ໄດ້ແລ້ວ 4 ທິມສຸດທ້າຍ ຂອງການແຂ່ງຂັນບານເຕະ ອາຍຸບໍ່ເກີນ 17 ປີ ຊິງຂັນທ່ານເຈົ້າແຂວງບໍລິຄຳໄຊ

ການແຂ່ງຂັນບານເຕະອາຍຸບໍ່ເກີນ 17 ປີ ທີມຍິງ ແລະ ທີມຊາຍ ຊິງຂັນທ່ານເຈົ້າແຂວງບໍລິຄຳໄຊ ໃນວັນທີ 22 ກັນຍາ 2022 ຍັງສືບຕໍ່ດໍາເນີນໄປດ້ວຍບັນຍາກາດຟົດຟື້ນມ່ວນຊື່ນ ແລະ ດຸເດືອດ, ເພາະເປັນເກມຕັດສິນວ່າ ທີມໄດ້ຈະຜ່ານເຂົ້າໄປສູ່ຮອບ 4 ທີມສຸດທ້າຍ.

ຄູ່ທຳອີດຂອງມື້ທີ 3 ທີມບານເຕະຊາຍ ແຂ່ງຂັນຢູ່ເດີ່ນກິລາເມືອງປາກຊັນ ເປັນການພົບກັນລະຫວ່າງ ທີມສະໂມສອນປາກຊັນ ພົບກັບທີມມັດທະຍົມສົມບູນປາກງຽບ, ຜ່ານການແຂ່ງຂັນ ເປັນທີມສະໂມສອນປາກຊັນ ທີ່ຫຼີ້ນໄດ້ດີກວ່າ ເອົາຊະນະທີມມັດທະຍົມສົມບູນປາກງຽບ 3 ປະຕູ ຕໍ່ 0, ຄູ່ທີ 2 ທີມເມືອງປາກກະດິງ ຊະນະ ທີມມັດທະຍົມສົມບູນສີທ່ານາໄຊ, ຄູ່ທີ 3 ທິມມັດທະຍົມສົມບູນໜອງບົວ ສະເໝີກັບທີມມັດທະຍົມສົມບູນໂພນໄຊໃຕ້ 0 ປະຕູ ຕໍ່ 0 ແລະ ຄູ່ທີ 4 ທິມມັດທະຍົມປາຍປາກຊັນ 1 ສະເໝີກັບ ທິມມັດທະຍົມປາຍປາກຊັນ 0 ປະຕູ ຕໍ່ 0.

ສຳລັບບານເຕະຍິງ ແຂ່ງຂັນຢູ່ເດີ່ນເຕະບານໂຮງຮຽນມັດທະຍົມຕົ້ນໂພສີ, ຄູ່ທຳອິດ ທິມມັດທະຍົມສົມບູນສີທ່ານາໄຊ ສາມາດເອົາຊະນະ ທິມມັດທະຍົມປາຍປາກຊັນ 1 ດ້ວຍຄະແນນ 1 ປະຕູ ຕໍ່ 0, ຄູ່ທີ 2 ທີມມັດທະຍົມຕົ້ນໂພສີ ສະເໝີກັບ ທິມມັດສົມບູນໜອງບົວ 0 ປະຕູ ຕໍ່ 0, ຄູ່ທີ 3 ທິມມັດທະຍົມຕົ້ນສິນໄຊ ສະເໝີກັບ ທິມມັດທະຍົມສົມບູນປາກງຽບ 0 ປະຕູ ຕໍ່ 0 ແລະ ຄູທີ 4 ທິມມັດທະຍົມສົມບູນໂພນໄຊ ຊະນະ ທີມມັດທະຍົມປາຍປາກຊັນ 2.

ໃນຮອບ 4 ທິມສຸດທ້າຍຂອງການແຂ່ງຂັນ ທີມບານເຕະຊາຍ ຈະເປັນການພົບກັນລະຫວ່າງ ທີມສະໂມສອນປາກຊັນ ທີ່ເປັນທີ 1 ຂອງສາຍ A ພົບກັບ ທີມມັດທະຍົມສົມບູນໜອງບົວ ທີ 2 ຂອງສາຍ B ແລະ ທີມມັດທະຍົມປາຍປາກຊັນ 1 ທີ່ເປັນທີ 1 ຂອງສາຍ B ພົບກັບ ທີມເມືອງປາກກະດິງ ທີ 2 ຂອງສາຍ A.

ສໍາລັບ 4 ທີມສຸດທ້າຍຂອງການແຂ່ງຂັນທີມບານເຕະຍິງ ຈະເປັນການພົບກັນລະຫວ່າງ ທີມມັດທະຍົມສົມບູນສີທານາໄຊ ທີ່ເປັນທີ 1 ຂອງສາຍ A ພົບກັບ ທີມມັດທະຍົມສົມບູນປາກງຽບ ທີ 2 ຂອງສາຍ B ແລະ ທີມມັດທະຍົມສົມບູນໂພນໄຊ ທີ່ເປັນທີ 1 ຂອງສາຍ B ພົບກັບ ທີມມັດທະຍົມປາຍປາກຊັນ 1 ທີ 2 ຂອງສາຍ A.

• Facebook
• Twitter
• Line