ເຂດເທດສະບານປາກຊັນ 1 ສະຫຼຸບວຽກງານກໍ່ສ້າງຮາກຖານການເມືອງ

  

ໃນຕອນເຊົ້າວັນທີ 15 ທັນວາ 2020 ຢູ່ສະໂມສອນບ້ານ ໂພໄຊ ເມືອງປາກຊັນ ແຂວງບໍລິຄຳໄຊ ໄດ້ເປີດກອງປະຊຸມສະຫຼຸບວຽກກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານປະຈຳ 09 ເດືອນ ແລະ ທິດທາງແຜນການ 03 ເດືອນທ້າຍປີ 2020 ຂອງເຂດພັດທະນາເທດສະບາດ 1 ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ແສງອາລຸນ ແສງອາພອນ ຮອງເລຂາພັກເມືອງ ຮອງເຈົ້າເມືອງປາກຊັນ, ມີກຳລັງ ປກຊ-ປກສ ພະນັກງານພາກສ່ວນກ່ຽວຂ້ອງ ພ້ອມດ້ວຍອຳນາດການປົກຄອງ ແລະ ພໍ່ແມ່ປະຊາຊົນ ເຂົ້າຮ່ວມ.

ທ່ານ ສົມສິດ ຈັນທາລາ ຫົວໜ້າກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ເຂດພັດທະນາເທດສະບາດ 1 ເມືອງປາກຊັນ ໄດ້ຂື້ນຜ່ານຮ່າງບົດສະຫຼຸບ ປະຈຳ 09 ເດືອນ ແລະ ທິດທາງແຜນການ 03 ເດືອນທ້າຍປີ 2020 ເຊີ່ງໄດ້ຍົກໃຫ້ເຫັນຜົນງານທີ່ເຮັດໄດ້ໃນໄລຍະ 09 ເດືອນຜ່ານມາ ວ່າ: ສະພາບພາຍໃນກຸ່ມເທດສະບາດ 1 ແມ່ນມີຄວາມສະຫງົບ, ເປັນລະບຽບຮຽບຮ້ອຍດີ, ປະຊາຊົນສ່ວນຫຼາຍ ມີຄວາມເຊື້ອໝັ້ນຕໍ່ການນຳພາຂອງພັກ-ລັດ ຈັດຕັ້ງປະຕິບັດແຜນພັດທະນາເສດທະກິດ-ສັງຄົມ, ວຽກງານປ້ອງກັນຊາດປ້ອງກັນຄວາມສະຫງົບ, ມີສະຖຽນລະພາບທາງດ້ານການເມືອງ, ມີແນວຄິດໜັກແໜ້ນ, ເຂັ້ມແຂງ. ນອກນີ້ ຍັງໄດ້ຮ່ວມແຮງ, ຮ່ວມໃຈກັນເອົາໃຈໃສ່ສະກັດກັ້ນການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ ຕາມມາດຕະການທີ່ຂັ້ນເທີງວາງອອກ, ເຮັດໃຫ້ວຽກງານດັ່ງກ່າວມີຜົນສຳເລັດ, ບໍ່ມີການແຜ່ລະບາດຢູ່ພາຍໃນກຸ່ມເທດສະບານ 1, ສະພາບ ປະກົດການຫຍໍ້ທໍ້ຫຼາຍອັນໄດ້ຮັບການແກ້ໄຂ ລຸດໜ້ອຍຖອຍລົງເທື່ອລະກ້າວ, 09 ເດືອນຜ່ານມາ ມີປະກົດການຫຍໍ້ທໍ້ທີ່ເກີດຂື້ນທັງໝົດ 35 ເລື່ອງ, ໃນນີ້ ຄະດີລັກຊັບພົນລະເມືອງ 18 ເລື່ອງ, ຄະດີປຸ້ນຊັບ 1 ເລື່ອງ, ຄະດີອາລະວາດຕີກັນ 1 ເລື່ອງ, ຄະດີປືນ 1 ເລື່ອງ, ຄະດີຢາເສບຕິດ 6 ເລື່ອງ, ຄະດີສໍ້ໂກງຊັບ 1 ເລື່ອງ, ອຸບັດຕິເຫດ 1 ເລື່ອງ, ລົງເກັບກຳສະຖິຕິປະຊາຊົນຍົກຍ້າຍມາເປັນຄອບຄົວຈາກຕ່າງບ້ານ, ຕ່າງເມືອງ ແລະ ຕ່າງແຂວງ ມີ 20 ຄອບຄົວ, ມີຈຳນວນພົນ 71 ຄົນ, ຍິງ 41 ຄົນ, ມາເປັນເຂີຍ 73 ຄົນ, ມາເປັນໃພ້  60 ຄົນ, ຄົນຕົກຫລົ່ນ ມີ 29 ຄົນ, ຍິງ 19 ຄົນ.

ຈາກນັ້ນ ບັນດາຜູ້ເຂົ້າຮ່ວມກໍ່ໄດ້ຜັດປ່ຽນກັນຂື້ນປະກອບຄຳຄິດຄຳເຫັນໃສ່ຮ່າງບົດສະຫຼຸບ ແລະ ທິດທາງແຜນການໃນ 03 ເດືອນຕໍ່ໜ້າໃຫ້ມີເນື້ອໃນສົມບຸນຄົບຖ້ວນກ່ວາເກົ່າ.

ຕອນທ້າຍກອງປະຊຸມ ທ່ານ ແສງອາລຸນ ແສງອາພອນ ກໍ່ໄດ້ໃຫ້ກຽດມີຄໍາຄິດເຫັນ ແລະ ໃຫ້ທິດຊີ້ນຳຕໍ່ພະນັກງານທີ່ລົງປະຈຳຢູ່ເຂດໂພໄຊ ແລະ ອຳນາດການປົກຄອງ, ພໍ່ແມ່ປະຊາຊົນ ເຊີ່ງທ່ານໄດ້ຊົມເຊີຍຕໍ່ຜົນງານການເຄື່ອນໄຫວວຽກງານໄລຍະຜ່ານມາ ທີ່ສາມາດເຮັດໄດ້ ແລະ ຍັງເນັ້ນໜັກໃຫ້ເຈົ້າໜ້າທີ່ພາກສ່ວນທີ່ກ່ຽວຂ້ອງ ປະຈຳຢູ່ເຂດເທດສະບານ 1 ເອົາໃຈໃສ່ປະສານສົມທົບກັບອຳນາດການປົກຄອງບ້ານ ແລະ ພໍ່ແມ່ປະຊາຊົນ ເພື່ອປືກສາຫາລືໃນການແກ້ບັນຫາປະກົດການຫຍໍ້ທໍ້ທີ່ເກີດຂື້ນພາຍໃນບ້ານໃຫ້ຫຼຸດໜ້ອຍຖ້ອຍລົງ ແລະ ມີຄວາມເປັນລະບຽບຮຽບຮ້ອຍດີຂື້ນເລີອຍໆ

• Facebook
• Twitter
• Line