ໃນວັນທີ 11 ມິຖຸນາ 2021 ຢູ່ຫ້ອງການບ້ານນາແຫນ ເມືອງບໍລິຄັນ ແຂວງບໍລິຄຳໄຊ, ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມຄະນະ ຕາງໜ້າໃຫ້ຄະນະພັກ, ຄະນະປົກຄອງແຂວງ ໄດ້ນຳເອົາຊີມັງຈຳນວນ 60 ໂຕ່ນ ມູນຄ່າ 37 ລ້ານກວ່າກີບ ໄປມອບໃຫ້ ອຳນາດການປົກຄອງບ້ານນາແຫນ, ວັດທາດ ແລະ ບ້ານໂພນມຸງຄຸນ ໂດຍມີທ່ານ ວັນເລີນ ປູ້ຍໄມນີ ເຈົ້າເມືອງບໍລິຄັນ, ກອງກໍ່ສ້າງຮາກຖານປະຈຳກູ່ມເທດສະບານ ແລະ ອຳນາດການປົກຄອງບ້ານເຂົ້າຮ່ວມ.
ໂຄງການກໍ່ສ້າງເສັ້ນທາງເບຕົງຮ່ວມໃຈ 3 ບ້ານເທດສະບານເມືອງບໍລິຄັນ ຄື: ບ້ານ ນາແຫນ, ວັດທາດ ແລະ ບ້ານ ໂພນມຸງຄຸນ ແມ່ນໄດ້ເລີ່ມຕົ້ນຈັດຕັ້ງປະຕິບັດມາຕັ້ງແຕ່ວັນທີ 4 ມິຖຸນາ 2021 ເປັນຕົ້ນມາ ໂດຍແມ່ນທຶນສົມທົບລະຫວ່າງອົງການປົກຄອງເມືອງ, ພໍ່ແມ່ປະຊາຊົນ ແລະ ທຸກພາກສ່ວນໃນສັງຄົມ ເຊິ່ງມີໄລຍະທາງ 1.600 ແມັດ , ກວ້າງ 6 ແມັດ ແລະ ມີຄວາມໜາ 15 ຊັງຕີແມັດ, ໃນນັ້ນ ບ້ານນາແຫນ ມີຄວາມຍາວ 390 ແມັດ, ບ້ານວັດທາດ 290 ແມັດ ແລະ ບ້ານ ໂພນມຸງຄຸນ 920 ແມັດ.
ສຳລັບການຈັດຕັ້ງປະຕິບັດບັນດາໜ້າວຽກ ແມ່ນມີພະນັກງານກອງກໍ່ສ້າງຮາກຖານປະຈຳກູ່ມເທດສະບານ ແລະ ພະນັກງານວິຊາການຫ້ອງການໂຍທາທິການ ແລະ ຂົນສົ່ງເມືອງ ຊຸກຍູ້, ຕິດຕາມ ທາງດ້ານເຕັກນິກວິຊາການ ໂດຍນຳໃຊ້ແຮງງານປະຊາຊົນພາຍໃນບ້ານ ເຊິ່ງໃນແຕ່ລະວັນຄາດວ່າຈະໃຫ້ໄດ້ປະມານ 15-20 ແມັດ. ມາຮອດປະຈຸບັນບ້ານນາແຫນ ສາມາດສ້າງສໍາເລັດ 100 ກວ່າແມັດ, ສຳລັບບ້ານວັດທາດ ແລະ ບ້ານໂພນມຸງຄຸນ ຈະໄດ້ເລີ່ມລົງມືປະຕິບັດໃນກາງເດືອນ ມິຖຸນາ 2021.
ໂອກາດນີ້ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ໄດ້ຍ້ອງຍໍຊົມເຊີຍ ອົງການປົກຄອງເມືອງ, ອຳນາດການປົກຄອງຂັ້ນບ້ານ ແລະ ພໍ່ແມ່ປະຊາຊົນ ທີ່ມີຄວາມສາມັກຄີປອງດອງ ຮ່ວມແຮງຮ່ວມໃຈສ້າງສາພັດທະນາບ້ານໃຫ້ມີໃບໜ້າໃໝ່, ທ່ານໄດ້ເນັ້ນໃຫ້ອຳນາດການປົກຄອງທ້ອງຖິ່ນ ຈົ່ງໄດ້ລົງຊຸກຍູ້, ຕິດຕາມ ການປະຕິບັດໜ້າທີ່ວຽກງານໃຫ້ເປັນປົກກະຕິ ໂດຍສະເພາະແມ່ນຫ້ອງການໂຍທາທິການ ແລະ ຂົນສົ່ງຂັ້ນເມືອງ ຈົ່ງໄດ້ເປັນເຈົ້າການທາງດ້ານເຕັກນິກ, ວິຊາການ ທັ້ງນີ້ ກໍ່ເພື່ອຮັບປະກັນທາງດ້ານປະລິມານ ແລະ ຄຸນນະພາບ.
Users Today : 430
Users Yesterday : 494
This Month : 8271
This Year : 128308
Total Users : 514532
Who's Online : 9