ສະຫຼຸບໂຄງການສ້າງຄວາມເຂັ້ມແຂງ ໃນການບັງຄັບໃຊ້ກົດໝາຍ ວ່າດ້ວຍສັດນ້ຳ-ສັດປ່າ

ກອງປະຊຸມ ສະຫຼຸບໂຄງການສ້າງຄວາມເຂັ້ມແຂງໃນການບັງຄັບໃຊ້ກົດໝາຍ ວ່າດ້ວຍສັດນ້ຳ-ສັດປ່າ ແຂວງບໍລິຄຳໄຊ ໄດ້ຈັດຂຶ້ນໃນຕອນເຊົ້າຂອງວັນທີ 9 ເມສາ 2021 ຢູ່ຫ້ອງປະຊຸມຂອງຂະແໜງປ່າໄມ້ແຂວງ, ເປັນກຽດເຂົ້າຮ່ວມເປັນປະທານຂອງທ່ານ ຊາຍຄຳ ກຸນນາວົງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານນາງ ບຸນພາມາ ໂພທິສານ ຮອງຫົວໜ້າກອງທຶນປົກປັກຮັກສາສິ່ງແວດລ້ອມ, ມີກອງກວດກາປ່າໄມ້ປະຈຳແຂວງ, ຂະແໜງການກ່ຽວຂ້ອງຂັ້ນແຂວງ, ເມືອງ ແລະ ພະນັກງານວິຊາຂອງໂຄງການ ເຂົ້າຮ່ວມ.

ໂຄງການດັ່ງກ່າວນີ້ ແມ່ນມີໄລຍະຈັດຕັ້ງປະຕິບັດມາແຕ່ ວັນທີ 26 ພຶດສະພາ 2015 ຫາ 31 ມີນາ 2021 ໂດຍມີກິດຈະກຳຫຼັກ ຄື: ສ້າງຄວາມອາດສາມາດໃຫ້ແກ່ພະນັກງານດ້ວຍການຝຶກອົບຮົມ ສາມາດປະຕິບັດໄດ້ 40%, ຜ່ານມາ ສາມາດສະກັດກັ້ນການຄ້າຂາຍ ສັດປ່າທີ່ຜິດກົດໝາຍ ໄດ້ 83 ກໍລະນີ, ໃນນັ້ນ ມີການຄ້າ-ຂາຍສັດປ່າຂ້າມຊາດ 1 ກໍລະນີ, ກວດກາລາດຕະເວນໄດ້ 140 ຄັ້ງ, ເຂດຊາຍແດນ 2 ຄັ້ງ, ລົງຊຸກຍູ້ການສ້າງຄວາມເຂັ້ມແຂງກ່ຽວກັບການປະຕິບັດໃຊ້ກົດໝາຍໃຫ້ແກ່ເຈົ້າໜ້າທີ່ປ່າໄມ້ຂັ້ນເມືອງ ໄດ້ທັງໝົດ 7 ເມືອງ ລວມ 27 ຄັ້ງ, ກວດກາຟາມລ້ຽງສັດປ່າ ຢູ່ພາຍໃນແຂວງໄດ້ 2 ແຫ່ງ ຄືເມືອງທ່າພະບາດ ແລະ ຄຳເກີດ, ສ້າງສູນບຳບັດສັດປ່າໄດ້ 2 ແຫ່ງ, ເຂົ້າຮ່ວມແລກປ່ຽນບົດຮຽນການປະສານງານຮ່ວມມືກັບປະເທດເພື່ອນບ້ານ ແລະ ແຂວງໃກ້ຄຽງ ໄດ້ 5 ຄັ້ງ, ໄດ້ດຳເນີນການສືບສວນ-ສອບສວນ ກໍລະນີຄະດີຄ້າ-ຂາຍສັດປ່າຂ້າມຊາດ 1 ຄະດີ, ຄ້າ-ຂາຍສັດ ພາຍໃນ 1 ຄະດີ ແລະ ສຶກສາອົບຮົມ 29 ກໍລະນີ.

ເພື່ອສືບຕໍ່ໂຄງການໃຫ້ມີຄວາມຍືນຍົງ ໂຄງການໄດ້ວາງແຜນສືບຕໍ່ໂຄສະນາເຜີຍແຜ່ ລະບຽບກົດໝາຍຕ່າງໆໃຫ້ທົ່ວເຖິງ, ປູກຈິດສຳນຶກໃຫ້ແກ່ອານຸຊົນຮຸ້ນຫຼັງ ໃຫ້ຮູ້ຈັກອານຸລັກສັດປ່າ, ສືບຕໍ່ກວດກາລາດຕະເວນພາກສະໜາມຢ່າງຕໍ່ເນື່ອງ ເພື່ອສະກັດກັ້ນການລັກລອບຕ່າງໆ ຖ້າພົບເຫັນແມ່ນປະຕິບັດກົດໝາຍຢ່າງເຂັ້ມງວດ ແລະ ເດັດຂາດຕໍ່ຜູ້ລະເມີດ, ພະນັກງານ ແລະ ເຈົ້າໜ້າທີ່ປ່າໄມ້ ຕ້ອງເພີ່ມທະວີໃນການຊອກຮູ້ຮ່ຳຮຽນໃຫ້ສູງຂຶ້ນ ກຳໄດ້ດ້ານກົດໝາຍ ແລະ ລະບຽບການຕ່າງໆທີ່ວາງອອກ ເພື່ອນຳໄປເຜີຍແຜ່ໃຫ້ປະຊາຊົນຮັບຮູ້ທົ່ວເຖິງກັນ.