ວັນທີ 12 ສິງຫາ 2022 ກອງບັນຊາການ ປກສ ເມືອງປາກຊັນ ແຂວງບໍລິຄໍາໄຊ ໄດ້ຈັດພິທີເປີດການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ບ້ານໂນນອຸດົມ ເມືອງປາກຊັນ ຢູ່ອາຣາມວັດຂອງບ້ານ ໂດຍການເປັນປະທານຂອງ ທ່ານ ມະນີວົງ ຈັນທະວົງສາ ປະທານແນວລາວສ້າງຊາດເມືອງ, ມີທ່ານ ພັນໂທ ຮັກ ເທວາ ຮອງຫົວໜ້າກອງບັນຊາການ ປກສ ເມືອງ, ຫົວໜ້າ ປກສ ກຸ່ມບ້ານ ບົວແວງຄຳ ພ້ອມດ້ວຍຄະນະ, ມີອໍານາດການປົກຄອງບ້ານ – ນາຍບ້ານ, ກຳລັງປ້ອງກັນຊາດ – ປ້ອງກັນຄວາມສະຫງົບບ້ານ, ຕະຫຼອດຮອດພໍ່ແມ່ປະຊາຊົນ ເຂົ້າຮ່ວມ.
ໃນພິທີ ເລຂາພັກບ້ານ-ນາຍບ້ານ ໂນນອຸດົມ ໄດ້ຂື້ນຜ່ານບົດສະຫຼຸບຫຍໍ້ ການຈັດຕັ້ງປະຕິບັດວຽກງານຮອບດ້ານຂອງບ້ານ, ຍົກໃຫ້ເຫັນສະພາບລວມ, ຈຸດພິເສດພາຍໃນບ້ານ, ການປະກອບອາຊີບ ແລະ ການການດໍາລົງຊີວິດຂອງພໍ່ແມ່ປະຊາຊົນ, ບ້ານ ໂນນອຸດົມ ມີທັງໝົດ 120 ຄອບຄົວ, ຈໍານວນພົນ 594 ຄົນ, ຍິງ 277 ຄົນ.
ໂດຍປະຕິບັດຕາມ ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງປາກຊັນ, ມະຕິກອງປະຊຸມໃຫຍ່ ຄັ້ງທີ VI ຂອງບ້ານ ໄດ້ຊຸກຍູ້ສົ່ງເສິມໃຫ້ພໍ່ແມ່ປະຊາຊົນປູກເຂົ້ານາປີ, ລ້ຽງສັດ, ປູກຢາງພາລາ ແລະ ຍຶດຖືອາຊີບຄ້າຂາຍຈໍານວນໜື່ງ ເຮັດໃຫ້ເສດຖະກິດພາຍໃນບ້ານ ມີການຂະຫຍາຍຕົວ ລາຍຮັບສະເລ່ຍ 30.000.000 ກີບ/ຄົນຕໍ່ປີ.
ຈາກນັ້ນ ບັນດາຄະນະຮັບຜິດຊອບ ໄດ້ພັດປ່ຽນກັນຂື້ນຜ່ານແຜນການ ໃນການດໍາເນີນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ເຊີ່ງລວມມີແຜນວຽກ, ແຜນຄົນ, ແຜນງົບປະມານ ແລະ ບາດກ້າວໃນການດໍາເນີນຢ່າງລະອຽດ.
ດປະສົງໃນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ແມ່ນເປັນການຊຸກຍູ້, ສົ່ງເສີມ, ປຸກລະດົມ ໃຫ້ພໍ່ແມ່ປະຊາຊົນທຸກຄົນ, ທຸກຄອບຄົວ ເປັນເຈົ້າການຢ່າງຕັ້ງໜ້າ ປະກອບສ່ວນເຂົ້າໃນວຽກງານປ້ອງກັນຊາດ – ປ້ອງກັນຄວາມສະຫງົບ, ກໍາໃຫ້ໄດ້ປະກົດການຫຍໍ້ທໍ້ຕ່າງໆ ທີ່ເກີດຂື້ນພາຍໃນບ້ານ, ສຸມໃສ່ຈັດຕັ້ງປະຕິບັດ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ເພື່ອຊອກຫາວິທີການຕ້ານ, ສະກັດກັ້ນ ແລະ ແກ້ໄຂ ບໍ່ໃຫ້ບັນຫາຢາເສບຕິດແຜ່ລາມໃນບ້ານ ຫຼື ຊຸມຊົນ.
ຊຸກຍູ້ສົ່ງເສີມໃຫ້ພໍ່ແມ່ປະຊາຊົນ ປະກອບອາຊີບທໍາມາຫາກີນຢ່າງຊື່ສັດ ສຸດຈະລິດ, ບໍ່ປະພຶດຜິດຕໍ່ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນ ນັບມື້ດີຂື້ນເທື່ອລະກ້າວ.
ພາຍຫຼັງສໍາເລັດແຕ່ລະບາດກ້າວຂັ້ນຕອນ ທາງຄະນະຮັບຜິດຊອບ ຈະໄດ້ສະຫຼຸບສັງລວມຄືນຄອບຄົວທີ່ຄົບຕາມ 05 ມາດຖານ, ເງື່ອນໄຂ ໃນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ເພື່ອສະເໜີຂັ້ນເທິງອະນຸມັດອອກໃບຢັ້ງຢືນ, ສໍາລັບຄອບຄົວທີ່ບໍ່ຄົບຕາມມາດຖານ, ເງື່ອນໄຂ ແມ່ນມອບໃຫ້ອໍານາດການປົກຄອງບ້ານ, ປກສ ບ້ານ ສືບຕໍ່ສືກສາອົບຮົມ ໃຫ້ເຂົາເຈົ້າປະກອບອາຊີບ, ທໍາມາຫາກິນຖືກຕ້ອງຕາມລະບຽບກົດໝາຍ ແລ້ວກວດກາ, ຕີລາຄາ, ປະເມີນຄືນ, ຫາກຄອບຄົວໃດ ມີການປ່ຽນແປງ, ຄົບຕາມມາດຖານ, ເງື່ອນໄຂ ກໍ່ສະເໜີຂັ້ນເທິງອອກໃບອະນຸມັດຄອບຄົວປ້ອງກັນຄວາມສະຫງົບດີໃຫ້.
Users Today : 557
Users Yesterday : 409
This Month : 10820
This Year : 130857
Total Users : 517081
Who's Online : 6