4 ບ້ານ ເມືອງຄຳເກີດ ຖືກຮັບຮອງເປັນບ້ານແບບຢ່າງປະຕິບັດກົດໝາຍ

ໃນວັນທີ 19 ພະຈິກ 2020, ຢູ່ທີ່ຫ້ອງການກຸ່ມບ້ານໃຫຍ່ທົ່ງແສນ, ເມືອງຄຳເກີດ ແຂວງບໍລິຄຳໄຊ ໄດ້ຈັດພິທີປະກາດ 4 ບ້ານ ເປັນບ້ານແບບຢ່າງປະຕິບັດກົດໝາຍ ປະຈຳປີ 2020 ໂດຍເປັນກຽດເຂົ້າຮ່ວມເປັນປະທານ ຂອງທ່ານ ວິໄລ ສີສະໝຸດ ຮອງເລຂາພັກເມືອງ, ປະທານກວດກາພັກ-ລັດເມືອງ, ມີບັນດາແຂກທີ່ຖືກເຊີນຫ້ອງການທີ່ກ່ຽວຂ້ອງ, ອຳນາດການປົກຄອງ 4 ບ້ານ ຄື: ບ້ານໃຫຍ່ທົ່ງແສນ, ບ້ານວັງຜາ, ບ້ານນໍ້າເດີນ ແລະ ບ້ານໜອງເມກ ເຂົ້າຮ່ວມ.

ໃນພິທີ ທ່ານ ຄຳໜັ້ນ ໄຊມູນວົງ ຫົວໜ້າຫ້ອງການຍຸຕິທຳເມືອງຄຳເກີດ ໄດ້ຂື້ນຜ່ານຜົນການເຄື່ອນໄຫວຈັດຕັ້ງປະຕິບັດວຽກງານຍຸຕິທຳຮາກຖານ ປີ 2020 ຢູ່ເມືອງຄຳເກີດ ທ່ານໃຫ້ຮູ້ວ່າ: ເພື່ອເປັນການຈັດຕັ້ງຜັນຂະຫຍາຍຄຳແນະນຳຂອງລັດຖະມົນຕີກະຊວງຍຸຕິທຳ ສະບັບເລກທີ 1591/ກຍ ລົງວັນທີ 05/12/2018 ກ່ຽວກັບການຈັດຕັ້ງປະຕິບັດວຽກງານຍຸຕິທຳຮາກຖານປະຈຳປີ 2019 ຫ້ອງການຍຸຕິທຳເມືອງ ໃນນາມເປັນອົງການບໍລິຫານດ້ານວິຊາການກົດໝາຍ ແລະ ວຽກງານຍຸຕິທຳປະຈຳເມືອງ ເປັນເສນາທິການໃຫ້ອົງການປົກຄອງເມືອງ ໃນການຄົ້ນຄ້ວາ ແລະ ສະເໜີແຜນໂຄງການສ້າງເມືອງໃຫ້ເປັນຫົວໜ່ວຍເຂັ້ມແຂງທາງດ້ານກົດໝາຍ, ວຽກງານຍຸຕິທຳ ຈຶ່ງໄດ້ດຳເນີນການກະກຽມ, ສ້າງເງື່ອນໄຂເພື່ອຈັດຕັ້ງປະຕິບັດ 04 ວຽກຈຸດສຸມຢູ່ຮາກຖານບ້ານ ໃນການນຳເອົາບັນດານິຕິກຳດ້ານກົດໝາຍ ແລະ ວຽກງານຍຸຕິທຳ ໄປເຜີຍແຜ່ເຊື່ອມຊືມ ໃຫ້ປະຊາຊົນບັນດາເຜົ່າ ໃນຄວາມຮັບຜິດຊອບຂອງຕົນໃຫ້ທົ່ວເຖີງ ແລະ ນຳໄປຈັດຕັງປະຕິບັດເຂົ້າໃນການດຳລົງຊີວິດປະຈຳວັນ, ພ້ອມກັນປະຕິບັດສິດ ແລະ ພັນທະຂອງພົນຂອງລະເມືອງລາວຕາມລັດຖະທຳມະນູນ ແລະ ກົດໝາຍກຳນົດໄວ້ຢ່າງເຂັ້ມງວດ, ຄົບຖ້ວນ, ເຮັດໃຫ້ສັງຄົມມີຄວາມຍຸຕິທຳ.

ເພື່ອເປັນການຢັ້ງຢືນ ເຖິງຜົນງານການຈັດຕັ້ງວຽກງານຍຸຕິທຳຢູ່ຂັ້ນຮາກຖານ ໃນພິທີ ໄດ້ມອບໃບຢັ້ງຢືນໃຫ້ 4 ບ້ານ ທີ່ເປັນແບບຢ່າງໃນການຈັດຕັ້ງປະຕິບັດກົດໝາຍ ໂດຍມີ: ບ້ານນໍ້າເດີນ, ບ້ານໃຫຍ່ທົ່ງແສນ 242, ບ້ານໜອງເມກ ແລະ ບ້ານວັງຜາ.

        ໃນຕອນທ້າຍພິທີ ທ່ານ ວິໄລ ສີສະໝຸດ ກໍ່ໄດ້ໂອ້ລົມ ໂດຍທ່ານໄດ້ຮຽກຮ້ອງໃຫ້ອົງການປົກຄອງບ້ານ, ກອງກໍ່ສ້າງຮາກຖານ ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ພໍ່ແມ່ປະຊາຊົນພາຍໃນຄວາມຮັບຜິດຊອບຂອງຕົນ ໃຫ້ປະຕິບັດລະບຽບກົດໝາຍ ແລະ ເອົາໃຈໃສ່ສ້າງຄອບຄົວທີ່ຍັງບໍ່ທັນໄດ້ຄອບຄົວແບບຢ່າງໃນການປະຕິບັດກົດໝາຍ, ຕ້ອງມີຄວາມພ້ອມ ແລະ ເປັນແບບຢ່າງທີ່ດີໃນການປະຕິບັດກົດໝາຍ. ທັງນີ້ ກໍ່ເພື່ອນຳເອົາແນວທາງຂອງພັກ-ລະບຽບກົດໝາຍຂອງລັດ ລົງສູ່ຮາກຖານບ້ານ, ກຸ່ມບ້ານ ແລະ ປະຊາຊົນບັນດາເຜົ່າ ໃຫ້ມິສະຕິເຄົາລົບ ແລະ ປະຕິບັດກົດໝາຍໃຫ້ສູງຂື້ນ.

• Facebook
• Twitter
• Line