ປີ 2020 ພະແນກ ຊສ ແຂວງ ສາມາດອອກໃບຕາດິນໄດ້ 5 ພັນກວ່າຕອນ

ກອງປະຊຸມແລກປ່ຽນ ແລະ ຖອດຖອນບົດຮຽນ ພາຍໃນຂົງເຂດຊັບພະຍາກອນທຳມະຊາດ ແລະ ສິ່ງແວດລ້ອມ ປະຈຳປີ 2020 ໄດ້ຈັດຂຶ້ນໃນຕອນເຊົ້າຂອງວັນທີ 2 ມີນາ 2021 ຢູ່ຫ້ອງປະຊຸມຂອງພະແນກ ຊສ ແຂວງ ໂດຍການເປັນປະທານຂອງທ່ານ ສົມສະຫງວນ ສຸວັນນະລາດ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ມີຄະນະພະແນກ, ຫົວໜ້າຂະແໜງ-ຮອງຂະແໜງ, ຫົວໜ້າຫ້ອງການ ຊສ ຈາກບັນດາເມືອງພາຍໃນແຂວງ ແລະ ພະນັກງານວິຊາການພາຍໃນພະແນກ ເຂົ້າຮ່ວມ.

ກອງປະຊຸມ ໄດ້ຮັບຟັງການຜ່ານບົດລາຍງານໃນການປະຕິບັດວຽກງານໃນໄລຍະ 1 ປີຜ່ານມາວ່າ: ພະແນກ ຊສ ແຂວງ ປະກອບມີ 7 ຫ້ອງການ ຊສ ເມືອງ ແລະ 8 ຂະແໜງການຢູ່ຂັ້ນແຂວງ ມີພະນັກງານລັດຖະກອນທັງໝົດ 185 ຄົນ ຍິງ 49 ຄົນ.

ການເຄື່ອນໄຫວດ້ານວິຊາການ ໄດ້ສໍາເລັດການຮັບຮອງແຜນຈັດສັນທີ່ດິນ, ຄຸ້ມຊັບພະຍາກອນທຳມະຊາດ ແລະ ສິ່ງແວດລ້ອມຮອບດ້ານຂອງແຂວງ, ແກ້ໄຂການຮ້ອງຟ້ອງຈາກສັງຄົມດ້ານສິ່ງແວດລ້ອມ, ທີ່ດິນ ແລະ ອື່ນໆ 50 ກວ່າເລື່ອງ, ພົບເຫັນການຊື້-ຂາຍດິນບໍ່ຖືກຕ້ອງ ແລະ ໄດ້ຢຶດມາເປັນຂອງລັດຄືນປະມານ 538 ເຮັກຕາ ພ້ອມທັງປັບໄໝເປັນເງິນ 300 ລ້ານກີບ ໃນ 3 ບ້ານຂອງເມືອງບໍລິຄັນ, ຕິດຕາມກວດກາ ອອກ ແລະ ຕໍ່ໃບອະນຸຍາດສິ່ງແວດລ້ອມໃນທົ່ວແຂວງ ໄດ້ 500 ຫົວໜ່ວຍ ເທົ່າກັບ 80%, ສັ່ງໂຈະ ແລະ ເຕືອນໂຮງງານທີ່ມີຄວາມສ່ຽງ ຄວາມຜິດຈຳນວນໜຶ່ງ, ກວດກາຄຸນນະພາບນ້ຳ 21 ຈຸດ ລວມ 48 ຄັ້ງ, ເອົາໃຈໃສ່ຄຸ້ມຄອງບັນດາອ່າງນ້ຳ ສາຂາຕ່າງໆ 329 ອ່າງໃນທົ່ວແຂວງ, ສາມາດອອກໃບຕາດິນໄດ້ 5.428 ຕອນ ເທົ່າກັບ 108,56%, ຂຶ້ນສໍາມະໂນຄົວທີ່ດິນໄດ້ 6.661 ຕອນ ເທົ່າກັບ 111% ແລະ ສໍາຫຼວດດິນເພື່ອຮອງຮັບແກ່ການລົງທຶນໄດ້ປະມານ 200 ເຮັກຕາ.

ສຳລັບທິດທາງແຜນການໃນ 1 ປີຕໍ່ໜ້າ ຫັນເອົາແຜນການ 5 ປີ ຜັນຂະຫຍາຍເປັນແຜນປີ 2021 ແລ້ວຜັນຂະຫຍາຍມາເປັນແຜນລະອຽດ ເພື່ອຈັດຕັ້ງປະຕິບັດເຂົ້າສູ່ວຽກງານຕົວຈິງ, ເອົາວຽກງານກວດກາເປັນວຽກງານຕົ້ນຕໍ ແລະ ຍົກລະດັບຄວາມຮູ້ຄວາມສາມາດ, ຝຶກອົບຮົມ, ແລກປ່ຽນບົດຮຽນເປັນອັນສຳຄັນ, ສືບຕໍ່ອອກໃບຕາດິນໃຫ້ໄດ້ 4.528 ຕອນ, ຂຶ້ນສໍາມະໂນທີ່ດິນໃຫ້ໄດ້ 2.927 ຕອນ, ອອກ-ຕໍ່ໃບອະນຸຍາດທົ່ວແຂວງໃຫ້ໄດ້ 120 ຫົວໜ່ວຍ, ສຸມໃສ່ການແກ້ໄຂປະກົດການຫຍໍ້ທໍ້ຕ່າງໆ ເຊັ່ນ: ດິນ, ສິ່ງແວດລ້ອມ, ນ້ຳ ແລະ ວຽກງານອື່ນໆທີ່ຂຶ້ນກັບພະແນກ.

• Facebook
• Twitter
• Line