ທ່ານພະບາດ ຈັດພິທີ ເປີດວັນຊົນລະປະທານແຫ່ງຊາດ

ພິທີ ເປີດວັນຊົນລະປະທານແຫ່ງຊາດ 3 ພະຈິກ ແລະ ວັນເປີດການນໍາໃຊ້ນໍ້າ ຊົນລະປະທານ ເພື່ອການຜະລິດລະດູແລ້ງ ປີ 2022 – 2023 ໄດ້ຈັດຂຶ້ນ ໃນວັນທີ 3 ພະຈິກ 2022 ຢູ່ບ້ານຜາໂປງ ເມືອງທ່າພະບາດ, ໃຫ້ກຽດເຂົ້າຮ່ວມໂດຍ ທ່ານ ພັດທະຈອນ ແກ້ວພຸດທະວົງ ຫົວໜ້າພະແນກກະສິກໍາ ແລະ ປ່າໄມ້ ແຂວງບໍລິຄຳໄຊ, ທ່ານ ວິນວິໄລ ໄຊຍະພອນ ຮອງກົມຊົນລະປະທານ, ມີຄະນະນໍາຂອງເມືອງ, ພະແນກການທີ່ກ່ຽວຂ້ອງຈາກແຂວງ, ເມືອງ, ອໍານາດການປົກຄອງບ້ານ ຕະຫຼອດຮອດພໍ່ – ແມ່ປະຊາຊົນ ເຂົ້າຮ່ວມ.

ພິທີເປີດຊົນລະປະທານ ທ່ານ ໂພສອນໄຊ ກຸນນາວົງ ຕາງໜ້າໃຫ້ຂະແໜງຊົນລະປະທານ ໄດ້ລາຍງານການສະໜອງນໍ້າໃຫ້ແກ່ການຜະລິດ ລະດູແລ້ງ ສົກປີ 2021 – 2022 ເຊີ່ງໃນແຕ່ລະປີ ທົ່ວປະເທດໄດ້ສ້າງຂະບວນການ ຈັດຕັ້ງອະນາໄມລະບົບຄອງເໝືອງ, ກວດກາຫົວງານ, ອາຄານຕ່າງໆ ທົດລອງເປີດເພື່ອກະກຽມຄວາມພ້ອມໃນທຸກໆດ້ານ, ແນ່ໃສ່ຮັບປະກັນໃນການສະໜອງນໍ້າໃຫ້ແກ່ການຜະລິດທັນກັບລະດູການ.

ໃນພິທີ ຍັງໄດ້ມອບແນວພັນເຂົ້າຫອມທ່າດອກຄໍາ 8 ຈໍານວນ 600 ກິໂລ ໃຫ້ກຸ່ມການຜະລິດເປັນສິນຄ້າບ້ານຜາໂປງ ເພື່ອທົດລອງການໃຊ້ນໍ້າໜ້ອຍເປັນເຕັກນິກໃໝ່ຂອງໂຄງການຜະລິດ ກະສິກໍາເປັນສິນຄ້າ ແຂວງບໍລິຄໍາໄຊ, ໃຫ້ກຽດມອບໂດຍ ທ່ານ ກອນ ຫຼວງພິທັກ ຮອງເຈົ້າເມືອງທ່າພະບາດ.

ຈາກນັ້ນ ກໍ່ໄດ້ລັ່ນຄ້ອງ 9 ບາດ, ພ້ອມທັງສັບສະວີກໄຟຟ້າແສງຕາເວັນ ເພື່ອເປີດນໍ້າ ແລະ ອະນາໄມຄອງເໝືອງຢ່າງເປັນທາງການ ໃຫ້ກຽດລັ່ນຄ້ອງໂດຍທ່ານ ພັດທະຈອນ ແກ້ວພຸດທະວົງ ຫົວໜ້າພະແນກກະສິກໍາ ແລະ ປ່າໄມ້ແຂວງບໍລິຄໍາໄຊ. ໂອກາດ ດັ່ງກ່າວ ທ່ານກໍ່ໄດ້ໄປຊົມເບິ່ງ ສວນປູກໝາກແຕງໂມ ໃນເນື້ອທີ່ 12,8 ເຮັກຕ່າ ຂອງບໍລິສັດ ຈີນເຟິງ ເຕັກນິກກະສິກໍາຄົງວົງຈອນ ຂາເຂົ້າ – ຂາອອກ ຢູ່ກຸດຟ້າແມບ.

• Facebook
• Twitter
• Line