ກອງປະຊຸມໃຫຍ່ ອົງຄະນະພັກແຂວງບໍລິຄຳໄຊ ຄັ້ງທີ II ໄດ້ໄຂຂຶ້ນທີ່ສະໂມສອນໃຫຍ່ຂອງແຂວງ ໃນວັນທີ 4-6 ທັນວາ 1993 ໂດຍການເປັນ ປະທານຂອງ ທ່ານ ພົນໂທ ນະຄອນ ສີຊານົນ ກຳມະການສູນກາງພັກ, ເລຂາພັກແຂວງ ປະທານປົກຄອງແຂວງ ແລະ ໃຫ້ກຽດເຂົ້າຮ່ວມຂອງ ທ່ານ ທອງສິງ ທໍາມະວົງ ກໍາມະການກົມການເມືອງສູນກາງພັກ ຫົວຫນ້າຄະນະຈັດຕັ້ງສູນກາງພັກ, ມີຜູ້ແທນສົມບູນ ແລະ ແຂກຖືກເຊີນເຂົ້າຮ່ວມ.
ໃນກອງປະຊູມໄດ້ຕີລາຄາວ່າ: ການຜະລິດຍັງຢູ່ໃນຮູບແບບທໍາຊາດຍັງກວມ 85% ແຕ່ຮູບແບບການຜະລິດເພີ່ມຂື້ນ ຖ້າທຽບໃສ່ ປີ 1986 ເພີ່ມຂຶ້ນ 3.118 ໂຕນ, ສະເລ່ຍໃສ່ພົນລະເມືອງຜູ້ຫນຶ່ງໄດ້ຮັບເຂົ້າກິນ 301 ກິໂລຕໍ່ປີ, ເນື້ອທີ່ນາເພີ່ມຂຶ້ນ 36.7% ເນື້ອທີ່ໄຮ່ໄດ້ຫຼຸດລົງ 5.53%, ການລ້ຽງສັດຂອງປະຊາຊົນເປັນຕົ້ນ: ງົວ, ຄວາຍ, ຫມູ ເພີ່ມຂຶ້ນ 20,69%, ສັດປີກ 20.87% ເມື່ອທຽບໃສ່ປີ 1986 ແລະ ໄດ້ລົງທຶນກໍ່ສ້າງຊົນລະປະທານຂະຫນາດນ້ອຍ ແລະ ກາງ ໄດ້ 16 ແຫ່ງ ເຊັ່ນ: ນໍ້າຂຽວ ເມືອງຄໍາເກີດ, ນໍ້າຢ້າງ ເມືອງວຽງທອງ, ອ່າງຫ້ວຍສຽດ, ອ່າງນໍ້າບຶງ, ຫ້ວຍເຜີ້ງ, ຫ້ວຍທົ່ງ, ຫນອງຫົນ, ຫຼັກ 18, ນໍ້າທີ ແລະ ຈຸດອື່ນໆ.
ວຽກງານເສດຖະກິດ
ດ້ານອຸດສະຫະກໍາ-ຫັດຖະກໍາປຸງແຕ່ງ ມີການຂະຫຍາຍຕົວ, ເທດສະບານແຂວງໄດ້ນໍາໃຊ້ກະແສໄຟຟ້າດ້ວຍເຄື່ອງຈັກ, ມີເຕົາດິນຈີ່ 8 ແຫ່ງ, ໂຮງເລື່ອຍ 05 ແຫ່ງ, ໂຮງຊອຍ, ເຟີນີເຈີ 6 ແຫ່ງ, ຫັດຖະກໍາຕໍ່າຫູກທໍໄໝໄດ້ຮັບການສົ່ງເສີມໃຫ້ມີການຂະຫຍາຍຕົວ.
ດ້ານການຄ້າ ແລະ ການບໍລິການ ກໍ່ໄດ້ຂະຫຍາຍໄປສູ່ຊົນນະບົດ ແລະ ພູດອຍ, ໃນນັ້ນຮ້ານຂາຍຍ່ອຍ 1.007 ຮ້ານ ເພີ່ມຂຶ້ນ 72.19%
ດ້ານການເງິນ ປະຕິບັດກົນໄກຄຸ້ມຄອງເສດຖະກິດແບບໃໝ່, ແຍກສອງພາລະບົດບາດຄຸ້ມຄອງມະຫາພາກ ແລະ ຈຸລະພາກ, ຄຸ້ມຄອງການເງິນແບບລວມສູນ, ຫັນບັນດາເສດຖະກິດຂອງລັດ, ທີ່ເຄື່ອນໄຫວບໍ່ມີປະສິດທິຜົນ, ໄປສູ່ຮູບການກໍາມະສິດອື່ນ ແລະ ສາມາດປະຕິບັດລາຍຮັບໄດ້ 2.086 ຕື້ກີບ ເທົ່າ 130,41% ຂອງແຜນການ ໃນນັ້ນຮັບຈາກການຂາຍໄມ້ ກວມ 69.1%
ດ້ານວຽກງານ ວັດທະນະທຳ-ສັງຄົມ:
ວຽກງານການສຶກສາ: ກໍ່ເລີ່ມມີການຂະຫຍາຍຕົວກ້າວຂື້ນ ໃນທົ່ວແຂວງມີໂຮງຮຽນ: 345 ແຫ່ງ ທຽບໃສ່ປີ 1986 ໄດ້ເພີ່ມຂຶ້ນ 11,29%, ໃນໂຮງຮຽນບໍາລຸງເພີ່ມຂຶ້ນ 400% ເພາະໃນໄລຍະນີ້ພັກ ແລະ ລັດຖະບານ ໄດ້ເລັ່ງໃສ່ການແກ້ໄຂສະພາບການກືກໜັງສືຂອງປະຊາຊົນບັນດາເຜົ່າ, ໂຮງຮຽນອະນຸບານ ເພີ່ມຂຶ້ນ 133,33%, ໂຮງຮຽນປະຖົມ ເພີ່ມຂຶ້ນ 9,44%, ມັດທະຍົມເພີ່ມຂຶ້ນ 75%, ອຸດົມເພີ່ມຂຶ້ນ 100%, ມີນັກຮຽນທັງຫມົດ 30,600 ຄົນ ເພີ່ມຂຶ້ນ 64,86%. ນອກຈາກນັ້ນ ຍັງລົບລ້າງການກືກຫນັງສື ໃຫ້ປະຊາຊົນບັນດາເຜົ່າ ຈໍານວນ 9,756 ຄົນ, ປະກາດບ້ານຈົບຂັ້ນປະຖົມບຳລຸງ 82 ບ້ານ ແລະ 3 ຕາແສງ. ຈັດຕັ້ງບໍາລຸງວັດທະນະທໍາ ໃຫ້ພະນັກງານຈົບຊັ້ນປະຖົມ 417 ຄົນ, ມັດທະຍົມ 243 ຄົນ, ອຸດົມ 177 ຄົນ. ປັບປຸງໂຮງຮຽນປ່າໄມ້, ໂຮງຮຽນສ້າງແພດ, ສ້າງຄູ, ຍົກລະດັບພະນັກງານຄູໃຫ້ມີຄຸນນະພາບ, ດ້ານກິລາກາຍະກໍາ ກໍ່ພຽງມີການລິເລີ່ມມີໜໍ່ແໜງ, ຍັງບໍທັນໄດ້ຮັບການພັດທະນາຢ່າງກວ້າງຂວາງເທື່ອ.
ດ້ານສາທາລະນະສຸກ: ນອກຈາກໂຮງໝໍແຂວງ ແລະ ເມືອງທີ່ມີແລ້ວ ແຂວງບໍລິຄຳໄຊ ຍັງໄດ້ເອົາໃຈໃສ່ຍົກລະດັບທາງດ້ານວິຊາການ ແລະ ການບໍລິການໃຫ້ດີຂື້ນຕາມລຳດັບ ພ້ອມທັງຂະຫຍາຍສຸກສາລາເພີ່ມຂື້ນຈາກ 10 ແຫ່ງມາເປັນ 23 ແຫ່ງ, ຮ້ານຂາຍຢາ 62 ຮ້ານ, ນອກນັ້ນຍັງໄດ້ຍາດແຍ່ງເອົາທຶນຊ່ວຍເຫຼືອນໍາອົງການຈັດຕັ້ງສາກົນ, ສ້າງນ້ໍາລິນ, ນ້ໍາສ້າງໃຫ້ປະຊາຊົນ ໄດ້ 71 ແຫ່ງ, ປະຊາຊົນແຕ່ລະບ້ານສ່ວນຫຼາຍນໍາໃຊ້ວິດຖ່າຍ, ຍ້າຍຄອກສັດອອກຈາກກ້ອງລ່າງເຮືອນ, ດື່ມນໍາ້ຕົ້ມ ນອນໃນມຸ້ງ, ເບິ່ງແຍງແມ່ ແລະ ເດັກ, ຕ້ານໄດ້ການລະບາດຂອງໄຂ້ເລືອດອອກ, ມະເລເລຍ, ທ້ອງບິດ ແລະ ອື່ນໆ.
ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ: ໄດ້ສົ່ງເສີມ ແລະ ຂະຫຍາຍມູນເຊື້ອວັດທະນະທໍາ ຮີດຄອງປະເພນີອັນດີງາມ ທີ່ເປັນເອກະລັກຂອງຊາດ, ຂອງທ້ອງຖິ່ນແຕ່ລະຊົນເຜົ່າ, ປະຕິສັງຂອນ ປົກປັກຮັກສາອະລິຍະທໍາຂອງຊາດ ເປັນຕົ້ນວັດຖຸບູຮານ, ວັດວາອາຮາມ, ສະຖານທີ່ປະຫວັດສາດ, ບູຮານສະຖານເປັນຢ່າງດີ ແລະ ໄດ້ສ້າງລະບົບໂທລະໂຄ່ງ 500 ໂວນ 1 ແຫ່ງ, ໄດ້ເປີດບໍລິການອອກຂ່າວຢູ່ພາຍໃນເທດສະບານແຂວງ ແລະ ລາຍງານຂ່າວໃຫ້ສູນການໄດ້ຢ່າງປົກກະຕິ, ການບໍລິການທ່ອງທ່ຽວພາຍໃນແຂວງກໍໄດ້ມີໜໍ່ແໜງເປັນຕົ້ນ: ວັດພະບາດໂພນສັນ, ຕາດເລິກ ຢູ່ເມືອງທ່າພະບາດ, ວັດດານ, ຖໍ້າແຖບ ເມືອງປາກຊັນ, ເຂດຫຼັກຊາວ ເມືອງຄໍາເກີດ.
ວຽກງານແຮງງານ ແລະ ສະຫວັດດີການ-ສັງຄົມ. ປະຕິບັດນະໂຍບາຍຢ່າງສົມເຫດສົມຜົນຕໍ່ພະນັກງານບໍານານ, ຜູ້ເສຍອົງຄະ, ຄອບຄົວຜູ້ເສຍສະຊີວິດ ເພື່ອພາລະກິດປະຕິວັດ, ຜູ້ສຸຂະພາບອ່ອນເພຍ, ຜູ້ອອກສ້າງເສດຖະກິດຄອບຄົວ, ປະຊາຊົນຜູ້ຖືກອັກຄີໄພ, ໄພທໍາມະຊາດ, ຜູ້ຖືກເຄາະຮ້າຍ ສັດຕູທໍາລາຍຄົນພິການ, ເດັກກໍາພ້າກໍາພອຍ ແລະ ຊາວອົບພະຍົບ ທີ່ກັບຄືນປະເທດຕາມເງື່ອນໄຂ ແລະ ຄວາມສາມາດຕົວຈິງຂອງທ້ອງຖິ່ນໃຫ້ເຂົາເຈົ້າຢ່າງມີຄວາມອົບອຸ່ນ.
ວຽກງານພັກ-ພະນັກງານ ແຂວງພວກເຮົາກໍ່ສ້າງພັກທາງດ້ານການເມືອງ-ແນວຄິດ, ການຈັດຕັ້ງພັກທົ່ວແຂວງມີ 143 ຫນ່ວຍພັກ, ຫນ່ວຍຊົນນະບົດ 53,14%, ໃນນັ້ນມີ ຫນ່ວຍພັກແຂງ 7,69%, ກາງ 83,91%, ອ່ອນ 8,3% ແລະ ມີສະມາຊິກພັກ 1.778 ສະຫາຍ, ສະມາຊິກພັກເພີ່ມຂຶ້ນ 57,62%, ຂະຫຍາຍໃຫມ່ 23,69%, ສະມາຊິກພັກດີເດັ່ນກວມ 22,21%, ກາງ 41,39%, ອ່ອນ 17,37%, ບໍ່ໄດ້ແບ່ງ ປະເພດ 19%, ລົບລ້າງບ້ານຂາວໄດ້ 70,82%, ດ້ານບຸກຄະລະກອນ ທົ່ວແຂວງມີພະນັກງານ 2.920 ຄົນ, ຊັ້ນສູງ 8,56%, ຊັ້ນກາງ 27,56%, ຊັ້ນຕົ້ນ 47,88%, ບໍ່ມີຊັ້ນ 16%, ທຽບໃສ່ປີ 1986 ພະນັກງານບໍລິຫານໄດ້ຫຼຸດລົງ 3,43% ພະນັກງານ ວິຊາສະເພາະເພີ່ມຂຶ້ນ 8%.
ແນວລາວສ້າງຊາດ ແລະ ອົງການຈັດຕັ້ງມະຫາຊົນ ໄດ້ເຕົ້າໂຮມຄວາມສາມັກຄີເຜົ່າຊົນ, ຊັ້ນຄົນປັນຍາຊົນຕ່າງໆ ຕະຫຼອດຮອດອົງການສາສະຫນາ, ເສີມຂະຫຍາຍສິດເປັນເຈົ້າປະເທດຊາດ ແລະ ສິດປະຊາທິປະໄຕ ປະຊາຊົນ ເປັນເຈົ້າການປົກປັກຮັກສາ ແລະ ສ້າງສາພັດທະນາປະເທດຊາດ.
ຊາວຫນຸ່ມ, ແມ່ຍິງ, ກໍາມະບານ ໄດ້ເປັນເຈົ້າການບູລະນະກົງຈັກການຈັດຕັ້ງຂອງຕົນ ເຮັດໃຫ້ການຈັດຕັ້ງນັບມື້ນັບເຂັ້ມແຂງ ປະກອບສ່ວນເຂົ້າເປັນທະຫານພັນທະ 56,53% ຂອງຊາວຫນຸ່ມທັງຫມົດ.
ສະພາປະຊໍາຊົນ ອົງການຕຸລາການ ໄດ້ນໍາເອົາລັດຖະທໍາມະນູນ ລະບຽບກົດຫມາຍ, ຮັບຮູ້ຄວາມຄິດເຫັນ ແລະ ຄວາມມຸ່ງມາດປາດຖະຫນາ, ຄວາມຂັດຂ້ອງຫມອງໃຈ, ຮັບເອົາຄວາມຮ້ອງທຸກຂອງປະຊາຊົນ ໃຫ້ອົງການກ່ຽວຂ້ອງ ພິຈາລະນາແກ້ໄຂ, ປົກປ້ອງສິດຜົນປະໂຫຍດອັນຊອບທໍາຂອງປະຊາຊົນ.
ວຽກງານກໍ່ສ້າງຮາກຖານການເມືອງ. ພວກເຮົາໄດ້ຫັນເອົາພະນັກງານ, ລັດຖະກອນ, ສະມາຊິກພັກ ກໍາລັງປະກອບ ອາວຸດອ້ອມຂ້າງແຂວງ ແລະ ເມືອງ ສົມທົບກັບກໍາລັງຂອງສູນກາງ ລົງກໍ່ສ້າງຮາກຖານ ຕິດພັນກັບການພັດທະນາ ຊົນນະບົດຮອບດ້ານ ໃນນັ້ນໄດ້ສຸມໃສ່ 8 ຕາແສງ ເມືອງປາກຊັນ ແລະ 1 ຕາແສງ ເມືອງບໍລິຄັນ. ສຶກສາອົບຮົມ ປຸກລະດົມການ ເມືອງ-ແນວຄິດ ຂອງປະຊາຊົນບັນດາເຜົ່າ ປັບປຸງຫນ່ວຍພັກ, ອໍານາດການປົກຄອງ ແລະ ອົງການຈັດຕັ້ງມະຫາຊົນຂັ້ນບ້ານ ຕິດພັນກັບຂະບວນການສ້າງສະຫນາມປ້ອງກັນຊາດ-ປ້ອງກັນຄວາມສະຫງົບ ໃຫ້ກາຍເປັນຂອງປວງຊົນ, ຊຸກຍູ້ພັດທະນາເສດຖະກິດ, ວັດທະນະທໍາ-ສັງຄົມ ໃຫ້ມີການກ້າວຂື້ນ.
ກຳໜົດຄາດໝາຍສູ້ຊົນ ເພື່ອພັດທະນາແຂວງບໍລິຄຳໄຊ ແຕ່ປີ 1993 ຫາ 1998
- ຕັ້ງຫນ້າປັບປຸງວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ, ເດັດດ່ຽວປົກປັກຮັກສາຄວາມກໍ່ຄວາມວຸ້ນວາຍຂອງຄົນບໍ່ດີກໍ່ຄວາມບໍ່ສະຫງົບ, ຄວາມເປັນລະບຽບຮຽບຮ້ອຍໃນສັງຄົມ, ສະກັດກັ້ນທຸກກົນອຸບາຍການຫັນປ່ຽນໂດຍສັນຕິ.
- ຕັ້ງຫນ້າພັດທະນາເສດຖະກິດ-ສັງຄົມ ພາຍໃນແຂວງໃຫ້ນັບມື້ນັບດີຂຶ້ນ, ຫັນປ່ຽນເສດຖະກິດທໍາມະຊາດ, ເຄີ່ງທໍາມະຊາດ ໄປສູ່ເສດຖະກິດສິນຄ້າເທື່ອລະກ້າວ, ກ່ອນອື່ນຫມົດແມ່ນເອົາໃຈໃສ່ຂົງເຂດກະສິກໍາ-ປ່າໄມ້, ເພື່ອໃຫ້ແຂວງສາມາດເພີ່ງຕົນເອງ, ອີງໃສ່ຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ເປັນຕົ້ນທາງດ້ານສະບຽງອາຫານຕ້ອງໃຫ້ມີສ່ວນແຮໄວ້ ແລະ ເປັນສິນຄ້າ, ພ້ອມກັນນັ້ນ ກໍເອົາໃຈໃສ່ປັບປຸງ ແລະ ຂະຫຍາຍການບໍລິການ, ການຫັດຖະກໍາ, ການກໍ່ສ້າງພື້ນຖານອຸດສາຫະກໍາ ເປັນຕົ້ນແມ່ນໄຟຟ້າ, ອຸດສາຫະກໍາປຸງແຕ່ງ ແລະ ອື່ນໆ.
- ເພີ່ມທະວີຄວາມສາມັກຄີ ເປັນເອກະພາບພາຍໃນຖັນແຖວພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ດ້ວຍການເອົາໃຈໃສ່ສຶກສາອົບຮົມ, ເສີມຂະຫຍາຍສິດເປັນເຈົ້າຂອງປະຊາຊົນ ແລະ ບູລະນະລະບອບປະຊາທິປະໄຕປະຊາຊົນໃຫ້ກວ້າງຂວາງ.
- ສືບຕໍ່ພົບພັນຮ່ວມມືກັບຕ່າງປະເທດ ແລະ ບັນດາອົງການການຈັດຕັ້ງສາກົນ, ດຶງດູດເອົາການຊ່ວຍເຫຼືອທາງດ້ານ ວັດຖຸ, ທຶນຮອນ, ວິທະຍາສາດເຕັກນິກທີ່ກ້າວຫນ້າ ເພື່ອພັດທະນາເສດຖະກິດສັງຄົມຂອງແຂວງເຮົາ.
ເພື່ອບັນລຸທິດທາງຫນ້າທີ່ລວມຂ້າງເທິງ, ພວກເຮົາຕ້ອງກໍາແຫນ້ນທັດສະນະຍຸດທະສາດທີ່ເປັນພື້ນຖານຂອງພັກ, ແລ້ວຫັນແນວທາງນະໂຍບາຍຂອງພັກໃຫ້ເປັນແຜນການ, ໂຄງການລະອຽດ ແລະ ມີຈຸດຫມາຍສູ້ຊົນຂອງແຕ່ລະຂົງເຂດວຽກງານ ໃຫ້ຖືກຕ້ອງສອດຄ່ອງກັບຈຸດພິເສດຂອງແຂວງ.
ຈຸດຫມາຍສູ້ຊົນໃນແຕ່ລະດ້ານ.
ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ.
- ເອົາໃຈໃສ່ປັບປຸງ ແລະ ຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບຂອງພັກ ໃຫ້ເປັນໂຄງການ ແລະ ແຜນການລະອຽດຕົວຈິງ, ເຝິກອົບຮົມໃຫ້ເຊື່ອມຊຶມ ແລະ ປະຕິບັດແນວທາງຂອງພັກຢ່າງຕັ້ງຫນ້າ ມີສະຕິລະວັງສູງ, ເດັດດ່ຽວທັບມ້າງທຸກກົນອຸບາຍການເຄື່ອນໄຫວມ້າງເພທໍາລາຍພວກເຮົາຂອງກຸ່ມຄົນບໍ່ດີ.
- ສືບຕໍ່ຫັນລົງຮາກຖານ, ສ້າງທ່າສະຫນາມປ້ອງກັນຊາດ-ປ້ອງກັນຄວາມຫງົບທົ່ວປວງຊົນ, ຕິດພັນກັບການປະຕິບັດໂຄງການພັດທະນາຊົນນະບົດ ແລະ ບັນດາໂຄງການພັດທະນາເສດຖະກິດ-ສັງຄົມຂອງແຂວງ, ສ້າງຮາກຖານເຂັ້ມແຂງຮອບດ້ານ, ສ້າງກໍາລັງກອງຫຼອນໃຫ້ກາຍເປັນກໍາລັງເຂັ້ມແຂງ, ສ້າງຮາກຖານໃຫ້ເປັນຫົວຫນ່ວຍເອກະລາດໃນການສູ້ຮົບ ແລະ ການຜະລິດ. ສ້າງບ້ານເປັນບ້ານປ້ອມຫມັ້ນສູ້ຮົບ.
- ທຸກກົມກອງຕ້ອງປະຕິບັດ 3 ຫນ້າທີ່ 4 ການພົວພັນໃຫ້ດີກວ່າເກົ່າ ເອົາໃຈໃສ່ບັນຫາການເມືອງ-ແນວຄິດ, ການຈັດຕັ້ງໃຫ້ມີຄວາມປອດໃສ ແລະ ມີຄຸນນະພາບດີ, ເປັນເຈົ້າການເຄື່ອນໄຫວສະກັດກັ້ນການຂ້າມລອຍຂອງສັດຕູ ແລະ ທັບ ມ້າງເຮືອນຮັງຂອງພວກກອງປຸ້ນຢູ່ເຂດພູດອຍ.
- ປະຕິບັດນະໂຍບາຍຕໍ່ພະນັກງານນັກຮົບຢ່າງຖືກຕ້ອງ, ມີແຜນການປຸກລະດົມທຸກກົມກອງ ອອກແຮງງານເພີ່ມພູນຜະລິດຜົນ, ເພື່ອສ້າງພະລາທິການກັບທີ່, ແນໃສ່ເພິ່ງຕົນເອງສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ. ມີແຜນປຸກລະດົມປະຊາຊົນແຕ່ລະຄອບຄົວ ແຕ່ລະບ້ານປະຕິບັດນະໂຍບາຍຕໍ່ອ້າຍນ້ອງກອງຫຼອນ, ປກສ ບ້ານ, ປະຕິບັດນະໂຍບາຍຕໍ່ພະນັກງານ, ທະຫານຖືກບາດເຈັບ, ເສຍອົງຄະ ແລະ ເສຍຊີວິດ.
ວຽກງານການພັດທະນາເສດຖະກິດ.
- ການຜະລິດກະສິກໍາ-ປ່າໄມ້.
ສູ້ຊົນເຮັດໃຫ້ການຜະລິດກະສິກໍາແຕ່ລະດ້ານເພີ່ມຂຶ້ນ, ສຸມໃສ່ແກ້ໄຂບັນຫາການຜະລິດສະບຽງອາຫານ, ຕົ້ນຕໍ ແມ່ນເລັ່ງໃສ່ການປູກເຂົ້າ ແລະ ພືດກະສິກໍາໃຫ້ກາຍເປັນສິນຄ້າ ຜະລິດເຂົ້າໃຫ້ໄດ້ 3,16 ໂຕນ ຕໍ່ເຮັກຕາ, ຫຼຸດຜ່ອນເນື້ອທີ່ ເຮັດໄຮ່, ໃນລະດັບ 3-4% ຕໍ່ປີ, ຮອດປີ 1998 ຜະລິດເຂົ້າໃຫ້ໄດ້ 71.020 ໂຕນ ສະເລ່ຍຜູ້ຫນຶ່ງໃຫ້ໄດ້ເຂົ້າເປືອກ 400 ກິ ໂລກລາມ ຕໍ່ປີ.
– ເອົາໃຈໃສ່ບຸກເບີກເນື້ອທີ່ນາ, ຟື້ນຟູນາເຮື້ອ, ເຮັດນາແຊງ ແລະ ນາປີ, ຊຸກຍູ້ການເຮັດນາແບບກະເສດສຸມແບບ ງ່າຍດາຍ. ຮອດປີ 1998 ໃຫ້ມີເນື້ອທີ່ນາ 17.771 ເຮັກຕາ, ການຜະລິດນາແຊງແມ່ນເລັ່ງໃສ່ ເມືອງຄໍາເກີດ, ວຽງທອງ, ເມືອງປາກຊັນ.
– ສຸມທຶນເຂົ້າໃສ່ການກໍ່ສ້າງ, ສ້ອມແປງຊົນລະປະທານ, ປົກປັກຮັກສາ ແລະ ນໍາໃຊ້ຊົນລະປະທານທີ່ມີແລ້ວໃຫ້ມີ ປະສິດທິຜົນດີ, ດໍາເນີນການກໍ່ສ້າງຊົນລະປະທານ ທີ່ໄດ້ສໍາຫຼວດອອກແບບແລ້ວໃຫ້ໄດ້ 3 ແຫ່ງ ຄື: ນໍ້າກາບ, ນໍ້າກວົະ ແລະ ຄອງເຫມືອງນໍ້າຢ້າງ.
– ສົ່ງເສີມການບໍລິການ ແລະ ຊຸກຍູ້ປະຊາຊົນປູກພືດຊະນິດຕ່າງໆ ເປັນສິນຄ້າຖືກຕ້ອງກັບຄວາມຕ້ອງການຂອງ ຕະຫຼາດພາຍໃນ ແລະ ຕ່າງປະເທດ ເປັນຕົ້ນແມ່ນ: ປູກປໍແກ້ວ, ຫມາກງິ້ວ, ຢາສູບ, ຖົ່ວຂຽວ, ສາລີ, ຫມາກເດັ່ນ, ຫມາກແຕງ, ຫມາກນັດ, ປະເພດພືດໃຫ້ໃບໃຫ້ຢາ ແລະ ອຶ່ນໆ ໂດຍເລັ່ງໃສ່ບັນດາບ້ານລຽບຕາມແຄມແມ່ນໍ້າຂອງ ແລະ ເຂດທົ່ງພຽງ ເຊັ່ນ: ເມືອງທ່າພະບາດ, ເມືອງປາກຊັນ, ເມືອງປາກກະດິງ ແລະ ເມືອງບໍລິຄັນ.
– ຂະຫຍາຍການລ້ຽງສັດທຸກປະເພດ ໂດຍເລັ່ງໃສ່ແຕ່ລະຄອບຄົວຂອງຊາວກະສິກອນເປັນຕົ້ນຕໍ ໃຫ້ກາຍເປັນລາຍ ຮັບເສດຖະກິດຄອບຄົວ ແລະ ເປັນສິນຄ້າຂາອອກ, ເລັ່ງໃສ່ບາງເຂດ ຄື: ເຂດນາກະທາດ, ຫນອງຍຸງ ( ເມືອງປາກຊັນ ), ທົ່ງ ດານກົກແສນ ( ເມືອງປາກດິງ ) ເຂດໂພນຄໍາ, ສົບຂົມ ( ເມືອງຄໍາເກີດ ) ເຂດສາມສອກ ( ເມືອງວຽງທອງ), ທົ່ງຄາ ( ເມືອງບໍລິຄັນ ); ເອົາໃຈໃສ່ບໍາລຸງ, ສ້າງພະນັກງານສັດຕະວະແພດ ເພື່ອຮັບໃຊ້ໃນການລ້ຽງສັດ.
– ປ່າໄມ້: ຕ້ອງຮີບຮ້ອນຈັດສັນປ່າໄມ້ໃຫ້ຈະແຈ້ງ ເຊັ່ນ: ເຂດປ່າສະຫງວນ, ປ່າຫວງຫ້າມ, ປ່າຟື້ນຟູ, ປ່າຜະລິດ, ປ່າ ໄມ້ທຸລະກິດ, ຢ່າຍອດນໍ້າ ແລະ ອຶ່ນໆ. ກໍ່ສ້າງພະນັກງານປ່າໄມ້ໃຫ້ແຕ່ລະບ້ານ ຮອດປີ 1998 ໃຫ້ໄດ້ 70%.
– ດໍາເນີນການອອກໃບຕາດິນ-ມອບດິນ ມອບປ່າໃຫ້ບ້ານ, ໃຫ້ຄອບຄົວປະຊາຊົນ, ກໍານົດຜົນປະໂຫຍດອັນເຫມາະສົມ.
– ຕ້ອງສູ້ຊົນຫຼຸດຜ່ອນການຖາງປ່າເຮັດໄຮ່ໃຫ້ມີຕົວເລກຫຼຸດລົງ ຄຽງຄູ່ກັບການບົວລະບັດຮັກສາປ່າທໍາມະຊາດ ຕ້ອງປູກໄມ້ໃຫ້ເປັນປ່າ, ຮີບຮ້ອນຈັດສັນອາຊີບ ແລະ ພູມລໍາເນົາຄົງທີ່ໃຫ້ ປະຊາຊົນພູດອຍ.
ຖືເອົາການພັດທະນາຊົນນະບົດຮອບດ້ານ, ການຜະລິດອຸດສາຫະກໍາ-ຫັດຖະກໍາ: ສົ່ງເສີມຫັດຖະກໍາທີ່ເປັນມູນເຊື້ອຂອງປະຊາຊົນເຜົ່າຕ່າງໆ ເຊັ່ນ: ຕໍ່າຫູກ, ທໍ ໄຫມ, ຕີເງິນ, ຄໍາ, ຄວັດລາຍ, ຈັກສານ, ຜະລິດເຄື່ອງທີ່ລະນຶກ, ຜະລິດຕະພັນໄມ້ປ່ອງ, ຫວາຍ, ໄມ້ແກະສະຫຼັກ, ປັ້ນຫມໍ້ ຫຼໍ່ ໄຫ ແລະ ອຶ່ນໆ.
- ວຽກງານຄົມມະນາຄົມຂົນສົ່ງ-ໄປສະນີ ແລະ ກໍ່ສ້າງ.
ຄົມມະນາຄົມ: ສືບຕໍ່ສ້ອມແປງ ແລະ ປົກປັກຮັກສາເສັ້ນທາງບົກ ແລະ ທາງນໍ້າໃຫ້ດີຂຶ້ນ ຊຸກຍູ້ປະຊາຊົນສ້ອມແປງທາງຊອຍ ແລະ ເສັ້ນທາງລະຫວ່າງບ້ານຕໍ່ບ້ານ ເພື່ອຮັບປະກັນໃຫ້ການສັນຈອນ ດໍາເນີນການກໍ່ສ້າງເສັ້ນທາງແຕ່ເມືອງເກົ່າ ຫາ ຕາແສງຜາເມືອງ ຫາຕາແສງເມືອງບໍ່, ແຕ່ຫຼັກຊາວ ຫາສົບຂົມ, ແຕ່ປາກກະດິງ ຫາ ບ້ານນານໍ້າ, ແຕ່ຜາເມືອງ ຫານາກຸນ, ສໍາຫຼວດອອກແບບທາງນໍ້າ ແຕ່ສົບຂົມ ຫາ ໂພສີ, ຍົກລະດັບທາງປູຢາງໃນເທດສະບານແຂວງ ແລະ ເມືອງປາກຊັນ.
– ວຽກຂົນສົ່ງ: ເພີ່ມທະວີການຄຸ້ມຄອງ ແລະ ນໍາໃຊ້ພາຫະນະຂົນສົ່ງທາງບົກ-ທາງນໍ້າ, ຊຸກຍູ້ ອໍານວຍຄວາມສະດວກໃນ ການຂົນສົ່ງໂດຍສານ ລະຫວ່າງຕົວເມືອງ – ຊົນນະບົດໃຫ້ດີຂຶ້ນກວ່າເກົ່າ, ປຸກລະດົມນໍາໃຊ້ພາຫະນະພື້ນເມືອງ ເຊັ່ນ: ລໍ້, ກວຽນ, ມ້າ ແລະ ອຶ່ນໆ ເຂົ້າໃນການຈາລະຈອນ,
– ໄປສະນີ: ເອົາໃຈໃສ່ຂະຫຍາຍໄປສະນີຢູ່ຂັ້ນເມືອງ ເພື່ອຮັບປະກັນການຕິດຕໍ່ສື່ສານໃຫ້ຊັດເຈນ, ທັນເວລາ, ສ້າງ ຄວາມສະດວກສະບາຍ ໃນການຕິດຕໍ່ພົວພັນລະຫວ່າງແຂວງກັບເມືອງ, ແຂວງກັບສູນກາງ ແລະ ຕ່າງປະເທດ, ສົມທົບກັບ ສູນກາງ ເພື່ອປັບປຸງກໍ່ສ້າງ ແລະ ຕິດຕັ້ງລະບົບໂທລະສັບທີ່ທັນສະໄຫມໃນເທດສະບານແຂວງ.
– ວຽກກໍ່ສ້າງ: ສືບຕໍ່ບຸກເບີກ, ຈັດສັນ, ສ້າງເທດສະບານແຂວງໃຫມ່, ສ້າງສໍານັກງານຫ້ອງການຕ່າງໆ ຂອງແຂວງ ແລະ ເມືອງ, ດໍາເນີນການສໍາຫຼວດ ແລະ ສ້າງເທດສະບານເມືອງປາກກະດິງ, ເມືອງວຽງທອງ, ເມືອງບໍລິຄັນ ແລະ ເມືອງທ່າພະບາດ. ເອົາໃສ່ໃຈຕ້ານຝຣັ່ງເຈື່ອນເຂດປາກນໍ້າຊັນ ລົງຫາປາກປຶງ
- ວຽກການຄ້າ ແລະ ທ່ອງທ່ຽວ.
ການຄ້າ: ພະຍາຍາມຊອກຕະຫຼາດຈໍາຫນ່າຍຜົນຜະລິດຂອງຊາວກະສິກອນ, ເອົາໃຈໃສ່ການບໍລິການສອງສົ້ນ ເພື່ອຊຸກຍູ້ການຜະລິດສິນຄ້າ, ເປີດກວ້າງການຊື້ຂາຍໃນເຂດຊົນນະບົດຫ່າງໄກ, ເຮັດໃຫ້ການຄ້າເສີມຂະຫຍາຍບົດບາດເຂົ້າໃນການພັດທະນາຊົນນະບົດຮອບດ້ານ, ດໍາເນີນການດັດສົມຕະຫຼາດ, ສະກັດກັ້ນການຄ້າຂາຍເຖື່ອນ, ພໍ່ຄ້າມືກາງ, ດໍາເນີນ ສັນຍາຊື້ – ຂາຍກັບບໍລິສັດພາຍໃນ ແລະ ຕ່າງປະເທດ, ເອົາໃຈໃສ່ປັບປຸງ ການຄຸ້ມຄອງ ແລະ ການບໍລິການດ້ານທ່ອງທ່ຽວ, ຈັດສັນປັບປຸງບູລະນະແຫຼ່ງ ທ່ອງທຽວວັດທະນະທໍາ ແລະ ທ່ອງທ່ຽວແຫຼ່ງທໍາມະຊາດຢູ່ເຂດທີ່ມີ, ຂະຫຍາຍ ຕາຫນ່າງບໍລິການທ່ອງທ່ຽວ ເຊັ່ນ: ຮ້ານອາຫານ, ເຮືອນພັກ, ຮ້ານຄ້າຂາຍເຄື່ອງທີ່ລະນຶກ ແລະ ອຶ່ນໆ ເພື່ອດຶງດູດເອົານັກທ່ອງ ທ່ຽວ, ນັກລົງທຶນພາຍໃນ ແລະ ຕ່າງປະເທດເຂົ້າມາໃຫ້ຫຼາຍຂຶ້ນ.
- ວຽກງານການເງິນ ແລະ ການທະນາຄານ.
ການເງິນ: ເພີ່ມແຫຼ່ງຫຼາຍຮັບພາຍໃນແຂວງ ເຂົ້າໃນງົບປະມານໃຫ້ໄດ້ຫຼາຍຂຶ້ນ, ຊອກໃຫ້ເຫັນແຫຼ່ງລາຍຮັບທີ່ຍັງ ເຊື່ອງຊ້ອນຢູ່. ຫຼຸດຜ່ອນ ຫຼື ປະຢັດລາຍຈ່າຍທີ່ບໍ່ຈໍາເປັນລົງ, ເອົາໃຈໃສ່ຄຸ້ມຄອງນໍາໃຊ້ທຶນຊ່ວຍເຫຼືອ, ກູຢືມຈາກຕ່າງປະເທດ ແລະ ອົງການຈັດຕັ້ງສາກົນ, ສຸມທຶນຮອນເຂົ້າໃສ່ການພັດທະນາເສດຖະກິດ-ສັງຄົມ ເພື່ອເຮັດໃຫ້ການລົງທຶນຖືກເປົ້າຫມາຍ ແລະ ມີປະສິດທິຜົນສູງກວ່າເກົ່າ. ປັບປຸງ ແລະ ປະຕິບັດລະບົບພາສີ, ທີ່ດິນຢ່າງເຂັ້ມງວດ ແລະ ຖືກຕ້ອງຕາມລະບຽບກົດຫມາຍ.
ເອົາໃຈໃສ່ຄຸ້ມຄອງເງິນກີບ, ເງິນຕາຕ່າງປະເທດ, ການແລກຊື້ຂາຍວັດຖຸມີຄ່າ, ເພື່ອເຮັດໃຫ້ເງິນກີບມີຄວາມຫມັ້ນທ່ຽງ..
ການພົວພັນ ແລະ ຮ່ວມມືກັບຕ່າງປະເທດ ໂດຍສະເພາະແມ່ນປະເທດເພື່ອນມິດ, ປະເທດໃກ້ຄຽງ ເຊັ່ນ: ແຂວງຮ່າຕິ່ງ ສ.ສ ຫວຽດນາມ, ແຂວງຫນອງຄາຍ ປະເທດໄທ ຕາມສັນຍາ ແລະ ບົດບັນທຶກຮ່ວມມື ທີ່ໄດ້ຕົກລົງນໍາກັນແລ້ວ ໃຫ້ປະກົດຜົນເປັນຈິງ,
- ວຽກງານສຶກສາ, ສາທາລະນະສຸກ ແລະ ວັດທະນະທໍາ-ສັງຄົມ.
ວຽກງານສຶກສາ: ແຕ່ນີ້ຮອດປີ 1998 ຕ້ອງສູ້ຊົນຈໍາກັດ ແລະ ຫຼຸດຜ່ອນຈໍານວນຄົນບໍ່ຮູ້ຫນັງສື ແລະ ກືກຫນັງສືຄືນໃຫມ່ ໃນຫມູ່ປະຊາຊົນ, ປະຕິບັດການສຶກສາຊັ້ນປະຖົມແບບບັງຄັບ, ລູກຫຼານປະຊາຊົນ ທີ່ຢູ່ໃນເກນອາຍຸໄວຮຽນ ຕ້ອງຊຸກຍູ້ ເຂົ້າໂຮງຮຽນ. ຂະຫຍາຍໂຮງຮຽນໄປຫາເຂດຊົນເຜົ່າຫ່າງໄກສອນຫຼີກເຊັ່ນ: ເມືອງຄໍາເກີດ, ວຽງທອງ, ບໍລິຄັນ ແລະ ຍົກສູງຄຸນນະພາບການສຶກສາໃຫ້ດີຂື້ນ ພ້ອມທັງປຸກລະດົມກິລາຂອງມະຫາຊົນຢ່າງກວ້າງຂວາງ ແລະ ເປັນຂະບວນ.
ວຽກງານສາທາລະນະສຸກ: ປັບປຸງຂະຫຍາຍວຽກງານສາທາລະນະສຸກ, ຮັກສາສຸຂະພາບ, ກັນພະຍາດລະບາດທີ່ ເປັນອັນຕະລາຍ, ສ້າງເງື່ອນໄຂໃຫ້ປະຊາຊົນບັນດາເຜົ່າ, ຜູ້ທີ່ຂາດເຂີນມີລາຍໄດ້ຫນ້ອຍ ໄດ້ຮັບການບໍລິການດ້ານສາທາລະນະສຸກ ດ້ວຍການຂະຫຍາຍຕາຫນ່າງສາທາລະນະສຸກ ໄປສູ່ພື້ນຖານປະຊາຊົນ ເຂດຊົນນະບົດພູດອຍຫ່າງໄກສອກຫຼີກ, ສຸມໃສ່ປັບປຸງໂຮງຫມໍແຂວງ, ໂຮງຫມໍ ເມືອງ, ສຸກສາທາທີ່ມີແລ້ວໃຫ້ດີ, ທັງປັບປຸງຈັນຍາບັນ ທັດສະນະຄວາມຮັບຜິດຊອບແພດຫມໍໃຫ້ສູງ, ເປີດກວ້າງການນໍາໃຊ້ ຢາ ແລະ ບົດຮຽນການສຶກສາພະຍາບານແບບພື້ນເມືອງ ສົມທົບກັບຢາຫຼວງ ແລະ ການບໍລິການດ້ານການແພດ.
ວຽກງານຖະແຫຼງຂ່າວ-ວັດທະນະທຳ: ສືບຕໍ່ປົກປັກຮັກສາ ແລະ ເສີມຂະຫຍາຍວັດທະນະທໍາທີ່ດີງາມມີລັກສະນະຊາດ- ປະຊາຊົນ ມູນເຊື້ອວັດທະນະທໍາ ຮີດຄອງປະເພນີອັນດີງາມ ທີ່ເປັນເອກະລັກຂອງບັນດາເຜົ່າຕ່າງໆ, ພ້ອມທັງຂະຫຍາຍຕານ່າງຂໍ້ມູນຂ່າວສານໃຫ້ກວ້າງຂວາງ ລົງສູ່ຮາກຖານ, ທ້ອງຖີ່ນຢ່າງທົ່ວເຖີງ.
ວຽກງານແຮງງານ ແລະ ສະຫວັດດີການສັງຄົມປະຕິບັດນະໂຍບາຍອັນຖືກຕ້ອງ ແລະ ສົມເຫດສົມຜົນຕໍ່ຜູ້ມີ ຄຸນງາມຄວາມດີ, ຕໍ່ການປະຕິວັດ, ພະນັກງານອະວຸໂສບໍານານ, ຄອບຄົວຜູ້ເສຍສະຫຼະເພື່ອການປະຕິວັດ, ປະຕິບັດ ນະໂຍບາຍເງິນອຸດຫນູນ ແລະ ເງິນບໍານານໃຫ້ພະນັກງານເປັນປົກກະຕິ, ປະຕິບັດນະໂຍບາຍສົງເຄາະສັງຄົມຄອບຄົວທີ່ຖືກ ເຄາະຮ້າຍ ແລະ ອຸທົກກະໄພຕ່າງໆ ໃຫ້ທັນເວລາ.
- . ລະບົບການເມືອງ.
- ປັບປຸງ ແລະ ເພີ່ມທະວີການນໍາພາຮອບດ້ານຂອງອົງຄະນະພັກ.
– ວຽກງານກໍ່ສ້າງພັກ: ກ່ອນອື່ນຫມົດພວກເຮົາຕ້ອງເພີ່ມທະວີສຶກສາອົບຮົມການເມືອງ-ແນວຄິດ ໃຫ້ຖັນແຖວ ພະນັກງານ, ສະມາຊິກພັກ ເຊື່ອມຊຶມເປັນເອກະພາບກັບແນວທາງປ່ຽນໃຫມ່ຂອງພັກ, ເຊີດຊູຄວາມເຊື່ອຫມັ້ນຂອງພັກ ແລະຄວາມເດັດດ່ຽວເດີນຕາມເສັ້ນທາງການນໍາພາຂອງພັກປະຊາຊົນ ປະຕິວັດລາວ ທີ່ເປັນແກນນໍາ.
– ເອົາໃຈໃສ່ປັບປຸງກໍ່ສ້າງ ແລະ ຂະຫຍາຍພັກໃຫ້ມີຄວາມຫນັກແຫນ້ນເຂັ້ມແຂງ ແລະ ຮັບປະກັນຄຸນະພາບ ກໍ່ສ້າງ ສະມາຊິກພັກໃຫມ່ທີ່ຫນຸ່ມນ້ອຍ, ເພດຍິງ, ຊົນເຜົ່າ ໂດຍຜ່ານຂະບວນການຂອງມະຫາຊົນ.
– ສູ້ຊົນສ້າງບ້ານໃຫ້ມີສະມາຊິກພັກນໍາພາກວມ 70% ຂອງຈໍານວນບ້ານທັງຫມົດ, ສ້າງສະມາຊິກພັກແຂງໃຫ້ໄດ້ 35-40% ສ້າງຫນ່ວຍພັກຮູ້ນໍາພາຮອບດ້ານໃຫ້ໄດ້ 3-5 ຫນ່ວຍຫຼຸດຜ່ອນສະມາຊິກພັກອ່ອນລົງໃຫ້ຢູ່ໃນລະດັບຕໍ່າສຸດ
– ວຽກງານກໍ່ສ້າງພະນັກງານ: ບໍາລຸງສ້າງພະນັກງານໃຫ້ສອດຄ່ອງກັບເງື່ອນໄຂ ແລະ ຄວາມຮຽກຮ້ອງຕ້ອງການຂອງ ແຕ່ລະຂົງເຂດວຽກງານ, ຕ້ອງບໍາລຸງສ້າງພະນັກງານນໍາພາ, ພະນັກງານຫຼັກແຫຼ່ງ, ພະນັກງານຄຸ້ມຄອງ, ພະນັກງານວິຊາການ ດ້ວຍຫຼາຍຮູບການ, ຫຼາຍລະດັບຢູ່ພາຍໃນແຂວງ, ສູງກາງ ແລະ ຕ່າງປະເທດ.
ເພີ່ມທະວີບົດບາດຂອງແນວລາວສ້າງຊາດ ແລະ ບັນດາອົງການຈັດຕັ້ງມະຫາຊົນ.
– ແນວລາວສ້າງຊາດ: ສຶກສາອົບຮົມໃຫ້ບັນດາເຜົ່າເຫັນແຈ້ງ ກົນອຸບາຍແບ່ງແຍກຂອງກຸ່ມຄົນບໍ່ດີ, ເຕົ້າໂຮມຄວາມສາມັກຄີເປັນອັນຫນຶ່ງອັນດຽວຢູ່ອ້ອມຂ້າງພັກ – ລັດ ປະຕິບັດຫນ້າທີ່ ແລະ ພັນທະໃຫ້ແກ່ສັງຄົມ, ເອົາໃຈໃສ່ປະຕິບັດນະໂຍບາຍ ຕໍ່ເຈົ້າກົກເຈົ້າເຫຼົ່າ ຍົກສູງຊີວິດການເປັນຢູ່ທາງດ້ານວັດຖຸ ແລະ ຈິດໃຈທີ່ ຄັບແຄບຕີຕົວຕໍ່າ, ແນວຄິດທີ່ປະໝາດເຜົ່າອື່ນ, ຫຼີກເວັ້ນທີ່ສຸດການສ້າງຂໍ້ຂັດແຍ້ງທີ່ຮ້າຍແຮງເຊິ່ງນໍາໄປສູ່ຄວາມວຸ້ນວາຍເຊື່ອມເສຍ, ປະຕິບັດນະໂຍບາຍອັນຖືກຕ້ອງ ກ່ຽວກັບວຽກງານສາສະຫນາ, ໂດຍສະເພາະຕໍ່ສາສະຫນາທີ່ມີບົດບາດ ປະກອບສ່ວນສໍາຄັນໃນພາລະກິດປົດປ່ອຍຊາດ, ປົກປັກຮັກສາ ແລະ ສ້າງສາປະເທດຊາດ. ເຄົາລົບສິດເສລີພາບໃນການ ເຊື່ອຖື ຫຼື ບໍ່ເຊື່ອຖືສາສະຫນາຂອງພົນລະເມືອງ, ແຕ່ພ້ອມກັນນັ້ນ ຕ້ອງເດັດດ່ຽວບໍ່ອະນຸຍາດໃຫ້ມີການຊື້ຈ້າງຈອບອອຍ, ຍຸແຍ່ແບ່ງແຍກສາສະຫນາ.ປຸກລະດົມປະຊາຊົນບັນດາເຜົ່າ ແລະ ເຕົ້າໂຮມຄວາມສາມັກຄີທຸກຊັ້ນຄົນ, ເພດໄວ, ຊົນເຜົ່າ, ສາສະຫນາ, ໃນການປົກປັກຮັກສາ ແລະ ສ້າງປະເທດຊາດ ຕ້ານກົນອຸບາຍໂຄສະນາແບ່ງແຍກສັດຕູ.
– ສະຫະພັນກໍາມະບານ: ເຄື່ອນໄຫວເຕົ້າໂຮມ, ຈັດຕັ້ງ, ນໍາພາ ແລະ ປົກປ້ອງສິດຜົນປະໂຫຍດ ອັນຊອບທໍາຂອງກໍາ ມະກອນ ແລະ ຊາວຜູ້ອອກແຮງງານ, ຕັ້ງຫນ້າປະຕິບັດ 3 ພາລະບົດບາດ 5 ຫນ້າທີ່ ແລະ ຂໍ້ແຂ່ງຂັນໃຫ້ໄດ້ຮັບຜົນດີ.
– ຊາວຫນຸ່ມປະຊາຊົນ ປະຕິວັດລາວ: ຕ້ອງສ້າງໃຫ້ຊາວຫນຸ່ມເປັນກໍາລັງແຮງຂອງການປະຕິວັດ ການສຶກສາອົບຮົມຝຶກຝົນຫຼໍ່ຫຼອມໄວຫນຸ່ມ, ເຍົາວະຊົນ, ໃຫ້ມີແບບແຜນດໍາລົງຊີວິດຖືກຕ້ອງ, ຕັ້ງຫນ້າປະຕິບັດຂໍ້ແຂ່ງຂັນ 3 ສາມັກຄີ 4 ບຸກ ຂອງຊາວຫນຸ່ມ, 3 ດີ 4 ຮູ້ ແລະ 6 ຮັກ 3 ຊັງ ຂອງເຍົາວະຊົນໃຫ້ໄດ້ຮັບຜົນດີ, ຕັ້ງຫນ້າປັບປຸງກໍ່ສ້າງການຈັດຕັ້ງຊາວຫນຸ່ມ, ເຍົາວະຊົນໃຫ້ເຂັ້ມແຂງ.
– ສະຫະພັນແມ່ຍິງ: ສຶກສາອົບຮົມປົກປ້ອງສິດຜົນປະໂຫຍດອັນຊອບທໍາຂອງແມ່ ແລະ ເດັກ, ເອົາໃຈໃສ່ປະຕິບັດຄໍາ ຂວັນ 3 ດີ 2 ຫນ້າທີ່ຂອງແມ່ຍິງລາວວາງອອກໃຫ້ໄດ້ຮັບຜົນດີ.
– ວຽກງານກວດກາ: ດໍາເນີນການກວດກາເປັນປະຈໍາຕໍ່ການເຄື່ອນໄຫວຂອງອົງການພັກ, ບັນດາອົງການຈັດຕັ້ງ ມະຫາຊົນ, ຕະຫຼອດຮອດພະນັກງານ, ສະມາຊິກພັກຂັ້ນຕ່າງໆ.
ກວດກາຮອບດ້ານ ບົນພື້ນຖານຄວາມເປັນເອກະພາບຂອງອົງຄະນະພັກແຕ່ລະຂັ້ນ, ສາມາດເຕົ້າໂຮມຄວາມ ສາມັກຄີ ແລະ ກາຍເປັນກໍາລັງແຮງສັງລວມ ປະຕິບັດມະຕິຄໍາສັ່ງ, ລະບຽບກົດຫມາຍ ແລະ ແນວທາງນະໂຍບາຍຂອງພັກ, ການກວດຕ້ອງຕົວຈິງ, ມີຈຸດສຸມ, ສົ່ງເສີມຈຸດດີ ແລະ ແກ້ໄຂໃຫ້ຖືກຕ້ອງ.
– ວຽກງານກໍ່ສ້າງຮາກຖານ ແລະ ພັດທະນາຊົນນະບົດ: ຕ້ອງເຮັດຢ່າງມີຈຸດສຸມຮອບດ້ານ, ຕໍ່ເນື່ອງແຕ່ລະບາດກ້າວ, ເຮັດແຕ່ນ້ອຍຫາໃຫຍ່ ແຕ່ຕໍ່າຫາສູງ. ປັບປຸງການຈັດຕັ້ງຂັ້ນບ້ານ, ຫນ່ວຍປ້ອງກັນຄວາມສະຫງົບ, ກອງຫຼອນໃຫ້ທາງດ້ານ ການເມືອງ, ເປັນລະບຽບຮຽບຮ້ອຍທາງດ້ານສັງຄົມ, ເປັນເຈົ້າການຕ້ານທຸກກົນອຸບາຍມ້າງເພຂອງກຸ່ມຄົນບໍ່ດີ.
– ຕ້ອງເອົາວຽກງານກໍ່ສ້າງເສດຖະກິດ, ຂະຫຍາຍການຜະລິດສິນຄ້າ, ຕາຫນ່າງການສຶກສາ, ສາທາລະນະສຸກ, ວັດທະນະທໍາ-ສັງຄົມ, ແກ້ໄຂຊີວິດການເປັນຢູ່ ທາງດ້ານວັດຖຸ ແລະ ຈິດໃຈຂອງປະຊາຊົນບັນດາເຜົ່າໃຫ້ດີຂຶ້ນ ເທື່ອລະກ້າວ ສ້າງເງື່ອນໄຂ ແລະ ດໍາເນີນການສໍາຫຼວດ ເພື່ອພັດທະນາຮອບດ້ານຢູ່ເຂດເມືອງວຽທອງ, ເມືອງເຫືອງ ( ເມືອງບໍລິຄັນ ), ຫາດຊາຍຄໍາ ( ເມືອງປາກກະດິງ ). ສືບຕໍ່ໂຄງການພັດທະນາຊົນນະບົດເຂດຫຼັກ 20 ( ເມືອງຄໍາເກີດ ), ໂດຍສົມທົບ ລະຫວ່າງເມືອງ ແຂວງ ກັບສູນກາງ.
– ວຽກງານອໍານາດການປົກຄອງ: ປັບປຸງກົງຈັກລັດ ບໍລິຫານຕາມສາຍຕັ້ງ ໃຫ້ສົມເຫດສົມຜົນຕາມທິດກະທັດຮັດ ແຕ່ຮັບປະກັນປະສິດຕິພາບຂອງວຽກງານ ຕັ້ງຫນ້າປະຕິບັດການພົວພັນລະຫວ່າງ ສາຍຕັ້ງ-ສາຍຂວາງ ຕາມຂໍ້ກໍານົດເລກທີ 21 ຂອງກົມການເມືອງ, ເຮັດໃຫ້ການປະສານງານລະຫວ່າງຂະແນງການປະສົມກົມກຽວກັນເປັນຢ່າງດີ, ຄະນະພັກທຸກຂັ້ນຕ້ອງເພີ່ມທະວີການນໍາພາ ແລະ ປັບປຸງກົງຈັກແບບແຜນວິທີເຮັດວຽກຂອງລະບົບຍຸຕິທໍາ, ອົງການໄອຍະການ, ເຈົ້າຫນ້າທີ່ກອງຄະດີ ແລະ ສານປະຊາຊົນຂັ້ນຕ່າງໆ, ສືບຕໍ່ປັບປຸງ ແລະ ສ້າງຕັ້ງຫນ່ວຍໄກ່ເກ່ຍປະຈໍາບ້ານ ຂຶ້ນເພື່ອເຮັດໃຫ້ອົງການຈັດຕັ້ງດັ່ງກ່າວກາຍເປັນຜູ້ປະຕິບັດກົດຫມາຍ ວ່າດ້ວຍຄວາມຍຸຕິທໍາ-ສັງຄົມ, ຊຸກຍູ້ອໍານວຍຄວາມສະດວກ ໃຫ້ສະມາຊິກສະພາແຫ່ງຊາດເຄື່ອນໄຫວວຽກງານຢ່າງເຕັມເມັດເຕັມຫນ່ວຍ ຕາມພາລະບົດບາດຂອງຕົນ.
Users Today : 470
Users Yesterday : 748
This Month : 3178
This Year : 52826
Total Users : 439050
Who's Online : 10