ໃນວັນທີ 26 ພະຈິກ 2020 ຢູ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ໄດ້ຈັດກອງປະຊຸມເຊື່ອມຊຶມມະຕິກອງປະຊຸມໃຫຍ່ ຜູ້ແທນສະຫະພັນກຳມະບານແຂວງບໍລິຄຳໄຊ ຄັ້ງທີ VII ແລະ ລະນຶກວັນສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ໃຫ້ກຽດເຜີຍແຜ່ ໂດຍ ທ່ານ ສົນທອງ ວີບຸນກວ້າງ ຮອງຫົວໜ້າພະແນກ ຖວທ ແຂວງບໍລິຄຳໄຊ ມີບັນດາຄະນະພະແນກ ແລະ ພະນັກງານ-ລັດຖະກອນ ເຂົ້າຮ່ວມ.
ກອງປະຊຸມ ໄດ້ຮັບຟັງການເຜີຍແຜ່ມະຕິກອງປະຊຸມໃຫຍ່ ຜູ້ແທນສະຫະພັນກຳມະບານແຂວງບໍລິຄຳໄຊ ຄັ້ງທີ VII ທີ່ໄດ້ຈັດຂຶ້ນໃນວັນທີ 26 ມິຖຸນາ 2020 ທີ່ຜ່ານມາ ເຊີ່ງໄດ້ເປັນເອກະສັນກັນຮັບຮອງເອົາຫຼາຍວຽກງານສຳຄັນ ໜຶ່ງໃນນັ້ນ ແມ່ນທິດທາງແຜນການ ແລະ ຄາດໝາຍສູ້ຊົນ 5 ປີຕໍ່ໜ້າ ແຕ່ປີ 2020-2024 ໂດຍຈະໄດ້ສຸມໃສ່ສຶກສາອົບຮົມການເມືອງ-ແນວຄິດ ໃຫ້ຖັນແຖວພະນັກງານ, ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານບັນດາເຜົ່າໃນທົ່ວແຂວງ, ສູ້ຊົນຂະຫຍາຍສະມາຊິກກຳມະບານ ໃນທຸກຂົງເຂດ ສະເລ່ຍໃຫ້ໄດ້ຢ່າງໜ້ອຍ 25% ທຽບໃສ່ຈຳນວນສະມາຊິກກຳມະບານໃນປີ 2020, ເອົາໃຈໃສ່ປົກປ້ອງສິດຜົນປະໂຫຍດອັນຊອບທຳຂອງຊາວຜູ້ອອກແຮງງານ ເປັນຕົ້ນແມ່ນ ການປົກປ້ອງແຮງງານໃນ ແລະ ນອກລະບົບ, ການສ້າງສັນຍາແຮງງານລວມໝູ່, ຄວາມປອດໄພແຮງງານ ແລະ ການປະຕິບັດຄ່າແຮງງານຂັ້ນຕໍ່າ, ເອົາໃຈໃສ່ສ້າງຂະບວນການແຂ່ງຂັນ 5 ເປັນເຈົ້າ ຕິດພັນກັບການແຂ່ງຂັນຮັກຊາດ ແລະ ພັດທະນາໃຫ້ເປັນຂະບວນການຟົດຟື້ນ ແລະ ຕໍ່ເນື່ອງ, ປະກອບສ່ວນເຂົ້າໃນການຈັດຕັ້ງປະຕິບັດບັນດາຄາດໝາຍ ທີ່ກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ, ກອງປະຊຸມໃຫຍ່ ຄັ້ງທີ VIII ຂອງສະຫະພັນກຳມະບານລາວ ແລະ ອື່ນໆ.
ພ້ອມນັ້ນ ໃນກອງປະຊຸມຍັງໄດ້ປ້ອນບັດຄັດເລືອກເອົາ ຄະນະບໍລິຫານງານສະຫະພັນກຳມະບານແຂວງ ສະໄໝທີ່ VII ບົນພື້ນຖານຫຼັກການລວມສູນປະຊາທິປະໄຕ ແລະ ໄດ້ເປັນເອກະສັນກັນເລືອກເອົາ ສະຫາຍ ດຳລົງ ທັບລາດ ເປັນປະທານສະຫະພັນກຳມະບານແຂວງບໍລິຄໍາໄຊ, ສະຫາຍ ສີສົມພອນ ອິນທະວົງ ເປັນຮອງ, ສະຫາຍ ນາງ ພູເວີນ ສີຫາລາດ ເປັນຮອງ ທັງເປັນປະທານກວດກາ ແລະ ສະຫາຍນາງ ແຫວນຄຳ ເພຍແກ້ວ ເປັນຮອງປະທານກວດກາ.
ຫຼັງຈາກນັ້ນ ກໍ່ໄດ້ຮັບຟັງ ການລະນຶກວັນສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ຄົບຮອບ 20 ປີ ( 25 ພະຈິກ 2000 – 25 ພະຈິກ 2020 ) ຈາກທ່ານ ບົວສອນ ບຸດຊາວດອນ ຮອງຫົວໜ້າພະແນກ ຖວທ ໂດຍທ່ານໄດ້ຍົກໃຫ້ເຫັນປະຫວັດຄວາມເປັນມາ ແລະ ການເຄື່ອນໄຫວຕໍ່ສູ້ ຂອງເອື້ອຍນ້ອງແມ່ຍິງໃນທົ່ວໂລກ ເພື່ອຮຽກຮ້ອງໃຫ້ມີສິດສະເໝີພາບລະຫວ່າງຍິງ-ຊາຍ ໃນແຕ່ລະໄລຍະ ໂດຍສະເພາະໃນເດືອນມິຖຸນາ 1991 ແມ່ຍິງ 23 ຄົນ ຈາກ 20 ປະເທດ ທີ່ເປັນສະມາຊິກຂອງສູນເພື່ອຄວາມເປັນຜູ້ນຳຂອງແມ່ຍິງທົ່ວໂລກ ແລະ ສະຖາບັນໂລກ ກ່ຽວກັບຜູ້ຍິງ, ຄວາມຮຸນແຮງ ແລະ ສິດທິມະນຸດ ໄດ້ຮຽກຮ້ອງໃຫ້ເປີດຂະບວນການເຄື່ອນໄຫວ 16 ວັນ ຕ້ານຄວາມຮຸນແຮງ ບົນພື້ນຖານຄຸນລັກສະນະທາງເພດ ໂດຍເລີ່ມແຕ່ວັນທີ 25 ພະຈິກ ເປັນວັນສາກົນຕ້ານການໃຊ້ຄວາມຮຸນແຮງຕໍ່ແມ່ຍິງ, ວັນທີ 1 ທັນວາ ເປັນວັນຕ້ານເອດສ໌ ໃນທົ່ວໂລກ, ວັນທີ 6 ທັນວາ ເປັນວັນຄົບຮອບການສັງຫານໝູ່ນັກສຶກສາວິສະວະກຳຍິງ 14 ຄົນ ແລະ ວັນທີ 10 ທັນວາ ເປັນວັນສິດທິມະນຸດ.
ນັບແຕ່ນັ້ນມາ ວັນທີ 25 ພະຈິກ ຂອງທຸກໆປີ ໄດ້ກາຍເປັນສັນຍາລັກຂອງການຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເພື່ອໃຫ້ບັນດາປະເທດທົ່ວໂລກ ໄດ້ພ້ອມກັນລະນຶກເຖິງເຫດການດັ່ງກ່າວ ພາຍໃຕ້ຫົວຂໍ້ “ຮັບຟັງຂ້ອຍແດ່ (Hear me too)” ທີ່ສື່ສານສຳຄັນເຖິງຄວາມຕ້ອງການຂອງແມ່ຍິງ ແລະ ເດັກຍິງ ຜູ້ຖືກເຄາະຮ້າຍ ຈາກຄວາມຮຸນແຮງໃນຄອບຄົວ ກໍ່ຄືໃນສັງຄົມ.
Users Today : 309
Users Yesterday : 409
This Month : 10572
This Year : 130609
Total Users : 516833
Who's Online : 31