ສຶກສາທິການ ແລະ ກິລາ ເມືອງວຽງທອງ ສອບເສັງຄັດເລືອກນັກຮຽນເກັ່ງ

  

ໃນຕອນເຊົ້າຂອງວັນທີ 15 ມັງກອນ 2021 ຢູ່ຫ້ອງປະຊຸມຊັ້ນ III ຫ້ອງວ່າການເມືອງວຽງທອງ, ແຂວງບໍລິຄໍາໄຊ ຫ້ອງການສືກສາທິການ ແລະ ກິລາເມືອງ ໄດ້ຈັດພິທີສອບເສັງຄັດເລືອກນັກຮຽນເກັ່ງ ຊັ້ນ ປ5, ມ4 ແລະ ມ7 ທົ່ວເມືອງວຽງທອງ ປະຈໍາສົກຮຽນ 2020-2021 ໂດຍເປັນກຽດເຂົ້າຮ່ວມຂອງ ທ່ານ ບົວພັນ ອິນຄໍາມະວົງ ຮອງເຈົ້າເມືອງວຽງທອງ, ທ່ານ ອາຈານ ປະນົມໄພ ຈັນທະວົງ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ມີພະນັກງານຫ້ອງການສຶກສາ, ຄະນະຮັບຜິດຊອບ, ຄູອາຈານ ແລະ ນ້ອງນັກຮຽນ ເຂົ້າຮ່ວມ.

ໃນພິທີ ໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບບັ້ນສອບເສັງຄັດເລືອກນັກຮຽນເກັ່ງຊັ້ນ ປໍ 5, ມໍ 4 ແລະ ມໍ 7 ທົ່ວເມືອງເພື່ອໄປເສັງຂັ້ນແຂວງ, ພ້ອມທັງຜ່ານກົດລະບຽບໃນການສອບເສັງ.

ທົ່ວເມືອງມີນັກຮຽນປະຖົມຊັ້ນ ປ5 ມາຈາກໂຮງຮຽນ 7 ເຂດບໍລິຫານ – ການສຶກສາ, ໃນນັ້ນ ມີນັກສອບທັງໝົດ 21 ນ້ອງ, ຍິງ 9 ນ້ອງ, ຊັ້ນມັດທະຍົມມີທັງໝົດ 6 ແຫ່ງ, ມີໂຮງຮຽນມັດທະຍົມສົມບູນ 2 ແຫ່ງ ແລະ ມັດທະຍົມຕົ້ນ 4 ແຫ່ງ, ມີນັກຮຽນຊັ້ນ ມ4 ເຂົ້າສອບເສັງ 24 ນ້ອງ ຍີງ 10 ນ້ອງ ແລະ ຊັ້ນ ມ7 ມີນັກສອບເສັງ 8 ນ້ອງ, ຍິງ 1 ນ້ອງ, ວິຊາທີ່ເອົາເຂົ້າສອບເສັງຄັ້ງນີ້ ຊັ້ນ ປ5 ມີ 3 ວິຊາ ຄື: ວິຊາພາສາລາວ, ຄະນິດສາດ, ໂລກອ້ອມຕົວ, ຊັ້ນ ມໍ 4 ແລະ ມໍ 7 ມີ 4 ວິຊາ ຄື: ວິຊາພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ເຄມີສາດ.

ຜົນການສອບເສັ່ງ ຊັ້ນ ປ5 ທີ 1: ວິຊາພາສາລາວ ທ້າວ ທິນນະກອນ ຍອດວົງສາ ມາຈາກໂຮງຮຽນປະຖົມນໍ້າຢ້າງ, ວິຊາຄະນິດສາດ  ທ້າວ ເຢຢເລົ່າ ປະຖົມວັງພຽງ, ວິຊາໂລກອ້ອມຕົວ ທ້າວ ວິວ ວິລາວັນ ປະຖົມ ເມືອງມ່ວນ.

ຊັ້ນ ມໍ 4 ທີ 1: ວິຊາພະສາລາວ- ວັນນະຄະດີ ນາງ ພອນສຸດາ ແກ້ວອິນທໍາວົງ ມສ ວຽງທອງ, ວິຊາຄະນິດສາດ ທ້າວ ຈື່ຊົ່ງ ຢົ້ວກາວ ມໍຕົ້ນນໍ້າກ້າງ, ວິຊາເຄມີສາດ ທ້າວ ຈົວຢ່າງ ມສ ວຽງທອງ, ວິຊາຟີຊິກສາດ ທ້າວ ແກ້ງ ເຍ່ຍລໍ່ວ່າງ ມສ ວຽງທອງ.

ຜົນການສອບເສັງຊັ້ນ ມໍ 7 ທີ 1: ວິຊາພະສາລາວ-ວັນນະຄະດີ ທ້າວ ໄມສີ ຄໍາພູວົງ ມສ ຈອມທອງ, ວິຊາຄະນິດສາດ ທ້າວ ຕົ່ງຈົວຊົ່ງ ມ.ສ ຈອມທອງ, ວິຊາເຄມີສາດ ທ້າວ ກົວ ເຍ່ຍລໍວ່າງ ມສ ວຽງທອງ ແລະ ວິຊາຟີຊິກສາດ ທ້າວ ໄມແກ້ວ ຢົງວື່ຢ່າງ ມາຈາກ ມສ ວຽງທອງ.

ໃນພິທີ ຍັງໄດ້ມີການມອບຂອງຂວັນ, ໃບຍ້ອງຍໍ, ໃບຊົມເຊີຍ ໃຫ້ແກ່ນັກຮຽນຜູ້ທີ່ເສັງໄດ້ຄະແນນດີ ແລະ ຄູ ອາຈານ ຜູ້ທີສອນດີ, ສອນເກັ່ງ.

• Facebook
• Twitter
• Line