ໂຄສະນາອົບຮົມແຂວງ ຍົກລະດັບການນໍາໃຊ້ເຄື່ອງມືເຕັກໂນໂລຊີທີ່ທັນສະໄໝ

ພິທີເປີດຊຸດອົບຮົມວຽກງານໄອທີ ລະບົບເຄືອຂ່າຍເອເລັກໂຕນິກ ໄດ້ຈັດຂຶ້ນໃນຕອນບ່າຍຂອງວັນທີ 20 ກັນຍາ 2022 ຢູ່ຫ້ອງວ່າການແຂວງບໍລິຄຳໄຊ ໃຫ້ກຽດເຂົ້າຮ່ວມຂອງທ່ານ ວັນຕຸລາ ຣັກນຸດ ຫົວໜ້າກົມຂໍ້ມູນຂ່າວສານສູນກາງພັກ ແລະ ທ່ານ ອຸດອນ ສອນສຸລິນ ຫົວໜ້າຄະນະໂຄສະນາອົບຮົມແຂວງ, ມີກົມຂໍ້ມູນຂ່າວສານສູນກາງພັກ, ຄະນະໂຄສະນາອົບຮົມແຂວງ ແລະ ເມືອງເຂົ້າຮ່ວມ.

ເພື່ອຍົກສູງຄຸນນະພາບວຽກງານໂຄສະນາອົບຮົມເວົ້າລວມ ເວົ້າສະເພາະ ກໍຄືການນໍາໃຊ້ເຄື່ອງມືເຕັກ ໂນໂລຊີທີ່ທັນສະໄໝ ເຂົ້າໃນວຽກງານໂຄສະນາ ນັບແຕ່ສູນກາງຮອດທ້ອງຖິ່ນ ເພື່ອສ້າງບາດກ້າວຫັນປ່ຽນໃໝ່ ຂອງວຽກງານການເມືອງ-ແນວຄິດ ຕາມທິດຍົກສູງຄຸນນະພາບວຽກງານວິຊາສະເພາະ ແລະ ຫັນວຽກງານໂຄສະນາ ອົບຮົມ ໃຫ້ເປັນທັນສະໄໝເທື່ອລະກ້າວ ແລະ ແທດເໝາະກັບຍຸກ 4.0, ແນໃສ່ເຮັດໃຫ້ພະນັກງານ ຂອງຄະນະໂຄສະນາອົບຮົມແຂວງທົ່ວປະເທດມີຄວາມຮູ້, ຄວາມສາມາດທາງດ້ານວຽກງານໄອທີ ເຊັ່ນ: ການພັດທະນາ, ການຄຸ້ມຄອງລະບົບເຄື່ອຂ່າຍອິນເຕີເນັດ ແລະ ບຳລຸງຮັກສາ ເຄື່ອງມືເອເລັກໂຕຣນິກ ເພື່ອເຮັດໃຫ້ການນໍາໃຊ້ລະບົບຄອມພິວເຕີ ມີຄວາມສະດວກວ່ອງໄວ, ທັງເປັນການຍົກລະດັບຄວາມຮູ້ໃຫ້ກັບພະນັກງານວິຊາການໄອທີ ຂອງຄະນະໂຄສະນາອົບຮົມແຂວງ ນັບມື້ ນັບສູງຂຶ້ນ ແລະ ມີຄວາມເຂົ້າໃຈເລິກເຊີ່ງ ເຖິງບົດບາດຂອງເຕັກໂນໂລຊີຂໍ້ມູນຂ່າວສານ, ໄພຄຸຄາມ, ອາດສະຍາກຳ ຕ່າງໆດ້ານໄອທີ ແລະ ວິທິການຮັກສາຄວາມປອດໄພ ຂອງຂໍ້ມູນຂ່າວສານດ້ານຕ່າງໆ.

ພ້ອມນີ້ ຜູ້ເຂົ້າຮ່ວມ ຈະໄດ້ຮຽນຮູ້ກ່ຽວກັບພື້ນຖານການນໍາໃຊ້ລະບົບຄອມພິວເຕີ ແລະ ການບຳລຸງຮັກ ສາຄອມພິວເຕີ, ການຕິດຕັ້ງວິນໂດ (window) ແລະ ການລົງໂປຼແກຣມຕ່າງໆ, ວິທີປ້ອງກັນ-ແກ້ໄຂບັນຫາ ທີ່ຈະເກີດຂຶ້ນກັບຄອມພິວເຕີ ແລະ ອື່ນໆ. ຊຸດອົບຮົມໃນຄັ້ງນີ້ ຈະໄດ້ດຳເນີນໄປຈົນເຖິງວັນທີ 22 ກັນຍາ 2022 ຈຶ່ງຈະສຳເລັດ.

• Facebook
• Twitter
• Line