66 ປີ ມີໄຊ ບໍລິຄຳໄຊ ໃຕ້ຮົ່ມທຸງຂອງພັກ

ໃນວັນທີ 22 ມີນາ 2021 ຢູ່ສະໂມສອນໃຫຍ່ຂອງແຂວງ ໄດ້ມີພິທີປາຖະກະຖາວັນສ້າງຕັ້ງພັກປະຊາຊົນປະຕິວັດລາວ ( 22 ມີນາ 1955 – 22 ມີນາ 2021 ) ແລະ ວັນຄຽດແຄ້ນຂອງປະຊາຊົນລາວ ຄົບຮອບ 75 ປີ ( 21 ມີນາ 1946 – 21 ມີນາ 2021 ) ໃຫ້ກຽດປາຖະກະຖາຫວນຄືນມູນເຊື້ອໂດຍ ທ່ານ ວັນວິໄລ ແດນພູຫຼວງ ຮອງເລຂາພັກແຂວງ, ມີບັນດາພະແນກການອ້ອມຂ້າງແຂວງ, ຫ້ອງການ, ພະນັກງານອາວຸໂສບໍານານ, ນາຍ ແລະ ພົນທະຫານ- ນາຍ ແລະ ພົນຕຳຫລວດ ແລະ ພະນັກງານລັດຖະກອນເຂົ້າຮ່ວມ.

ໃນປີ 1893 ພວກລ່າເມືອງຂຶ້່ນຝຣັ່ງ ໄດ້ເຂົ້າມາຍຶດຄອງລາວເປັນຫົວເມືອງຂຶ້ນ, ປະຊາຊົນລາວຖືກກົດຂີ່ຂຸດຮີດຢ່າງໜັກໜ່ວງ ແລະ ປ່າເຖື່ອນ, ເພື່ອນຳພາຂະບວນຕໍ່ສູ້ຂອງປະຊາຊົນສາມຊາດອິນດູຈີນ ຕໍ່ສູ້ຕີເອົາຊະນະຈັກກະພັດຕ່າງດ້າວຜູ້ຮຸກຮານ ໃນປີ 1930 ທ່ານປະທານ ໂຮ່ຈິມິນ ໄດ້ສ້າງຕັ້ງພັກກອມມູນິດອິນດູຈີນຂຶ້ນ ແລະ ມາຮອດປີ 1934 ອົງຄະນະພັກແຄ້ວນລາວ ກໍ່ໄດ້ຮັບການສ້າງຕັ້ງຂຶ້ນ.

ເມື່ອມີພັກນໍາພາ ການຕໍ່ສູ້ຂອງຂອງປະຊາຊົນ ນັບມື້ນັບໄດ້ຮັບໄຊຊະນະເປັນກ້າວໆ ພັກເຮົາໄດ້ເດັດດ່ຽວນຳພາປວງຊົນລຸກຮື້ຂຶ້ນຍຶດອຳນາດ, ປະກາດຄວາມເປັນເອກະລາດຂອງປະເທດລາວ ຕໍ່ໂລກເມື່ອວັນທີ 12 ຕຸລາ 1945.

ຫຼັງຈາກນັ້ນ ກອງທັບປະຊາຊົນລາວກໍ່ໄດ້ຮັບການສ້າງຕັ້ງຂຶ້ນໃນວັນທີ 20 ມັງກອນ 1949 ແລະ ສ້າງຕັ້ງແນວລາວອິດສະຫຼະຂຶ້ນໃນວັນທີ 13 ສິງຫາ 1950, ຕໍ່ກັບຄວາມຮຽກງຮ້ອງຕ້ອງການໃນໄລຍະໃໝ່ຂອງການປະຕິວັດ ແລະ ມະຕິກອງປະຊຸມໃຫ່ຍ ຄັ້ງທີ II ຂອງພັກກອມມູນິດອິນດູຈີນ ປີ 1951 ບັນດາສະມາຊິກພັກກອມມູນິດທີ່ເປັນຄົນລາວ ໄດ້ຈັດຕັ້ງຄະນະກໍາມະການປະຊາຊົນລາວຂຶ້ນ ເພື່ອສືບຕໍ່ນໍາພາການປະຕິວັດລາວ ແລະ ໃນວັນທີ 22 ມີນາ 1955 ໄດ້ດຳເນີນກອງປະຊຸມໃຫ່ຍຄັ້ງທີ I ຂອງຕົນຂຶ້ນ ທີ່ບ້ານນາແມວ ເມືອງວຽງໄຊ ແຂວງຫົວພັນ ແລະ ໄດ້ເອີ້ນຊື່ວ່າ “ພັກປະຊາຊົນລາວ” ໂດຍແມ່ນທ່ານປະທານ ໄກສອນ ພົມວິຫານ ເປັນເລຂາຄະນະຊີ້ນຳສູນກາງ, ເປັນເລຂາຄະນະພັກທະຫານສູນກາງ-ທັງເປັນຜູ້ບັນຊາການສູງສຸດ ກຳລັງປະກອບອາວຸດປະຊາຊົນລາວ. ມາຮອດວັນທີ 3 ກຸມພາ 1972 ກອງປະຊຸມໃຫຍ່ຂອງພັກຄັ້ງທີ II ໄດ້ຕົກລົງປ່ຽນຊື່ “ພັກປະຊາຊົນລາວ” ເປັນ “ພັກປະຊາຊົນປະຕິວັດລາວ”.

ຍ້ອນມີການຊີ້ນໍາ-ນຳພາ ອັນສະຫຼາດສ່ອງໃສພາຍໃຕ້ຄັນທຸງຂອງພັກ ໄດ້ນຳພາປວງຊົນລາວທັງຊາດ ລຸກຮື້ຂຶ້ນຢຶດອຳນາດດ້ວຍ 3 ບາດຄ້ອນຍຸດທະສາດ ໂດຍບໍ່ເສຍເລືອດເນື້ອ “ບົວບໍ່ຊ້ຳ-ນ້ຳບໍ່ຂຸ່ນ” ແລະ ປະກາດສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງເປັນທ່າງການ ໃນວັນທີ 2 ທັນວາ 1975.

ນອກຈາກນັ້ນ ທ່ານປະທານ ຍັງໄດ້ລະນຶກຫວນຄືນມູນເຊຶ້ອຂອງວັນທີ 21 ມີນາ 1946 ໃນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ອັນພິລະອາດຫານ ແລະ ຍອມເສຍສະລະບໍ່ຍອມຈຳນົນ ຂອງໜ່ວຍພັກ, ທະຫານ ແລະ ປະຊາຊົນຢູ່ເມືອງທ່າແຂກ ເພື່ອປົກປ້ອງຊາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຕົນ ຈົນໄດ້ຈາລຶກໄວ້ໃນປະຫວັດສາດຂອງຊາດ ແລະ ຖືເອົາວັນດັ່ງກ່າວ ເປັນ “ວັນເສຍອົງຄະ ແລະ ເສຍສະຫຼະຊີວິດເພຶ່ອຊາດ” (ວັນຄຽດແຄ້ນຂອງປະຊາຊົນລາວ).

• Facebook
• Twitter
• Line