ພິທີເປີດງານ ” ຄຳເກີດເກມ ” ຄັ້ງທີ 7

 

ໃນຕອນບ່າຍຂອງວັນທີ 27 ມັງກອນ 2021 ທີ່ເດີ່ນໂຮງຮຽນສາມັນກິນນອນຊົນເຜົ່າ ເມືອງຄຳເກີດ ແຂວງບໍລິຄຳໄຊ ໄດ້ຈັດພິທີເປີດງານແຂ່ງຂັນກິລາ-ສິລະປະນັກຮຽນທົ່ວເມືອງ ຄັ້ງທີ່ 7 ໂດຍໃຫ້ກຽດເຂົ້າຮ່ວມເປີດພິທີຂອງທ່ານ ເພັດສະໃໝ ໄຊຍະທິຈັກ ເຈົ້າເມືອງຄໍາເກີດ.

ທ່ານ ເຢີວື່ ຈົ່ງຕູ້ ອໍານວຍການໂຮງຮຽນສາມັນກິນນອນຊົນເຜົ່າ ໄດ້ຂຶ້ນລາຍງານການກະກຽມງານແຂ່ງຂັນກິລາ-ສິລະປະນັກຮຽນທົ່ວເມືອງ ຄັ້ງທີ່ 7 ທີ່ໂຮງຮຽນສາມັນກິນນອນຊົນເຜົ່າເປັນເຈົ້າພາບ ທ່ານກ່າວວ່າ: ຫ້ອງການສຶກສາທິການ ແລະ ກິລາ ພ້ອມດ້ວຍໂຮງຮຽນສາມັນກິນນອນຊົນເຜົ່າ ໄດ້ສົມທົບທຶນກັນໃນການສ້ອມແປງ, ປັບປຸງເດີ່ນ, ຫ້ອງຮຽນເພື່ອເປັນທີ່ພັກອາໃສໃຫ້ແກ່ການນໍາ, ຄູຝຶກ ແລະ ນັກກິລາທີ່ມາຈາກໂຮງຮຽນ ແລະ ກຸ່ມໂຮງຮຽນ ໃນນັ້ນ ມີກຸ່ມໂຮງຮຽນປະຖົມ 9 ກຸ່ມ, ມັດທະຍົມຕົ້ນ 8 ແຫ່ງ ແລະ ມສ 7 ແຫ່ງ ເຂົ້າຮ່ວມ, ມີການນໍາ, ຄູຝຶກ ແລະ ນັກກິລາເຂົ້າຮ່ວມໃນຄັ້ງນີ້ 1.400 ກ່ວາຄົນ ເຊິ່ງຈະໄດ້ແຂ່ງຂັນ 7 ປະເພດກິລາ, ມີ 48 ລາຍການ ຄື: ແລ່ນ-ລານ 30 ລາຍການ, ບານເຕະ 3 ລາຍການ, ບານສົ່ງ 4 ລາຍການ, ເປຕັງ 4 ລາຍການ, ກະຕໍ້ 5 ລາຍການ, ໜ້າເກັກ 1 ລາຍການ ແລະ ໝາກຂ່າງ 1 ລາຍການ, ກິລາແຕ່ລະປະເພດ ແມ່ນແຂ່ງຢູ່ເດີ່ນໂຮງຮຽນສາມັນກິນນອນຊົນເຜົ່າທັງໝົດ ແລະ ຈະໄດ້ນໍາໃຊ້ຫຼຽນທັງໝົດ 678 ຫຼຽນ ໃນນັ້ນ ຫຼຽນຄໍາ 226 ຫຼຽນ, ຫຼຽນເງິນ 226 ຫຼຽນ ແລະ ຫຼຽນທອງແດງ 226 ຫຼຽນ.

ການແຂ່ງຂັນສິລະປະ-ວັນນະຄະດີ ມີການແຂ່ງຂັນ 3 ລາຍການ ຄື: ຟ້ອນ, ລໍາ ແລະ ຮ້ອງ ເພງ ເຊິ່ງມີຈໍານວນຜູ້ເຂົ້າຮ່ວມ 253 ຄົນ ລາຍການແຂ່ງຂັນທັງໝົດມີ 44 ລາຍການ.

ຈາກນັ້ນ ທ່ານ ຜາສຸກ ຈູມມາລາວົງ ຮອງເຈົ້າເມືອງຄໍາເກີດ ປະທານຈັດການແຂ່ງຂັນໃນຄັ້ງນີ້ ໄດ້ກ່າວເປີດພິທີຢ່າງເປັນທາງການ ພ້ອມນັ້ນ ທ່ານ ເພັດສະໃໝ ໄຊຍະທິຈັກ ເລຂາພັກເມືອງ ເຈົ້າເມືອງຄໍາເກີດ ປະທານກິຕິມະສັກໃນການຈັດການແຂ່ງຂັນ ພ້ອມດ້ວຍຄະນະປະທານ ໄດ້ອອກໄປລັ່ນຄ້ອງ 9 ບາດ ແລະ ປ່ອຍແຜ່ນປ້າຍພິທີ ເພື່ອເປີດງານແຂ່ງຂັນກິລາ-ສິລະປະນັກຮຽນທົ່ວເມືອງຄັ້ງທີ່ 7 ທີ່ໂຮງຮຽນສາມັນກິນນອນຊົນເຜົ່າເປັນເຈົ້າພາບ ຫຼື ຄໍາເກີດເກມ ຢ່າງເປັນທາງການ.

• Facebook
• Twitter
• Line