ກອງປະຊຸມໃຫຍ່ອົງຄະນະພັກເມືອງວຽງທອງ ຄັ້ງທີ VII ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 11 ກຸມພາ ແລະ ໄດ້ອັດລົງຢ່າງເປັນທາງການ ໃນວັນທີ 12 ກຸມພາ 2020 ຢູ່ຫ້ອງປະຊຸມຫ້ອງວ່າການປົກຄອງເມືອງ ໂດຍພາຍໃຕ້ການເປັນປະທານຂອງ ສະຫາຍ ວົງສີ ທອງສີອິນທິປັນຍາ ເລຂາຄະນະບໍລິຫານງານພັກເມືອງວຽງທອງ, ເປັນກຽດເຂົ້າຮ່ວມຂອງ ສະຫາຍ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ – ແຂວງບໍລິຄຳໄຊ.
ກອງປະຊຸມໃຫຍ່ ໄດ້ຮັບຟັງລາຍງານການເມືອງທັງສອງພາກ ເຊິ່ງສະເໜີໂດຍ ສະຫາຍ ວົງສີ ທອງສີອິນທິປັນຍາ ໂດຍໄດ້ຕີລາຄາເຖິງຜົນງານ ແລະ ໄຊຊະນະຂອງການຈັດຕັ້ງປະຕິບັດແນວທາງແຜນນະໂຍບາຍ, ມະຕິຄັ້ງທີ VI ຂອງອົງຄະນະພັກເມືອງ, ອົງຄະນະພັກແຂວງ ທີ່ໄດ້ຊີ້ໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງ, ສາເຫດຕ່າງໆ ເຊິ່ງຈະຕ້ອງໄດ້ສືບຕໍ່ແກ້ໄຂໃນຕໍ່ໜ້າ ແລະ ສະຫຼຸບສັງລວມເປັນບົດຮຽນໃຫ້ແກ່ການນຳພາຂອງຕົນ, ພ້ອມນີ້ຍັງໄດ້ເປັນເອກະພາບກັນຮັບຮອງເອົາທິດທາງແຜນພັດທະນາເສດຖະກິດ-ສັງຄົມ 5 ປີຄັ້ງທີ III (2020-2024) ເຊິ່ງມີເນື້ອໃນຕົ້ນຕໍ ດັ່ງນີ້: ຍົກສູງບົດບາດ ແລະ ຄວາມສາມາດນໍາພາ ຂອງຄະນະພັກທຸກຂັ້ນ ທາງດ້ານການເມືອງ-ແນວຄິດ, ການຈັດຕັ້ງ, ແບບແຜນວິທີນໍາພາ, ເພີ່ມທະວີຄວາມເປັນເອກະພາບ ບົນພື້ນຖານຫຼັກການລວມສູນປະຊາທິປະໄຕ ແລະ ແນວທາງຂອງພັກ ເຮັດໃຫ້ການຈັດຕັ້ງພັກ ມີຄວາມປອດໃສ ເຂັ້ມແຂງ ໜັກແໜ້ນ, ຮັບປະກັນບົດບາດຂອງພັກເປັນແກນນໍາໃນລະບົບການເມືອງ, ເພີ່ມທະວີໃນການຄຸ້ມຄອງລັດ-ຄຸ້ມຄອງສັງຄົມ ດ້ວຍກົດໝາຍເທື່ອລະກ້າວ ເຮັດໃຫ້ມີສະຖຽນລະພາບທາງການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ປັບປຸງອົງການລັດຂັ້ນຕ່າງໆໃຫ້ກະທັດຮັດ ເນັ້ນຄຸນນະພາບເປັນກົກ, ເພີ່ມທະວີວຽກງານສຶກສາອົບຮົມ, ເຕົ້າໂຮມຄວາມສາມັກຄີທົ່ວປວງຊົນໃຫ້ເປັນປຶກແຜ່ນ, ມີຄວາມເປັນເອກະພາບຕໍ່ແນວທາງ ແລະ ການນໍາພາຂອງພັກ, ສ້າງຄວາມເຂັ້ມແຂງໃຫ້ແນວລາວສ້າງຊາດ ແລະ ອົງການຈັດຕັ້ງມະຫາຊົນ ມີຄວາມສາມາດປຸກລະດົມຂົນຂວາຍປະຊາຊົນບັນດາເຜົ່າ ໃນການປົກປັກຮັກສາ ແລະ ສ້າງສາພັດທະນາ, ສືບຕໍ່ເຮັດໃຫ້ເສດຖະກິດຂະຫຍາຍຕົວຕໍ່ເນື່ອງ ແລະ ສ້າງໃຫ້ໄດ້ໂຄງປະກອບເສດຖະກິດໄປຕາມທິດຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ, ຂຸດຄົ້ນທ່າແຮງບົ່ມຊ້ອນຂອງທຸກພາກສ່ວນເຂົ້າໃນການພັດທະນາເມືອງ, ຊຸກຍູ້ສົ່ງເສີມຢ່າງແຂງແຮງການຜະລິດເປັນສິນຄ້າ, ກໍ່ສ້າງ ແລະ ສ້ອມແປງພື້ນຖານໂຄງລ່າງທີ່ຈຳເປັນ, ປົກປັກຮັກສາ ແລະ ນໍາໃຊ້ຊັບພະຍາກອນທຳມະຊາດ – ສີ່ງແວດລ້ອມໃຫ້ຍືນຍົງ, ສຸມໃສ່ພັດທະນາວັດທະນະທຳ – ສັງຄົມ ໃຫ້ຄວບຄູ່ກັບການຂະຫຍາຍຕົວຂອງເສດຖະກິດ, ພັດທະນາຊັບພະຍາກອນມະນຸດ ໃຫ້ມີສະຕິປັນຍາ, ຈັນຍາບັນ, ຄຸນສົມບັດ, ຄຸນນະທຳ, ສຸຂະພາບແຂງແຮງ, ສ້າງສີມືແຮງງານເພື່ອຕອບສະໜອງ ຕາມຄວາມຮຽກຮ້ອງຕ້ອງການຂອງການສ້າງສາພັດທະນາ ແລະ ຕັ້ງໜ້າພົວພັນຮ່ວມມືກັບຕ່າງປະເທດຢ່າງເປັນເຈົ້າການ ເປັນຕົ້ນກັບເພື່ອນມິດຍຸດທະສາດ ສສ ຫວຽດນາມ ໃຫ້ນັບມື້ແໜ້ນແຟ້ນ ແລະ ຂະຫຍາຍຕົວໃນທຸກດ້ານ, ຍາດແຍ່ງເອົາການຊ່ວຍເຫຼືອ ແລະ ດືງດູດການລົງທຶນເຂົ້າໃສ່ການພັດທະນາ.
ກອງປະຊຸມໄດ້ຮັບຟັງລາຍງານ, ການປະກອບຄຳເຫັນຈາກຕາງໜ້າບັນດາຂົງເຂດວຽກງານຂອງພັກ – ລັດ ພາຍໃນເມືອງ ແລະ ຄອບຄົວຕົວແບບຈາກຮາກຖານປະຊາຊົນ ເຊິ່ງແຕ່ລະພາກສ່ວນລ້ວນແຕ່ສະແດງໃຫ້ເຫັນເຖິງ ຄວາມເປັນເອກະພາບຕໍ່ລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ, ການລາຍງານ ແລະ ປະກອບຄຳເຫັນສ່ວນຫຼາຍໄດ້ລົງເລິກລາຍງານຜົນສຳເລັດ ແຫ່ງການຜັນຂະຫຍາຍ, ຈັດຕັ້ງປະຕິບັດມະຕິກອງປະຊຸມຄັ້ງຜ່ານມາ ແລະ ວິທີການປັບປຸງວຽກງານໃນຂົງເຂດຂະແໜງການຂອງຕົນ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.
ໃນກອງປະຊຸມ ຜູ້ແທນຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານພັກເມືອງວຽງທອງ ສະໄໝທີ VII ໂດຍເລືອກໄດ້ 23 ສະຫາຍ ຍິງ 2 ສະຫາຍ ແລະ ໃນກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກເມືອງວຽງທອງ ສະໄໝທີ VII ໄດ້ເປັນເອກະສັນກັນເລືອກເອົາ ສະຫາຍ ວົງສີ ທອງສີອິນທິປັນຍາ ເປັນເລຂາຄະນະບໍລິຫານງານພັກເມືອງ, ສະຫາຍ ຄຳມອນ ໄຊພົມມີ ເປັນຮອງເລຂາ ແລະ ສະຫາຍ ສົມໃຈ ຊົງລ່າວ່າງ ເປັນຮອງເລຂາ ທັງເປັນປະທານກວດກາ, ສະຫາຍ ວັນຄຳ ເພັດໄຊຍະວົງ, ສະຫາຍ ອາລຸນສັກ ປະທຳມະວົງ, ສະຫາຍ ທອງລິດ ສິດທິອຳພາ ແລະ ສະຫາຍ ດວງໃຈ ພົມມີໄຊ ເປັນຄະນະປະຈຳພັກເມືອງ, ພ້ອມດຽວກັນ ໃນກອງປະຊຸມຍັງໄດ້ເລືອກຕັ້ງເອົາຜູ້ແທນສົມບູນ 19 ສະຫາຍ ຍິງ 2 ສະຫາຍ ແລະ ຜູ້ແທນສໍາຮອງ 3 ສະຫາຍ ຍິງ 0 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງບໍລິຄຳໄຊ.
Users Today : 118
Users Yesterday : 409
This Month : 10381
This Year : 130418
Total Users : 516642
Who's Online : 17