ເຂດ 4 ປາກທອນ ຝຶກອົບຮົມເກັບກຳຂໍ້ມູນ ແລະ ສ້າງສຳມະໂນທີ່ດິນ

ໂດຍປະຕິບັດຕາມແຈ້ງການຂອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ສະບັບເລກທີ 0894/ກຊສ, ລົງວັນທີ 7 ມີນາ 2017 ວ່າດ້ວຍການເກັບກຳຂໍ້ມູນສຳມະໂນທີ່ດິນຄືນໃໝ່ໃນຂອບເຂດທົ່ວປະເທດ ໃນຕອນເຊົ້າວັນທີ 9 ກໍລະກົດ 2021, ຢູ່ທີ່ຫ້ອງປະຊຸມ ເຂດ 4 ປາກທອນ ເມືອງປາກກະດິງ ແຂວງບໍລິຄຳໄຊ ໄດ້ຈັດຝຶກອົບຮົມການເກັບກຳຂໍ້ມູນຂື້ນທະບຽນສຳມະໂນຕອນດິນ ທົ່ວເຂດຂື້ນ. ໂດຍເປັນກຽດເຂົ້າຮ່ວມຂອງທ່ານ ຫັດສະດີ ລຸນອຸບົນ ກຳມະການພັກເມືອງ ຫົວຫນ້າເຂດ 4 ປາກທອນ, ທ່ານ ເຄນທາ ພົມມະວົງ ຮອງຫົວຫນ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງ, ມີບັນດານາຍບ້ານ ແລະ ຜູ້ຮັບຜິດຊອບວຽກງານທີ່ດິນ 12 ບ້ານພາຍໃນເຂດ 4 ປາກທອນເຂົ້າຮ່ວມ.

 ຜູ້ເຂົ້າຮ່ວມຝຶກອົບຮົມ ໄດ້ຮຽນຮູ້ກົດໝາຍວ່າດ້ວຍທີ່ດິນສະບັບເລກທີ 70/ສພຊ ,ລົງວັນທີ 21 ມິຖຸນາ 2019 ບາງມາດຕາທີ່ກ່ຽວຂ້ອງ. ແລະ ປຶ້ມບັນທຶກການເກັບກຳຂຶ້ນທະບຽນສຳມະໂນທີ່ດິນໃຫ້ແຕ່ລະບ້ານພ້ອມທັງໄດ້ສົນທະນາ, ແກ້ຂໍ້ຂ້ອງໃຈ ແລະ ອະທິບາຍ-ແນະນຳວິທີການຈົດເອົາຂໍ້ມູນຕົວເລກຕອນດິນເຂົ້າປຶ້ມບັນທຶກຢ່າງຖືກຕ້ອງ, ເພື່ອຮັບປະກັນວຽກງານການຄຸ້ມຄອງທີ່ດິນໃຫ້ມີປະສິດທິພາບ, ປະສິດທິຜົນໃນການຈັດເກັບພາສີທີ່ດິນບໍ່ໃຫ້ມີການຕົກຫຼົ່ນ. ນອກນີ້ໃນບັ້ນຝຶກອົບຮົມຍັງໄດ້ເຜີຍແຜ່ບາງແຈ້ງການຜູ້ກ່ຽວກັບການປົກປັກຮັກສາສິ່ງແວດລ້ອມ ແລະ ຂໍ້ຫ້າມໃນການການຖີ້້ມສິ່ງເສດເຫຼືອຊະຊາຍຢູ່ພາຍໃນເມືອງ ຕື່ມອີກ.

• Facebook
• Twitter
• Line