ໃນຕອນບ່າຍວັນທີ 19 ສີງຫາ 2020 ນີ້ ຢູ່ສະໂມສອນບ້ານ ໂພນທອງ ເມືອງບໍລິຄັນ ແຂວງບໍລິຄຳໄຊ ທ່ານ ປອ ສຸວັນນີ ໄຊຊະນະ ປະທານສະພາປະຊາຊົນແຂວງບໍລິຄໍາໄຊ ພ້ອມດ້ວຍຄະນະ ໄດ້ລົງເຮັດວຽກຢ້ຽມຢາມ ແລະ ພົບປະໂອ້ລົມພໍ່ແມ່ປະຊາຊົນ ຢູ່ບ້ານໂພນທອງ ໂດຍການນໍາພາທາງຂອງ ທ່ານ ທອງໃບ ທອງໃສ ຮອງເຈົ່້າເມືອງບໍລິຄັນ.
ການລົງມາຢ້ຽມຢາມໃນຄັ້ງນີ້ ຈຸດປະສົງ ແມ່ນເປັນການພົບປະພໍ່ແມ່ປະຊາຊົນພາຍໃນບ້ານໂພນທອງ ແລະ ນໍາເອົາຄໍາຄິດ-ຄໍາເຫັນຂອງພໍ່ແມ່ປະຊາຊົນນໍາໄປຄົ້ນຄົ້ນແກ້ໄຂຕາມພາລະບົດບາດຂອງສະພາ ພ້ອມດຽວກັນນັ້ນ ຍັງໄດ້ຮັບພັງການລາຍງານການຈັດຕັ້ງປະຕິບັດວຽກງານຮອບດ້ານ ຈາກທ່ານ ພົມມາ ສີຍະວົງ ຮອງນາຍບ້ານ ໂພນທອງ ວ່າ: ບ້ານໂພນທອງມີ 108 ຫລັງຄາເຮືອນ, ມີພົນລະເມືອງ 611 ຄົນ ຍິງ 297 ຄົນ, ອໍານາດການປົກຄອງບ້ານ ແມ່ນໄດ້ເອົາໃຈໃສ່ສຶກສາອົບຮົມການເມືອງແນວຄີດໃຫ້ພໍ່ແມ່ປະຊາຊົນພາຍໃນບ້ານເປັນຢ່າງດີ ເຮັດໃຫ້ບ້ານມີຄວາມສະຫງົບທາງດ້ານການເມືອງ, ພື້ນຖານໂຄງລ່າງຂອງບ້ານໄດ້ຮັບການປັບປູງ ສັງຄົມມີຄວາມເປັນລະບຽບຮຽບຮ້ອຍ, ປະກົດການຫຍໍ້ທໍ້ໃນສັງຄົມໄດ້ຮັບການແກ້ໄຂເທື່ອລະກ້າວ, ປະຊາຊົນບັນດາເຜົ່າມີຄວາມສາມັກຄີປອງດອງເປັນປຶກແຜ່ນ, ກໍາລັງ ປກສ, ກອງຫຼອນ ໄດ້ຮັບການປັບປູງໃຫ້ເຂັ້ມແຂງ ແລະ ຍົກລະດັບດີຂຶ້ນ ຕິດພັນກັບການສ້າງບ້ານປ້ອມໜັ້ນສູ້ຮົບຕິດລຽນ, ເອົາໃຈໃສ່ຈັດຕັ້ງປະຕິບັດແນວທາງປ້ອງກັນຊາດ – ປ້ອງກັນຄວາມສະຫງົບເຮັດໃຫ້ບ້ານມີຄວາມສະຫງົບປອດໄຟເປັນກ້າວໆມາ.
ໂອກາດດັ່ງກ່າວ ທ່ານ ປອ ສຸວັນນີ ໄຊຊະນະ ປະທານສະພາປະຊາຊົນແຂວງ ກໍ່ໄດ້ຍ້ອງຍໍຊົມເຊີຍຜົນງານໃນການຈັກຕັ້ງປະຕິບັດໜ້າທີ່ວຽກງານຂອງອົງການຈັດຕັ້ງບ້ານ ແລະ ນ້ຳໃຈການຮ່ວມມືຂອງພໍ່ແມ່ປະຊາຊົນ ພ້ອມທັງໄດ້ໃຫ້ທິດຊີ້ນໍາຕໍ່ບັນດາການນໍາ ຂັ້ນເມືອງ, ອໍານາດການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າ ຈົ່ງສືບຕໍ່ເອົາໃຈໃສ່ໃນການສ້າງສາພັດທະນາບ້ານ, ເມືອງ ໃຫ້ມີຄວາມເຂັ້ມແຂງຮອບດ້ານ, ມີຄວາມສາມັກຄີເປັນປຶກແຜ່ນ ພ້ອມກັນປົກປັກຮັກສາຮີດຄອງປະເພນີອັນຂອງຊາດໃວ້ໃຫ້ໝັ້ນຄົງ, ສົ່ງເສີມການຜະລິດຂອງພໍແມ່ປະຊາຊົນ ໃຫ້ກາຍເປັນສິນຄ້າ ແລະ ແກ້ໄຂຄວາມທຸກຍາກຂອງພໍ່ແມ່ປະຊາຊົນ ໃຫ້ນັບມື້ຮັ່ງມີເຂັ້ມແຂງ ຂຶ້ນເທື່ອລະກ້າວ.
Users Today : 1075
Users Yesterday : 494
This Month : 8916
This Year : 128953
Total Users : 515177
Who's Online : 87