ພິທີເປີດຊຸດຝຶກອົບຮົມການພັດທະນາວຽກງານກຸ່ມ ແລະ ສະຫະກອນ ໄດ້ຈັດຂຶ້ນໃນຕອນເຊົ້າຂອງວັນທີ 12 ພະຈິກ 2020 ຢູ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງ ໂດຍການເປັນປະທານຂອງທ່ານ ສົມຫວັງ ແກ້ວວົງວິຈິດ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີຄະນະກົມພັດທະນາຊົນນະບົດ ແລະ ສະຫະກອນ ກະຊວງກະສິກໍາ ແລະ ປ່າໄມ້, ພະແນກການກ່ຽວຂ້ອງຂັ້ນແຂວງ, ເມືອງ 7 ຕົວເມືອງພາຍໃນແຂວງ ແລະ ກຸ່ມຕົວແບບພາຍໃນແຂວງເຂົ້າຮ່ວມ.
ແຂວງບໍລິຄຳໄຊ ເປັນແຂວງໜຶ່ງທີ່ມີພື້ນທີ່ກວ້າງພໍສົມຄວນ ເໝາະສົມແກ່ການຜະລິດປູກຝັງ ແລະ ລ້ຽງສັດ ມີປ່າໄມ້ປົກຫຸ້ມກວມປະມານ 70% ມີແມ່ນ້ຳຫຼາຍສາຍທີ່ສາມາດສ້າງເປັນເຂື່ອນ ຜະລິດພະລັງງານໄຟຟ້າ ແລະ ເປັນອ່າງເກັບນ້ຳ ເພື່ອສະໜອງເຂົ້າໃສ່ເຂດການຜະລິດ ແລະ ຊັບພະຍາກອນທຳມະຊາດທີ່ມີຄ່າຫຼາຍຊະນິດ, ວຽກງານສະຫະກອນ ແລະ ກຸ່ມການຜະລິດ ກໍ່ໄດ້ຊຸກຍູ້ຕິດຕາມຢ່າງຕໍ່ເນື່ອງ ເຫັນວ່າວຽກງານດັ່ງກ່າວ ນັບມື້ໄດ້ຮັບການປັບປຸງຍົກລະດັບດີຂຶ້ນ.
ໃນການຝຶກອົບຮົມໃນຄັ້ງນີ້ ຜູ້ເຂົ້າຮ່ວມຈະໄດ້ຮັບຟັງນິຕິກຳຕ່າງໆ ເປັນຕົ້ນແມ່ນ ນິຕິກຳກ່ຽວຂ້ອງກັບວຽກງານກຸ່ມ ແລະ ສະຫະກອນ, ຂໍ້ກຳນົດ ວ່າດ້ວຍສະຫະກອນສິນເຊື່ອ, ໂຄງສ້າງລະບົບການພັດທະນາສະຫະກອນ ແລະ ພາບລວມການຊຸກຍູ້ສະຫະກອນ ໃນ ສປປ ລາວ, ອຸດົມການ, ຫຼັກການ ແລະ ວິທີການສະຫະກອນ, ການລາຍງານສະຖິຕິກຸ່ມ ແລະ ສະຫະກອນ ໃນທົ່ວແຂວງບໍລິຄຳໄຊ ແລະ ແຜນການປັບປຸງ, ຄາດໝາຍສູ້ຊົນວຽກງານກຸ່ມ ແລະ ສະຫະກອນ ແຕ່ປີ 2021-2025, ນອກນັ້ນ ຍັງຈະໄດ້ແບ່ງກຸ່ມຄົ້ນຄວ້າ ກ່ຽວກັບຂະບວນການສ້າງຕັ້ງກຸ່ມ, ການຈັດຕັ້ງປະຕິບັດ, ນະໂຍບາຍສົ່ງເສີມ, ການສະໜັບສະໜູນ ແລະ ແຜນໃນການພັດທະນາສົ່ງເສີມກຸ່ມສະຫະກອນ.
ທັງນີ້ ກໍ່ເພື່ອເປັນການແລກປ່ຽນປະສົບການດ້ານວິຊາການ ໃນວຽກງານດັ່ງກ່າວ ທັງເປັນການສ້າງຄວາມເຂົ້າໃຈເອກະພາບ, ສ້າງຂີດຄວາມສາມາດ ໃຫ້ແກ່ບຸກຄະລາກອນທີ່ເຮັດໜ້າທີ່ກ່ຽວກັບວຽກງານກຸ່ມ ແລະ ສະຫະກອນ ຢູ່ພາຍໃນແຂວງ ທັງເປັນການປະກອບສ່ວນເຂົ້າໃນການຜັນຂະຫຍາຍ 3 ແຜນງານ, 4 ໂຄງການ ແລະ 10 ແຜນດຳເນີນງານທີ່ກະຊວງກະສິກຳ ແລະ ປ່າໄມ້ ໄດ້ກຳນົດໄວ້. ການຝຶກອົບຮົມໃນຄັ້ງນີ້ ຈະໄດ້ດຳເນີນໄປເປັນເວລາ 2 ວັນເຕັມ ຈຶ່ງຈະສຳເລັດ.
Users Today : 1000
Users Yesterday : 494
This Month : 8841
This Year : 128878
Total Users : 515102
Who's Online : 101