ສຶກສາແຂວງ ມອບ – ຮັບໜ້າທີ່ ການນໍາພາ-ຊີ້ນໍາຂອງຄະນະ

ພິທີມອບ – ຮັບໜ້າທີ່ ຊີ້ນໍາຂະແໜງ ລະຫວ່າງຄະນະພະແນກສຶກສາທິການ ແລະ ກິລາແຂວງ, ຫົວໜ້າຂະໜງຈັດຕັ້ງ – ພະນັກງານ ແລະ ຫົວໜ້າຂະແໜງກວດກາ, ປະເມີນຜົນ ແລະ ປະກັນຄຸນນະພາບ ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນວັນທີ 18 ກຸມພາ 2022 ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໂດຍເປັນກຽດເຂົ້າຮ່ວມຂອງ ທ່ານ ລົມ ແພງສຸກ ກໍາມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ, ມີຄະນະພະແນກ, ບັນດາຫົວໜ້າຂະແໜງ – ຮອງຂະແໜງ, ຄະນະອໍານວຍການໂຮງຮຽນອ້ອມຂ້າງແຂວງ, ຜູ້ອຳນວຍການສູນ ແລະ ພະນັກງານພາຍໃນພະແນກ ເຂົ້າຮ່ວມ.

ໃນພິທີ ໄດ້ຜ່ານຂໍ້ຕົກລົງສະບັບເລກທີ 268/ສກຂ ລົງວັນທີ 10 ກຸມພາ 2022 ວ່າດ້ວຍການແບ່ງຄວາມຮັບຜິດຊອບໃຫ້ຫົວໜ້າ ແລະ ຮອງຫົວໜ້າພະແນກສຶກສາທິການ ແລະ ກິລາແຂວງ ໂດຍ ການມອບໃຫ້ ທ່ານ ໂພເພັດ ກຸນນາວົງ ຮອງຫົວໜ້າພະແນກສຶກສາທິການ ແລະ ກິລາແຂວງ ນໍາພາ – ຊີ້ນໍາ 2 ຂະແໜງ ແລະ 2 ສູນ ຄື: ຂະແໜງກ່ອນໄວຮຽນ ແລະ ຂະແໜງ ສາມັນສຶກສາ, ສູນນິເທດ ແລະ ສູນໄອຊີທີແຂວງ, ມອບໃຫ້ທ່ານ ນາງ ຄໍາຮັກ ໄລວັນ ຮອງຫົວໜ້າພະແນກສຶກສາທິການ ແລະ ກິລາແຂວງ ນໍາພາ – ຊີ້ນໍາ 3 ຂະແໜງ ຄື: ຂະແໜງສະຖິຕິ, ແຜນການ ແລະ ການພົວພັນຕ່າງປະເທດ, ຂະແໜງການສຶກສານອກໂຮງຮຽນ ແລະ ຝຶກອົບຮົມວິຊາຊີບຂັ້ນພື້ນຖານ ແລະ ຂະແໜງອາຊີວະສຶກສາ ແລະ ການສຶກສາຊັ້ນສູງ.

ຂໍ້ຕົກລົງສະບັບເລກທີ 269/ສກຂ ລົງວັນທີ 10 ກຸມພາ 2022 ວ່າດ້ວຍການຊັບຊ້ອນປ່ຽນໜ້າທີ່ຜູ້ເກົ່າ ແລະ ຜູ້ໃໝ່ ລະຫວ່າງ ທ່ານ ວັນຄໍາ ຈັນທະວົງ ອາດີດຫົວໜ້າຂະແໜງຈັດຕັ້ງ – ພະນັກງານ ມາຮັບໜ້າທີ່ໃໝ່ເປັນຫົວໜ້າຂະແໜງກວດກາ, ປະເມີນຜົນ ແລະ ປະກັນຄຸນນະພາບ ແລະ ທ່ານ ພອນໄຊ ໄຊຍະສິດ ອາດີດຫົວໜ້າຂະແໜງກວດກາ, ປະເມີນຜົນ ແລະ ປະກັນຄຸນນະພາບ ມາຮັບໜ້າທີ່ໃໝ່ ເປັນຫົວໜ້າຂະແໜງຈັດຕັ້ງ – ພະນັກງານ.

ໃນຕອນທ້າຍພິທີ ທ່ານ ລົມ ແພງສຸກ ໄດ້ໂອລົມວ່າ: ການຍົກຍ້າຍສັບປ່ຽນໜ້າທີ່ ຖືວ່າເປັນເລື່ອງປົກກະຕິຂອງລະບົບການຈັດຕັ້ງພັກ – ລັດ ທີ່ຕ້ອງມີການປັບປຸງສັບຊ້ອນໄປຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນແຕ່ລະໄລຍະ ຊຶ່ງເປັນວຽກປົກກະຕິ ແລະ ແມ່ນຫຼັກການອັນໜຶ່ງຂອງພັກເຮົາ ໃນວຽກພະນັກງານ ເພື່ອປະຕິບັດຕາມທິດການແຕ່ງຕັ້ງ, ສັບຊ້ອນ, ຈັດວາງພະນັກງານໃຫ້ມີຂຶ້ນ, ມີລົງ, ມີເຂົ້າ, ມີອອກ ແລະ ການສັບປ່ຽນບ່ອນປະຈຳການຂອງພະນັກງານຕາມຄວາມຮຽກຮ້ອງຕ້ອງການຂອງວຽກງານ ພ້ອມທັງເປັນການຍົກລະດັບພະນັກງານການນຳໃຫ້ມີຄວາມຮູ້, ຄວາມສາມາດ ໃນວຽກງານຕົວຈິງຮອບດ້ານຫຼາຍຂຶ້ນ.

• Facebook
• Twitter
• Line