ກອງປະຊຸມສະຫຼຸບວຽກງານປະຈຳປີ 2020 ແລະ ທິດທາງແຜນການ ປີ 2021 ຂອງບໍລິສັດລາວໂທລະຄົມມະນາຄົມ ມະຫາຊົນ ສາຂາແຂວງບໍລິຄຳໄຊ ໄດ້ຈັດຂຶ້ນໃນວັນທີ 12 ກຸມພາ 2021 ຢູ່ຫ້ອງປະຊຸມຂອງຕົນ ໂດຍການເຂົ້າຮ່ວມເປັນປະທານຂອງທ່ານ ຫົງວິໄລ ຈຸນລະມຸນຕີ ອຳນວຍການ ບໍລິສັດ ລາວໂທລະຄົມມະນາຄົມ ມະຫາຊົນ ສາຂາແຂວງບໍລິຄຳໄຊ, ມີຫົວໜ້າ, ຮອງຫົວໜ້າຂະແໜງ, ພະນັກງານວິຊາການພາຍໃນບໍລິສັດ ແລະ ແຂກຖືກເຊີນ ເຂົ້່າຮ່ວມ.
ບໍລິສັດ ລລທ ສາຂາແຂວງບໍລິຄຳໄຊ ປະກອບມີ 4 ພາກສ່ວນ, 4 ສູນ, 28 ໜ່ວຍງານ ແລະ 3 ປ່ອງບໍລິການຄື: ທາງແບ່ງວຽງຄຳ, ວຽງທອງ ແລະ ໄຊຈຳພອນ ມີພະນັກງານທັງໝົດ 75 ຄົນ ຍິງ 25 ຄົນ ມີສະມາຊິກພັກທັງໝົດ 34 ສະຫາຍ ຍິງ 12 ສະຫາຍ, ຄະນະອໍານວຍການ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນວຽກງານບູລິມະສິດອັນດັບໜຶ່ງ ທີ່ສອດຫ້ອຍກັບການດຳເນີນທຸລະກິດພາຍໃນຂອງຕົນ ເຊິ່ງສະແດງອອກ ຄື: ຈັດຕັ້ງເຜີຍແຜ່ບັນດາມະຕິ, ຄຳສັ່ງ, ກົດໝາຍຂອງລັດ, ຟັງປາຖະກະຖາມູນເຊື້ອຂອງພັກ, ຂອງຊາດ ທີ່ແຂວງຈັດຂຶ້ນໄດ້ 27 ຄັ້ງ ມີ 98 ເທື່ອຄົນ, ເຂົ້າຮ່ວມປະຊຸມຢູ່ແຂວງ 36 ຄັ້ງ 88 ເທື່ອຄົນ.
ພາຍໃນແຂວງບໍລິຄໍາໄຊ ມີສະຖານີ 2G ຈຳນວນ 127 ແຫ່ງ, 3G ຈຳນວນ 188 ແຫ່ງ ແລະ 4G ຈຳນວນ 163 ແຫ່ງ, ປີ 2020 ສາມາດຈຳໜ່າຍບັດເຕີມເງິນ 86.809.585.000 ກີບ ເທົ່າກັບ 100%, ຂາຍເບີ ເອັມໂຟນໄດ້ 12.194 ເບີ ເທົ່າກັບ 97%, ເບີຊິມເນັດ 28.173 ເບີ ແລະ ໂທລະສັບ ວິນໂຟນ 2.234 ໜ່ວຍ, ການຂຶ້ນທະບຽນ 3 ແກັບ ສໍາເລັດແລ້ວ 51.965 ເບີ ເທົ່າກັບ 33,41%, ການຂຶ້ນທະບຽນ M-Money 954 ເທົ່າກັບ 38,75%, ສະເລ່ຍໃສ່ລູກຄ້ານໍາໃຊ້ ເທົ່າກັບ 84,75% ໃນທົ່ວແຂວງ.
ຈາກນັ້ນ ຍັງໄດ້ຮັບຟັງການລາຍງານບັນຫາພົ້ນເດັ່ນ ຈາກປ່ອງບໍລິການລູກຄ້າແຕ່ລະເຂດ ແລະ ຂະແໜງການ ພ້ອມທັງປຶກສາຫາລື ໃນການແກ້ໄຂບັນຫາທີ່ຍັງຄົງຄ້າງ ເພື່ອຈະໄດ້ພ້ອມກັນແກ້ໄຂໃນຕໍ່ໜ້າ.
ໃນຕອນທ້າຍຂອງກອງປະຊຸມ ຍັງໄດ້ມອບໃບຍ້ອງຍໍຂອງທ່ານເຈົ້າແຂວງ ແລະ ອຳນວຍການບໍລິສັດ ໃຫ້ພະນັກງານທີ່ມີຜົນງານໃນການປະຕິບັດໜ້າທີ່ວຽກງານໃນໄລະຍະ 1 ປີຜ່ານມາ.
Users Today : 718
Users Yesterday : 1225
This Month : 9784
This Year : 129821
Total Users : 516045
Who's Online : 14