ພິທີປະຖະກະຖາຫວນຄືນມູນເຊື້ອ 66 ປີ ແຫ່ງການເຕີບໃຫຍ່ຂະຫຍາຍຕົວ ຂອງອົງການຈັດຕັ້ງກຳມະບານລາວ ( 1 ກຸມພາ 1956 – 1 ກຸມພາ 2022 ) ໄດ້ຈັດຂຶ້ນໃນວັນທີ 18 ກຸມພາ 2022 ຢູ່ສະໂມສອນແຂວງ, ໃຫ້ກຽດເປັນປະທານ ແລະ ປາຖະກະຖາ ໂດຍທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີການນຳຂອງແຂວງ, ພະນັກງານລັດຖະກອນ, ສະມາຊິກກຳມະບານ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ ເຂົ້າຮ່ວມ.
ໃນທ້າຍສັດຕະຫວັດທີ 19, ພວກລ່າເມືອງຂື້ນຝຣັ່ງໄດ້ເຂົ້າມາຍຶດຄອງ 3 ປະເທດອິນດູຈີນ ແລະ ໄດ້ປຸ້ນສະດົມ, ເຂັ້ນຂ້າ ແລະ ກົດຂີ່ຂຸດຮີດຊາວຜູ້ອອກແຮງງານຢ່າງໂຫດຮ້າຍປ່າເຖື່ອນທີ່ສຸດ, ຈົນມາຮອດວັນທີ 3 ກຸມພາ 1930 ປະທານ ໂຮ່ຈິມິນ ໄດ້ສ້າງຕັ້ງພັກກອມມູນິດອິນດູຈີນຂື້ນ ເພື່ອນໍາພາຂະບວນການຕໍ່ສູ້ຂອງປະຊາຊົນຢູ່ອິນດູຈີນ ແລະ ໃນປີ 1934 ອົງຄະນະພັກແຄ້ວນລາວ ກໍ່ໄດ້ຮັບການສ້າງຕັ້ງຂື້ນ, ຊຶ່ງເປັນບາດກ້າວທຳອິດທີ່ມີການປັບປຸງ, ຂະຫຍາຍການຈັດຕັ້ງພັກ, ອົງການຈັດຕັ້ງມະຫາຊົນ.
ມາຮອດວັນທີ 22 ມີນາ 1955 ທີ່ບ້ານນາແມວ ເມືອງວຽງໄຊ ແຂວງຫົວພັນ ພັກປະຊາຊົນລາວ ກໍ່ໄດ້ຮັບການສ້າງຕັ້ງຂື້ນ ໂດຍແມ່ນປະທານ ໄກສອນ ພົມວິຫານ ເປັນເລຂາຄະນະຊີ້ນຳສູນກາງ, ເປັນເລຂາຄະນະພັກສູນກາງ-ທັງເປັນຜູ້ບັນຊາການສູງສຸດກຳລັງປະກອບອາວຸດປະຊາຊົນລາວ.
ເພື່ອໂຄສະນາຂົນຂວາຍ, ເຕົ້າໂຮມກຳມະກອນ ໃຫ້ມີຄວາມຕື່ນຕົວທາງດ້ານຊົນຊັ້ນຢ່າງຈະແຈ້ງ, ເສີມຂະຫຍາຍປະຊາທິປະໄຕ, ສົ່ງເສີມການມີວຽກເຮັດງານທຳ ແລະ ເປັນຕົວແທນໃຫ້ແກ່ການປົກປ້ອງສິດຜົນປະໂຫຍດອັນຊອບທຳໃຫ້ແກ່ກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ ວັນທີ 1 ກຸມພາ 1956 ກົມການເມືອງສູນກາງພັກ ກໍ່ໄດ້ມີມະຕິຕົກລົງສ້າງຕັ້ງອົງການຈັດຕັ້ງກຳມະບານລາວຂື້ນຢ່າງເປັນທາງການຢູ່ເຂດທີ່ໜັ້ນ ແຂວງ ຫົວພັນ ໂດຍແມ່ນ ສະຫາຍ ສີສົມພອນ ລໍວັນໄຊ ເປັນຜູ້ຮັບຜິດຊອບ ພາຍໃຕ້ການຊີ້ນຳຂອງຄະນະນຳສູນກາງພັກ.
ພາຍຫຼັງທີ່ອົງການຈັດຕັ້ງກຳມະບານໄດ້ຮັບການສ້າງຕັ້ງຂຶ້ນ ກໍ່ໄດ້ກາຍເປັນກຳລັງຫຼວງປະກອບສ່ວນຢ່າງສົມກຽດ ເຂົ້າໃນການຕໍ່ສູ້ກູ້ຊາດແຕ່ລະໄລຍະ ຈົນສາມາດຍາດໄດ້ໄຊຊະນະ ແລະ ປົດປ່ອຍປະເທດຊາດໄດ້ ໃນວັນທີ 2 ທັນວາ 1975.
ຫຼັງຈາກນັ້ນ, ອົງການຈັດຕັ້ງກຳມະບານ ກໍ່ຍັງໄດ້ປະຕິບັດໜ້າທີ່ການຜະລິດ, ສ້າງຄວາມເຂັ້ມແຂງກຸ້ມຕົນເອງທາງດ້ານເສດຖະກິດ, ປະຕິບັດໜ້າທີ່ການສູ້ຮົບ, ທັງປັບປຸງ, ກໍ່ສ້າງ ແລະ ຂະຫຍາຍການຈັດຕັ້ງຂອງຕົນ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ກໍ່ຄືການປົກປ້ອງສິດ ແລະ ຜົນປະໂຫຍດອັນຊອບທຳໃຫ້ແກ່ສະມາຊິກກຳມະບານ ແລະ ຊາວຜູ້ອອກແຮງານລາວບັນດາເຜົ່າ.
ໃນ 1 ປີຜ່ານມາ ກໍາມະບານແຂວງບໍລິຄຳໄຊ ໄດ້ສຸມໃສ່ຫຼາຍວຽກງານສໍາຄັນ ແລະ ຍາດໄດ້ຜົນສໍາເລັດໃນຫຼາຍດ້ານ ເປັນຕົ້ນແມ່ນໄດ້ທວງເງິນໃຫ້ຜູ້ອອກແຮງງານ ຈໍານວນ 10 ລ້ານກີບ, ປຸກລະດົມທົ່ວສັງຄົມຊ່ວຍເຫຼືອຄອບຄົວອານາຖາ, ຄອບຄົວທຸກຍາກ, ມອບເຄື່ອງຊ່ວຍເຫຼືອ ແລະ ອຸປະກອນການຮຽນ ໃຫ້ນັກຮຽນ – ໂຮງຮຽນ, ມອບເຄື່ອງອຸປະໂພກ – ບໍລິໂພກ ໃຫ້ສູນກັກກັນ, ສູນປິ່ນປົວໂຄວິດ-19 ແລະ ອື່ນໆ ລວມມູນຄ່າທັງໝົດ 91 ລ້ານກວ່າກີບ, ພ້ອມນັ້ນຍັງໄດ້ປະຕິບັດນະໂຍບາຍໃຫ້ແກ່ສະມາຊິກກໍາມະບານ ທີ່ເຈັບເປັນ, ນອນໂຮງໝໍ ແລະ ເສຍຊີວິດ 600 ລ້ານກວ່າກີບ.
ໃນພິທີຍັງໄດ້ຈັດກິດຈະກຳ ບໍລິຈາກເລືອດຊ່ວຍເຫຼືອສັງຄົມ ເຊິ່ງມີສະມາຊິກກຳມະບານສະໝັກໃຈຮ່ວມບໍລິຈາກເລືອດ ທັງໝົດ 43 ສະຫາຍ, ຍິງ 21 ສະຫາຍ ແລະ ຮ້ານອາຫານກຸຫຼາບປາກຊັນ ກໍ່ໄດ້ນຳອາຫານ 70 ກ່ອງ ມາສະໜັບສະໜຸນ ເພື່ອເປັນການໃຫ້ກຳລັງໃຈພະນັກງານ ແລະ ຜູ້ທີ່ສະໝັກໃຈບໍລິຈາກເລືອດ.
ເພື່ອເປັນການຢັ້ງຢືນ ເຖິງຜົນງານການປະກອບສ່ວນບໍລິຈາກເລືອດ ຊ່ວຍເຫລືອສັງຄົມ ສະຫະພັນກຳມະບານແຂວງ ກໍ່ໄດ້ມອບໃບຍ້ອງຍໍ ໃຫ້ແກ້ຜູ້ມີຜົນງານໃນການຊ່ວຍເຫຼືອເຂົ້າໃນວຽກງານກຳມະບານ ແລະ ຜູ້ສະໝັກໃຈບໍລິຈາກເລືອດໃນຄັ້ງນີ້.
Users Today : 441
Users Yesterday : 1225
This Month : 9507
This Year : 129544
Total Users : 515768
Who's Online : 33