ເທດສະບານເມືອງຄຳເກີດ ຈັດພິທີຮັບສະມາຊິກເຍົາວະຊົນ ແລະ ອະນຸຊົນ

ເພື່ອເປັນການສ້າງຂະບວນການຂ່ຳນັບຮັບຕ້ອນວັນຊາດ ທີ 2 ທັນວາ ຄົບຮອບ 45 ປີ ແລະ ວັນສ້າງຕັ້ງເຍົາວະຊົນທັນວາ ຄົບຮອບ 65 ປີ, ໃນວັນທີ 2 ທັນວາ 2020 ຢູ່ທີ່ເດີ່ນອານຸສອນສະຖານເມືອງຄຳເກີດ ຄະນະບໍລິຫານງານຊາວໜຸ່ມເມືອງ ໄດ້ຈັດພິທີຮັບເຍົາວະຊົນ ແລະ ອະນຸຊົນທັນວາ ຂຶ້ນ ໂດຍເປັນກຽດເຂົ້າຮ່ວມຂອງທ່ານ ຜາສຸກ ຈູມມາລາວົງ ຮອງເຈົ້າເມືອງຄຳເກີດ.

ໃນພິທີ ພາຍຫຼັງທີ່ຕາງໜ້າມະຫາຊົນຜູ້ກ້າວໜ້າ ໄດ້ຂຶ້ນຜ່ານໃບຄຳຮ້ອງຂໍເຂົ້າເປັນສະມາຊິກເຍົາວະຊົນ-ອະນຸຊົນ ແລ້ວ ທ່ານ ຄຳຈັນ ໄຊຍະກຸມມານ ຮອງເລຂາຄະນະບໍລິຫານງານຊາວໜຸ່ມເມືອງ ກໍ່ໄດ້ຜ່ານໃບອະນຸມັດຮັບເຍົາວະຊົນ-ອະນຸຊົນທັນວາ, ຫລັງຈາກນັ້ນ ການນຳຂັ້ນເມືອງ, ຄະນະນຳຊາວໜຸ່ມ, ແຂກຖືກເຊີນ, ຄູອາຈານ, ຜູ້ປົກຄອງທີ່ເຂົ້າຮ່ວມ ກໍ່ໄດ້ພ້ອມກັນມັດແພໃຫ້ນ້ອງນ້ອຍເຍົາວະຊົນ-ອະນຸຊົນໃໝ່.

     ການຮັບສະມາຊິກເຍົາວະຊົນ-ອະນຸຊົນໃໝ່ ໃນຄັ້ງນີ້ ມີທັງໝົດ 857 ນ້ອງ, ຍິງ 388ນ້ອງ, ໃນນັ້ນຮັບເຂົ້າເປັນສະມາຊິກເຍົາວະຊົນ 474 ນ້ອງ, ຍິງ 214ນ້ອງ, ຮັບເຂົ້າເປັນສະມາຊິກອະນຸຊົນ 388 ຫຼານ, ຍິງ 174 ຫຼານ.

• Facebook
• Twitter
• Line