ເມືອງປາກຊັນ ພົບປະແລກປ່ຽນບົດຮຽນ ກັບນະຄອນຮ່າຕິ້ງ ທີ່ ສສ ຫວຽດນາມ

ໃນລະຫວ່າງວັນທີ 15 – 17 ກັນຍາ 2022 ຜ່ານມາ ຄະນະຜູ້ແທນເມືອງປາກຊັນ ນຳໂດຍທ່ານ ວົງສີ ທອງສີອິນທິປັນຍາ ຄະນະປະຈຳພັກແຂວງ, ເລຂາພັກເມືອງ, ເຈົ້້າເມືອງປາກຊັນ ພ້ອມດ້ວຍຄະນະ ໄດ້ເດີນທາງໄປເຂົ້າຮ່ວມກອງປະຊຸມພົບປະ ແລກປ່ຽນບົດຮຽນ ກັບຄະນະຜູ້ແທນນະຄອນຮ່າຕິ້ງ ສາທາລະນະລັດສັງຄົມນິຍົມຫວຽດນາມ.

ໃນການຢ້ຽມຢາມຄະນະຜູ້ແທນເມືອງປາກຊັນ  ຄະນະຜູ້ແທນເມືອງປາກຊັນ ແລະ ຄະນະຜູ້ແທນນະຄອນຮ່ງຕິ້ງ ໄດ້ຈັດພິທີວາງກະຕ່າດອກໄມ້ຢູ່ສວນສາທາລະນະປະທານໂຮຈີມິນ, ລະນຶກເຖິງຜົນງານຄຸນງາມຄວາມດີຂອງທ່ານຜູ້ນຳ, ບັນພະບູລຸດ ແລະ ນັກຮົບປະຕິວັດ ໂດຍການຕ້ອນຮັບຂອງທ່ານ ເຢື່ອງເຕິດຖັງ ກຳມະການປະຈຳພັກແຂວງ, ເລຂາຄະນະພັກ, ປະທານສະພາປະຊາຊົນນະຄອນຮ່າຕິ້ງ ສສ ຫວຽດນາມ ຄະນະທີ່ທີ່ສອງຊາດພວມເບີກບານມ່ວນຊື່ນຕໍ່ກັບການສະເຫຼີມສະຫຼອງປີສາມະຄີມິດຕະພາບລາວ-ຫວຽດນາມ (ວັນສ້າງຕັ້ງສາຍພົວພັນການທູດຄົບຮອບ 60 ປີ, ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມຄົບຮອບ 45 ປີ).

ພ້ອມນີ້ ຍັງໄດ້ຢ້ຽມຢາມຫໍວັດທະນະທຳບູຮານວັນນະຄະດີຂອງນະຄອນຮ່າຕິ້ງ, ໄປທັດສະນະສຶກສາແລກປ່ຽນບົດຮຽນທາງດ້ານກະສິກຳຂອງຄອບຄົວຕົວແບບທີ່ເຮັດການຜະລິດ ປູກຝັງ ແລະ ລ້ຽງສັດເປັນສິນຄ້າ, ວິທີການປູກໝາກແຕງຫວານໃນເຮືອນຮົ່ມ ແລະ ວິທີການລ້ຽງກຸ້ງນໍ້າຈືດໃສ່ອ່າງ ແບບປະຖົມປະຖານ ແລະ ເປັນອາຊີບຂອງປະຊາຊົນຫວຽດນາມ ທີ່ເຮັດໃຫ້ຄອບຄົວຂອງປະຊາຊົນມີລາຍຮັບທີ່ເຂັ້ມແຂງ

ໃນຕອນບ່າຍຂອງວັນດຽວກັນ ຜູ້ແທນທັງສອງຝ່າຍ ໄດ້ເຂົ້້າຮ່ວມກອງປະຊຸມພົບປະ ແລກປ່ຽນບົດຮຽນ ໂດຍປະຕິບັດຕາມບົດບັນທຶກກອງປະຊຸມພົບປະແລກປ່ຽນບົດຮຽນ ລະຫວ່າງ ຄະນະຜູ້ແທນເມືອງປາກຊັນ ກັບ ຄະນະຜູ້ແທນນະຄອນຮ່າຕິ້ງ ສາທາລະນະລັດ ສັງຄົມ ນິຍົມຫວຽນາມ.

ໂອກາດນີ້ ໃນນາມຕາງໜ້າຄະນະພັກ, ອົງການປົກຄອງເມືອງປາກຊັນ ຮູ້ສຶກພາກພູມໃຈອັນອົບອຸ່ນ ທີ່ໄດ້ມາຢ້ຽມຢາມຖາມຂ່າວ ແລະ ອວຍພອນອັນປະເສີດມາຍັງ ສະຫາຍ ຄະນະພັກ, ບັນດາສະຫາຍການນຳ, ຜູ້ແທນຮ່າຕິງ ສສ ຫວຽດນາມ ພ້ອມທັງລາຍງານສະພາບໂດຍລວມຂອງເມືອງປາກຊັນ, ໃນການຈັດຕັ້ງປະຕິບັດວຽກງານ, ການພັດທະນາເສດຖະກິດ – ສັງຄົມ, ການແກ້ໄຂຄວາມທຸກຍາກຂອງປະຊາຊົນ ແລະ ແກ້ໄຂສະພາບການລະບາດຂອງພະຍາດໂຄວິດ 19 ພາຍໃນເມືອງ. ຜູ້ແທນທັງສອງຝ່າຍ ເມືອງປາກຊັນ ແລະ ນະຄອນຮ່າຕິ້ງ ຍັງໄດ້ແລກປ່ຽນ, ຖອນບົດຮຽນໃນບາງດ້ານ ແລະ ແຜນພັດທະນາເສດຖະກິດ – ສັງຄົມ ໃຫ້ມີບາດກາດເຕີບໃຫຍ່ຂະຫຍາຍຕົວ ແລະ ມີຜົນສໍາເລັດໃນຕໍ່ໜ້າ.

ທັງສອງຝ່າຍ ໄດ້ລົງນາມເຊັນບົດບັນທຶກກອງປະຊຸມຮ່ວມກັນ ເມືອງປາກຊັນ ໃຫ້ກຽດລົງນາມເຊັນບົດບັນທຶກໂດຍທ່ານ ວົງສີ ທອງສີອິນທິປັນຍາ ແລະ ນະຄອນຮ່າຕິ້ງ ເຊັນໂດຍທ່ານ ເຢື່ອງເຕິດຖັງ ມີບັນດາຄະນະຜູ້ແທນທັງສອງຝ່າຍເຂົ້້າຮ່ວມເປັນສັກຂີພິຍາຍ ເຊິ່ງກອງປະຊຸມຄັ້ງຕໍ່ໄປແມ່ນຈະໄດ້ຈັດຂຶ້ນໃນປີ 2024 ທີ່ ເມືອງປາກຊັນ. ທັງນີ້, ເພື່ອຮັກສາຄວາມຮັກແພງມິດຕະພາບອັນຍິ່ງໃຫຍ່, ຄວາມສາມະຄີພິເສດ, ການຮ່ວມມືຮອບດ້ານຂອງສອງພັກ, ສອງລັດ ແລະ ປະຊາຊົນສອງຊາດລາວ – ຫວຽດນາມ ເວົ້້າລວມ, ເວົ້້າສະເພາະ ແຂວງບໍລິຄໍາໄຊ ແລະ ແຂວງຮ່າຕິ້ງ ກໍ່ຄື ເມືອງປາກຊັນ – ນະຄອນຮ່າຕິ້ງ ໃຫ້ນັບມື້ໜັກແໜ້ເຂັ້ມແຂງ ແລະ ໝັ້ນຄົງທະນົງແກ່ນຕະຫຼອດໄປ.

• Facebook
• Twitter
• Line