ກອງປະຊຸມໃຫຍ່ອົງຄະນະພັກເມືອງທ່າພະບາດ ຄັ້ງທີ VI ໄດ້ໄຂຂຶ້ນຢ່າງເປັນທາງການ ໃນວັນທີ 27 ກຸມພາ ແລະ ໄດອັດລົງຢ່າງເປັນທາງການ ໃນວັນທີ 28 ກຸມພາ 2020 ຢູ່ສະໂມສອນໃຫຍ່ເມືອງທ່າພະບາດ ພາຍໃຕ້ການເປັນປະທານຂອງ ສະຫາຍ ປອ ດວງຕາ ມໍລະຄາສຸກ ກຳມະການພັກແຂວງ ເລຂາພັກເມືອງ ເຈົ້າເມືອງທ່າພະບາດ, ເປັນກຽດເຂົ້າຮ່ວມຂອງ ສະຫາຍ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ-ແຂວງບໍລິຄຳໄຊ, ມີຜູ້ແທນສົມບູນ 105 ສະຫາຍ ຍິງ 8 ສະຫາຍ, ແຂກຖືກເຊີນຈາກບັນດາເມືອງ ແລະ ພະແນກການອ້ອມຂ້າງແຂວງເຂົ້າຮ່ວມ.
ກອງປະຊຸມໃຫຍ່ ໄດ້ຮັບຟັງລາຍງານການເມືອງທັງສອງພາກ ເຊິ່ງສະເໜີໂດຍ ສະຫາຍ ປອ ດວງຕາ ມໍລະຄາສຸກ ລາຍງານການເມືອງໄດ້ຕີລາຄາເຖິງຜົນງານ ແລະ ໄຊຊະນະ ຂອງການຈັດຕັ້ງປະຕິບັດແນວທາງແຜນນະໂຍບາຍ, ມະຕິຄັ້ງທີ X ຂອງພັກ, ມະຕິຄັ້ງທີ VI ອົງຄະນະພັກແຂວງ ແລະ ອົງຄະນະພັກເມືອງທີ່ຜ່ານມາ ໂດຍຊີ້ໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງ, ສາເຫດຕ່າງໆ ເຊິ່ງຈະຕ້ອງໄດ້ສືບຕໍ່ແກ້ໄຂໃນຕໍ່ໜ້າ ແລະ ສະຫຼຸບສັງລວມເປັນບົດຮຽນໃຫ້ແກ່ການນຳພາຂອງຕົນ, ພ້ອມນີ້ຍັງໄດ້ເປັນເອກະພາບກັນ ຮັບຮອງເອົາທິດທາງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VI ເຊິ່ງມີເນື້ອໃນຕົ້ນຕໍດັ່ງນີ້: ຍົກສູງບົດບາດການນໍາພາຂອງພັກ ໃຫ້ເຂັ້ມແຂງໜັກແໜ້ນ ເປັນແກນນໍາໃນລະບົບການເມືອງ, ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໃຫ້ເພີ້ມຂື້ນໂດຍເລັ່ງໃສ່ຄຸນນະພາບເປັນຫຼັກ, ປັບປຸງການຄຸ້ມຄອງບໍລິຫານລັດໃຫ້ໄປຕາມທິດສ້າງລັດແຫ່ງກົດໝາຍ, ສືບຕໍ່ລົງຮາກຖານການເມືອງພັດທະນາຊົນນະບົດຮອບດ້ານ, ສ້າງບ້ານໃຫ້ເປັນຫົວໜ່ວຍພັດທະນາ, ແລະ ແກ້ໄຂຄວາມທຸກຍາກຂອງປະຊາຊົນ, ຮັກສາສະເຖຍລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ
ວຽກງານປ້ອງກັນຊາດ-ປ້ອງກັນຄວາມສະຫງົບກາຍເປັນໜ້າທີ່ຂອງທົ່ວປວງຊົນຮອບດ້ານ, ເສດຖະກິດໃຫ້ຂະຫຍາຍຕົວໃນລະດັບ 5,8% ຂຶ້ນໄປ, ລາຍຮັບສະເລ່ຍ 2.173 ໂດລາຕໍ່ຄົນຕໍ່ປີ, ຮັບປະກັນທາງດ້ານສະບຽງອາຫານໃຫ້ພຽງພໍກັບການບໍລິໂພກ, ມີສ່ວນແຮໄວ້ ແລະ ຂາຍເປັນສິນຄ້າ; ສົ່ງເສີມຫັດຖະກໍາ ແລະ ພັດທະນາແຫຼ່ງທ່ອງທ່ຽວ, ຄຸ້ມຄອງທີ່ດິນ ແລະ ປ່າໄມ້ໃຫ້ຖືກຕ້ອງຕາມກົດໝາຍ, ພັດທະນາຊັບພະຍາກອນມະນຸດໃຫ້ມີຄວາມຮູ້-ຄວາມສາມາດ, ມີຄຸນສົມບັດສິນທໍາປະຕິວັດ, ປັບປຸງຄຸນນະພາບຂອງການສຶກສາ, ສາທາລະນະສຸກ ສົ່ງເສີມໃຫ້ປະຊາຊົນມີສຸກຂະອານະໄມ, ສ້າງຄອບຄົວວັດທະນະທຳ ແລະ ຮັບຮອງເປັນເມືອງວັດທະນະທຳ, ປະຕິບັດແນວທາງການຕ່າງປະເທດຂອງພັກ, ດຶງດູດເອົາການຊ່ວຍເຫຼືອ-ຮ່ວມມືຈາກອົງການຈັດຕັ້ງຕ່າງໆ ເຂົ້າໃນການພັດທະນາເມືອງໃຫ້ຫຼາຍ.
ກອງປະຊຸມໄດ້ຟັງລາຍງານ ແລະ ການປະກອບຄໍາເຫັນຈາກຜູ້ຕາງໜ້າຫຼາຍພາກສ່ວນ ເຊີ່ງແຕ່ລະພາກສ່ວນ ລ້ວນແຕ່ສະແດງໃຫ້ເຫັນເຖີງຄວາມເປັນເອກະພາບຕໍ່ບົດລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານ ແລະ ປະກອບຄຳເຫັນ ສ່ວນຫຼາຍ ໄດ້ລົງເລິກຜົນສຳເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງ ປະຊຸມໃຫຍ່ເຂົ້າໃນຂົງເຂດກົມກອງຂະແໜງການຂອງຕົນ ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.
ໃນກອງປະຊຸມຜູ້ແທນຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານພັກເມືອງສະໄໝທີ VI, ໂດຍເລືອກໄດ້ 23 ສະຫາຍ, ຍິງ 2 ສະຫາຍ ແລະ ໃນກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກເມືອງທ່າພະບາດ ສະໄໝທີ VI ໄດ້ເປັນເອກະສັນກັນເລືອກເອົາ ຄື: ສະຫາຍ ປອ ດວງຕາ ມໍລະຄາສຸກ ເປັນເລຂາຄະນະພັກ, ສະຫາຍ ພູວົງ ພີມມະສອນ ເປັນຮອງເລຂາ ແລະ ສະຫາຍ ສະຫວັນເພັດ ຈັນທະວົງສາ ເປັນຮອງເລຂາ ທັງເປັນປະທານກວດກາ. ພ້ອມດຽວກັນກອງປະຊຸມຍັງ ໄດ້ເລືອກຕັ້ງເອົາຜູ້ແທນສົມບູນ 17 ສະຫາຍ, ຍິງ 2 ສະຫາຍ ແລະ ສຳຮອງ 3 ສະຫາຍ, ຍິງ 0 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ VII ອົງຄະນະພັກແຂວງບໍລິຄຳໄຊ.
Users Today : 433
Users Yesterday : 494
This Month : 8274
This Year : 128311
Total Users : 514535
Who's Online : 12