ບໍລິຄັນ ເປີດໂຄງການ ແກ້ໄຂ ແລະ ສະກັດກັ້ນ ການແຜ່ລະບາດຂອງຢາເສບຕິດ ຢູ່ກຸ່ມບ້ານບໍ່

ຕອນເຊົ້າວັນທີ 27 ຕຸລາ 2020 ຢູ່ທີ່ຫ້ອງການ ບ້ານບໍ່ ເມືອງບໍລິຄັນ ແຂວງບໍລິຄໍາໄຊ ໄດ້ເປິດກອງປະຊຸມໂຄງການຕ້ານ ແລະ ແກ້ໄຂປະກົດການທີ່ຫຍໍ້ທໍ້ ການແຜ່ລະບາດຂອງຢາເສບຕິດຂື້ນ ໂດຍການເປັນປະທານຂອງທ່ານ ພັຕ ໄມພອນ ລາດສະຈັນດາ ຄະນະກອງບັນຊາການ ປກສ ເມືອງບໍລິຄັນ.

ທ່ານ ພັທ ຄຳອາດ ໂງດມະນີ ຫົວໜ້າຫ້ອງການ ປກສ ບໍລິການປະຊາຊົນກຸ້ມບ້ານບໍ່ ໄດ້ຂື້ນຜ່ານບົດສະຫຼຸບຫຍໍ້ຂອງການຈັດຕັ້ງປະຕິບັດແກ້ໄຂປະກົດການຫຍໍ້ທໍ່ທີ່ເກີດຂື້ນຢູພາຍໃນກຸ່ມບ້ານບໍ່ ແລະ ມະຕິຕົກລົງຂອງວິທະຍາສາດໃນການແກ້ໄຂບັນຫາຢາເສບຕິດພາຍໃນເມືອງບໍລິຄັນ, ພ້ອມນັ້ນ ກໍ່ໄດ້ຜ່ານບົດລາຍງານຫຍໍ້ກ່ຽວກັບບັນຫາປະກົດການຫຍໍ້ທໍ່ທີ່ເກິດຂື້ນຢູ່ພາຍໃນເຂດບ້ານບໍ່, ທັງໄດ້ຜ່ານແຜນດຳເນີນງານແກ້ໄຂສະກັດກັ້ນ ແລະ ການແຜ່ລະບາດຂອງຢາເສບຕິດຢູ່ 5 ບ້ານ.

ຄະນະຮັບຜິດຊອບ ໃຫ້ຮູ້ວ່າ: ການຈັດຕັ້ງປະຕິບັດໂຄງການ ເລີ່ມຕົ້ນດ້ວຍການລົງເກັບກຳຂໍ້ມູນນຳອຳນາດການປົກຄອງບ້ານ, ປກສ ບ້ານ, ນຳເອົາກົດໝາຍວ່າດ້ວຍຢາເສບຕິດ ລົງເຜີຍແຜ່ໃຫ້ພໍ່-ແມ່ປະຊາຊົນ ແລະ ບັນດາເປົ້າໝາຍ ໄດ້ຮັບຮູ້ ເຂົ້າໃຈຕໍ່ຜົນຮ້າຍ ແລະ ໄພອັນຕະລາຍຂອງຢາເສບຕິດ, ສຶກສາອົມຮົມແນວຄິດໃຫ້ບັນດາເປົ້າໝາຍເຂົ້າໃຈແຈ້ງຕໍ່ຈຸດປະສົງຂອງໂຄງການດັ່ງກ່າວ, ຕໍ່ກັບເປົ້າໝາຍເສບທີ່ເຂົ້າຮ່ວມ ຕ້ອງຈິງໃຈລາຍງານຕໍ່ເຈົ້າໜ້າທີ່ ວ່າ ຜ່ານມາເຄີຍເສບເບົາຫຼື ໜັກ, ຕໍ່ກັບເປົ້າໝາຍທີ່ບໍ່ມີຄວາມຕື່ນຕົວມາເຂົ້າຮ່ວມ ແມ່ນມອບໃຫ້ກຳລັງ ປກຊ, ປກສ ບ້ານ ນຳຕົວມາກວດນ້ຳປັດສະວະ, ຖ້າກວດພົບສານເສບຕິດຈະນຳມາສຶບສວນ-ສອບສວນ ເອົາຄຳໃຫ້ການ, ພິມລາຍມື, ຖ່າຍຮູບ, ສຶກສາອົມຮົມກ່າວເຕືອນ ພ້ອມທັງຂຽນໃບປະຕິຍານ ໃຫ້ຢຸດເຊົາ, ສ່ວນເປົ້າໝາຍເສບຕິດມາດົນ ແລະ ບໍ່ມີຄວາມສາມາດຈະຢຸດເຊົາໄດ້ ແມ່ນມອບໃຫ້ອຳນາດການປົກຄອງ ກໍ່ຄືພໍ່-ແມ່ ປະກອບເອກກະສານ ນຳເອົາລູກຫຼານຂອງຕົນໄປຝາກສູນດັດສ້າງໜອງດົງ ແຂວງບໍລິຄຳໄຊ, ເປົ້າໝາຍທີ່ບໍ່ຢູ່ບ້ານ ແມ່ນມອບໃຫ້ອຳນາດການປົກຄອງບ້ານ, ປກຊ-ປກສ ບ້ານ ຄຸ້ມຄອງຕິດຕາມການເຄື່ອນໄຫວ ພ້ອມທັງລາຍງານໃຫ້ ປກສ ກຸ່ມບ້ານ ປກສ ເມືອງບໍລິຄັນ, ຕໍ່ກັບເປົ້າໝາຍຂາຍ, ເສບມາເປັນອາຈີນ, ເຄີຍສຶກສາອົບຮົມ ແລະ ຖືກສານຕັດສິນມາກ່ອນ ຕ້ອງນຳຕົວມາກວດນ້ຳປັດສະວະ, ຖ້າພົບສານເສບຕິດກໍ່ໃຫ້ນຳມາດຳເນີນຄະດີຕາມຂະບວນການຍຸຕິທຳ, ສ່ວນເປົ້າໝາຍທີ່ມີຄວາມຈິງໃຈລາຍງານ ແລະ ຈະຢຸດເຊົາ ແມ່ນມອບໃຫ້ ປກສ ກຸ່ມບ້ານບໍ່ , ປກສ ບ້ານ ແລະ ອໍານາດການປົກຄອງບ້ານ ຄຸ້ມຄອງຕິດຕາມການເຄື່ອນໄຫວເປັນປົກກະຕິ, ຜ່ານຂະບວນການດັ່ງກ່າວແລ້ວ ແຕ່ບັນດາເປົ້າໝາຍຍັງບໍ່ຢຸດເຊົາ ແລະຍັງສືບຕໍ່ຄ້າຂາຍ – ເສບຢາເສບຕິດອີກ ໃຫ້ນຳຕົວຜູ້ກ່ຽວມາດຳເນີນຄະດີຕາມລະບຽບກົດໝາຍ.

ການຈັດຕັ້ງປະຕິບັດໂຄງການ ແກ້ໄຂ ແລະ ສະກັດກັ້ນ ຕ້ານການແຜ່ລະບາດຂອງຢາເສບຕິດ ແມ່ນເພື່ອເປັນການຢັງຢັ້ງ ບັນດາເປົ້າໝາຍທີ່ເສບ, ຄ້າຂາຍ ແລະ ພົວພັນພັນສິ່ງເສບຕິດ ທີ່ຜິດກົດໝາຍ ໃຫ້ຫລຸດໜ້ອຍຖອຍລົງ ກ້າວໄປເຖີງການຢຸດເຊົາ ເພາະປະຈຸບັນ ການແຜ່ລະບາດຂອງຢາເສບຕິດ ພວມເປັນເປັນບັນຫາຄຸກຄາມເຍົາວະຊົນ – ຊາວໜຸ່ມ ແລະ ບຸກຄົນທົ່ວໄປ ອັນໄດ້ສ້າງຄວາມເດືອດຮ້ອນໃຫ້ແກ່ອຳນາດການປົກຄອງທຸກຂັ້ນ ລວມໄປເຖີງຊີວິດການເປັນຢູ່ຂອງພໍ່ແມ່ປະຊາຊົນ, ຍ້ອນແນວນັ້ນ ການຈັດຕັ້ງອຳນາດລັດ ຈຶ່ງເຫັນໄດ້ຄວາມສຳຄັນກ່ຽວກັບການແກ້ໄຂ ແລະ ສະກັດກັ້ນ ການແຜ່ລະບາດຂອງຢາເສບຕິດ ແລະ ໄດ້ສຸມທຶນຮອນໃສ່ບໍ່ໜ້ອຍ ເພື່ອຕີຖອຍປະກົດການຫຍໍ້ທໍ້ດັ່ງກ່າວ.

• Facebook
• Twitter
• Line