ພະແນກໂຍທາທິການ ແລະ ຂົນສົ່ງແຂວງ ເຜີຍແຜ່ນິຕິກໍາສໍາຄັນຂອງພັກ

ໃນຕອນເຊົ້າຂອງວັນທີ 23 ກັນຍາ 2022 ພະແນກໂຍທາທິການ ແລະ ຂົນສົ່ງແຂວງບໍລິຄຳໄຊ ໄດ້ຈັດພິທີເຜີຍແຜ່ນິຕິກໍາທີ່ສໍາຄັນຂອງພັກ, ລັດຖະບານ ແລະ ຂອງແຂວງ ຢູ່ຫ້ອງປະຊຸມຂອງຕົນ ໃຫ້ກຽດເຜີຍແຜ່ໂດຍ ທ່ານ ວິໄຊ ພູມີ ຫົວໜ້າພະແນກ ຍທຂ ແຂວງ, ມີຄະນະນຳ ແລະ ພະນັກງານວິຊາການພາຍໃນພະແນກ ເຂົ້າຮ່ວມ.

ໃນກອງປະຊຸມ ໄດ້ຮັບຟັງການເຜີຍແຜ່ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ແລະ ມະຕິກອງປະຊຸມຄົບຄະນະບໍລິຫານງານພັກແຂວງບໍລິຄຳໄຊ ຄັ້ງທີ 8 ສະໄໝທີ VII ທີ່ໄດ້ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນໍາບັນຫາສຳຄັນ ເປັນຕົ້ນແມ່ນ ຕີລາຄາຜົນສໍາເລັດການຜັນຂະຫຍາຍມະຕິກອງປະຊຸມໃຫຍ່ອົງຄະນະພັກແຂວງ ສະໄໝທີ VII, ວຽກງານຮອບດ້ານຂອງແຂວງ ໃນໄລຍະ 6 ເດືອນຕົ້ນປີ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ, ຮັບຮອງເອົາທິດທາງວຽກງານຈຸດສຸມ 6 ເດືອນທ້າຍປີ 2022 ທີ່ຕ້ອງໄດ້ສຸມໃສ່ຈັດຕັ້ງປະຕິບັດ ໂດຍສະເພາະແມ່ນວຽກງານແນວຄິດ, ວຽກງານປ້ອງກັນຊາດ – ປ້ອງກັນຄວາມສະຫງົບ, ການພັດທະນາເສດຖະກິດ ແລະ ແກ້ໄຂຄວາມທຸກຍາກຂອງປະຊາຊົນ, ການພັດທະນາວັດທະນະທຳ – ສັງຄົມ ແລະ ວຽກງານອື່ນໆ.

ຮັບຟັງການເຜີຍແຜ່ ເອກະສານນໍາພາແນວຄິດ ກ່ຽວກັບຄວາມຫຍຸ້ງຍາກທາງດ້ານເສດຖະກິດ – ການເງິນ ພາຍໃຕ້ຄໍາຂວັນ “ ພົນລະເມືອງລາວທຸກຄົນເປັນເຈົ້າຂອງປະເທດຊາດ, ຍາມປະເທດຊາດພົບຄວາມຫຍຸ້ງຍາກຂັດສົນ, ທຸກຄົນຕ້ອງຊ່ວຍຊາດ ເພື່ອພ້ອມກັນຂ້າມວິກິດການໄປໃຫ້ໄດ້ ”, ໄດຍົກໃຫ້ເຫັນເຖິງສະພາບພາກພື້ນ ແລະ ສາກົນ ທີ່ຍັງສືບຕໍ່ຜັນແປຢ່າງສັບສົນຈາກຫຼາຍສາເຫດ ທີ່ສົ່ງຜົນກະທົບຕໍ່ລາຄາສິນຄ້າໃນຕະຫຼາດໂລກ, ຕ່ອງໂສ້ການຜະລິດ ແລະ ການລົງທຶນ, ພ້ອມນັ້ນ ຍັງຍົກໃຫ້ເຫັນສະພາບພາຍໃນ ໂດຍສະເພາະແມ່ນບັນຫາລະບົບການເງິນແຫ່ງຊາດໃນປັດຈຸບັນ, ສະພາບການຄຸ້ມຄອງການນໍາເຂົ້ານ້ຳມັນເຊື້ອໄຟ ແລະ ລາຄາສິນຄ້າໃນທ້ອງຕະຫຼາດທີ່ມີທ່າອ່ຽງສູງ ແລະ ມາດຕະການ, ວິທີແກ້ໄຂຂອງແຕ່ລະບັນຫາ ທີ່ຕ້ອງໄດ້ເລັ່ງສຸມໃສ່ຈັດຕັ້ງປະຕິບັດໃຫ້ໄດ້ປະສິດທິຜົນສູງສຸດ.

ນອກນັ້ນ, ຍັງໄດ້ຮັບຟັງການເຜີຍແຜ່ດໍາລັດ ສະບັບເລກທີ 205/ລບ, ລົງວັນທີ 22 ກໍລະກົດ 2022 ວ່າດ້ວຍການປະຢັດ ແລະ ຕ້ານການຟຸມເຟືອຍ, ກົດລະບຽບພັກປະຊາຊົນປະຕິວັດລາວ ສະໄໝທີ XI ໃນມາດຕາ 6 ຂໍ້ຫ້າມສຳລັບສະມາຊິກພັກ, ກົດໝາຍວ່າດ້ວຍພະນັກງານລັດຖະກອນ ເລກທີ 74/ສພຊ ໃນມາດຕາ 82 ຂໍ້ຫ້າມສຳລັບພະນັກງານ – ລັດຖະກອນ ແລະ ກົດໝາຍວ່າດ້ວຍການສໍ້ລາດບັງຫຼວງ ເລກທີ 27/ສພຊ ມາດຕາ 2 ການສໍ້ລາດບັງຫຼວງ ແລະ ມາດຕາ 27 ຂໍ້ຫ້າມສຳລັບພະນັກງານ.

ຕອນທ້າຍ ຍັງໄດ້ຜ່ານຂໍ້ຕົກລົງຂອງທ່ານເຈົ້າແຂວງບໍລິຄຳໄຊ ເລກທີ 482/ຂບຊ ລົງວັນທີ 15 ສິງຫາ 2022 ວ່າດ້ວຍການແຕ່ງຕັ້ງ ສັບຊ້ອນຫົວໜ້າຂະແໜງ ພະແນກ ຍທຂ ແຂວງ ຄື: ເຫັນດີແຕ່ງຕັ້ງ ທ່ານ ແກ້ວດາລາ ວົງສາວັນທອງ ຮອງຫົວໜ້າຂະແໜງຂົນສົ່ງ ເປັນຫົວໜ້າຂະແໜງຂົນສົ່ງ, ຊັບຊ້ອນທ່ານ ແກ້ວວິໄລ ທອງພິທັກ ຫົວໜ້າຂະແໜງກວດກາ ໄປເປັນວິຊາການຂະແໜງຂົວທາງ ແລະ ຂໍ້ຕົກລົງຂອງຫົວໜ້າພະແນກ ຍທຂ ແຂວງ ເລກທີ 2927/ຍທຂ.ບຊ ລົງວັນທີ 15 ກັນຍາ 2022 ເຫັນດີຍົກຍ້າຍ ແລະ ແຕ່ງຕັ້ງ ສະຫາຍ ບຸນທຳ ຄຳມະວົງ ຫົວໜ້າຂະແໜງຂົນສົ່ງທາງບົກ, ເປັນຜູ້ຊ່ວຍວຽກຫົວໜ້າ ແລະ ຄະນະພະແນກ.

 

• Facebook
• Twitter
• Line