສືບຕໍ່ລັກຊັບທີ່ຮ້ານຂາຍຄໍາ ຂອງ ທ້າວ ຄໍານຸ່ນ ທີ່ຢູ່ໃກ້ກັນກັບຮ້ານ ນາງ ສຸກັນດາ ໂດຍໃຊ້ມີດງັດເງະທາງຊ່ອງດູດອາກາດຫ້ອງນໍ້າ ແລ້ວປີນເຂົ້າໄປລັກເອົາຊັບສິນມີຄ່າ ຄື: ເງິນກີບຫົວໜາມ 37 ກີບ, ເງິນຝັກ 5 ຝັກ, ເຕົ້າປູນ 2 ອັນ, ພະ 3 ອົງ, ຊີ້ນສ່ວນຂອງເງິນ ປະມານ 3 ກິໂລ ເມື່ອສໍາເລັດກໍ່ໄດ້ກັບອອກມາທາງເກົ່າແລ້ວ ກັບຄືນເມືອເຮືອນຂອງຜູ້ກ່ຽວເຮັດຄືບໍ່ມີຫຍັງເກີດຂື້ນ.

ຕົກມາຮອດ ວັນທີ 16 ທັນວາ 2022 ໃນລະຫວ່າງທີ່ຜູ້ກ່ຽວ ນໍາເອົາວັດຖຸມີຄ່າ ໄປສະກັດເພື່ອເອົາຄໍາອອກຈາກເງິນ ຢູ່ທີ່ຮ້ານແຫ່ງໜຶ່ງພາຍໃນເມືອງຄໍາເກີດ ເຈົ້າໜ້າທີ່ວິຊາສະເພາະຈີ່ງໄດ້ນໍາກໍາລັງໄປກັກຕົວຜູ້ກ່ຽວ ມາດໍາເນີນຄະດີຕາມກົດໝາຍ.

• Facebook
• Twitter
• Line