ວຽກງານພິສູດຫຼັກຖານອອກໃບຕາດິນແບບເປັນລະບົບ ຢູ່ບ້ານນານ້ຳ

ເພື່ອເຮັດໃຫ້ການສຳຫລວດ ແລະ ອອກໃບຕາດິນ ແບບເປັນລະບົບ ໄດ້ຮັບການຈັດຕັ້ງດ້ວຍຜົນສຳເລັດສູງ ໃນຕອນເຊົ້າວັນທີ 3 ມີນາ 2021 ຢູ່ທີ່ອາຣາມວັດຂອງບ້ານນານ້ຳ ເມືອງປາກກະດິງ ແຂວງບໍລິຄຳໄຊ ໄດ້ເປີດພິທີ ການຂຶ້ນທະບຽນທີ່ດິນ ໂດຍເປັນກຽດເຂົ້າຮ່ວມຂອງ ທ່ານ ພົງສະຫວັດ ຄຳສຸກຖາວົງ ຮອງເຈົ້າເມືອງປາກກະດິງ.

ໃນພິທີ ໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຊີ້ນຳ ແລະ ວິຊາການໃນການຂື້ນທະບຽນທີ່ດິນປີ 2021 ແລະ ໄດ້ສະເໜີຫຍໍ້ບົດບາດຍິງ-ຊາຍໃນການເກີດສິດນຳໃຊ້ທີດິນ, ເຜີຍແຜ່ກົດໝາຍບາງມາດຕາວ່າດ້ວຍທີ່ດິນ-ທາງຫຼວງແຫ່ງຊາດ ແລະ ສະເໜີຫຍໍ້ຂັ້ນຕອນການເດີນສຳຫຼວດພິສູດຫຼັກຖານອອກໃບຕາດິນ.

ພ້ອມນີ້ ໄດ້ເປີດໂອກາດໃຫ້ພໍ່ແມ່ປະຊາຊົນຊັກຖາມຂໍ້ຂ້ອງໃຈ ໂດຍແນໃສ່ໃຫ້ປະຊາຊົນຮັບຮູ້-ເຂົ້າໃຈເລິກເຊີ່ງກ່ຽວກັບຄວາມໝາຍຄວາມສຳຄັນຂອງການອອກໃບຕາດິນແບບເປັນລະບົບ ຫຼື ໃບຕາດິນຂອບທອງ ແລະ ເພື່ອໃຫ້ການຈັບຈອງນຳໃຊ້ທີ່ດິນຂອງປະຊາຊົນຖືກຕ້ອງ ແລະ ສອດຄ່ອງກັບລະບຽບກົດໝາຍ, ທັງຮັບປະກັນໃຫ້ວຽກງານດັ່ງກ່າວນັ້ນບັນລຸຕາມແຜນພາຍໃນ 5 ເດືອນ ເຊີ່ງມີດິນກະສິກຳ 422 ຕອນ ແລະ ດິນປຸກສ້າງ 23 ຮຕ.

• Facebook
• Twitter
• Line