ມາຮອດປະຈຸບັນ ເມືອງປາກຊັນ ແຂວງບໍລິຄຳໄຊ ແມ່ນມີຄວາມພ້ອມ ໃຫ້ແກ່ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງຊຸດທີ II ໃນວັນທີ 21 ກຸມພາ 2021 ທີ່ໃກ້ຈະມາເຖິງນີ້ ທ່ານ ໄມຈອມ ວັນນະສານຄຳ ເຈົ້າເມືອງປາກຊັນໄດ້ໃຫ້ສຳພາດຕໍ່ສື່ມວນຊົນ ໃນວັນທີ 16 ກຸມພາ 2021.
ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ເປັນການສືບຕໍ່ສ້າງ ແລະ ບູລະນະລັດປະຊາທິປະໄຕປະຊາຊົນ ໃຫ້ມີຄວາມໜັກແໜ້ນ ແລະ ເຂັ້ມແຂງ, ເສີມຂະຫຍາຍສິດປະຊາທິປະໄຕ ສິດເປັນເຈົ້າຂອງປະຊາຊົນລາວບັນດາເຜົ່າ ເຂົ້າໃນການເລືອກຕັ້ງເອົາຕົວແທນແຫ່ງສິດ ແລະ ຜົນປະໂຫຍດຂອງຕົນ ເຂົ້າໃນອຳນາດລັດຢູ່ຂັ້ນສູນກາງ ແລະ ທ້ອງຖີ່ນ ຜ່ານມາຄະນະກຳມະການປ່ອນບັດເລືອກຕັ້ງຂັ້ນເມືອງ ໄດ້ອອກຂໍ້ຕົກລົງແຕ່ງຕັ້ງອະນຸກຳມະການຕ່າງໆ ພ້ອມທັງກຳນົດສິດ, ພາລະບົດບາດ ແລະ ໜ້າທີ່, ອອກແຈ້ງການ ແລະ ປະສານສົມທົບກັບພາກສ່ວນກ່ຽວຂ້ອງ ລະຫວ່າງຂັ້ນແຂວງ-ຂັ້ນເມືອງ ກຳນົດແຜນດຳເນີນງານ ພ້ອມທັງນຳເອົາເອກະສານສຳຄັນຕ່າງໆ ລົງເຜີຍແຜ່ສູ່ປະຊາຊົນຢູ່ບັນດາຮາກຖານບ້ານຢ່າງທົ່ວເຖິງ. ພ້ອມກັນສ້າງຂະບວນການອະນາໄມ, ປະດັບປະດາ ໃຫ້ມີຄວາມເປັນລະບຽບຮຽບຮ້ອຍ ແລະ ສະອາດຈົບງາມ, ສູມໃສ່ວຽກງານປ້ອງກັນຊາດ-ປ້ອງກັນຄວາມສະງົບ ຄວາມເປັນລະບຽບຮຽບຮ້ອຍ ຢ່າງຕໍ່ເນື່ອງ, ສ້າງເງື່ອນໄຂ ອຳນວຍຄວາມສະດວກໃຫ້ຜູ້ສະມັກຮັບເລືອກຕັ້ງລົງໂຄສະນາ ພົບປະໂອ້ລົມປະຊາຊົນບັນດາເຜົ່າ ເພື່ອຫາສຽງສະໜັບສະໜູນຕາມຈຸດຕ່າງໆ. ທົວເມືອງປາກຊັນ ປະກອບມີ 54 ບ້ານ, 32 ໜ່ວຍປ່ອນບັດ, ມີຜູ້ມີສິດປ່ອນບັດທັງໝົດ 28.000 ກ່ວາຄົນ, ຍິງ 15.000 ກ່ວາຄົນ ແລະ ມີຜູ້ລົງສະມັກເລືອກຕັ້ງທັງໝົດ 6 ທ່ານ, ຍິງ 2 ທ່ານ ໃນນັ້ນຈະໄດ້ປ່ອນບັດເອົາ 4 ທ່ານ.
ໂອກາດນີ້ ທ່ານເຈົ້າເມືອງຍັງໄດ້ຮຽກຮ້ອງມາຍັງປະຊາຊົນທຸກທົ່ວໜ້າ ແລະ ຜູ້ທີມີສິດປ່ອນບັດເລືອກຕັ້ງທັງໝົດ ໃຫ້ມີຄວາມຮັບຜິດຊອບ ໂດຍອອກໄປໃຊ້ສິດປະຊາທີປະໄຕຂອງຕົນ ເຂົ້າໃນການເລືອກຕັ້ງ ໃຫ້ບັນລຸ 100%, ພ້ອມກັນເຮັດໜ້າທີ່ວຽກງານ ປກຊ-ປກສ ທົ່ວປວງຊົນຮອບດ້ານ ໃຫ້ໄດ້ 100% ແລະ ຮັບປະກັນບໍ່ໃຫ້ມີບັດເສຍ-ບັດຕາຍ 100%.
Users Today : 429
Users Yesterday : 494
This Month : 8270
This Year : 128307
Total Users : 514531
Who's Online : 8