ອະດີດນາຍົກລັດຖະມົນຕີແຫ່ງ ສປປ ລາວ ຢ້ຽມຢາມແຂວງບໍລິຄຳໄຊ

ໃນຕອນເຊົ້າຂອງວັນທີ 28 ຕຸລາ 2020 ຢູ່ໂຮງໝໍແຂວງບໍລິຄຳໄຊ ທ່ານ ດຣ ບຸນຍັງ ພົມມະຈັນ ອຳນວຍການໂຮງໝໍແຂວງ ພ້ອມດ້ວຍຄະນະ ໄດ້ເປັນກຽດຕ້ອນຮັບທ່ານ ທອງສິງ ທຳມະວົງ ອະດີດນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ໂດຍມີທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ຮ່ວມພາທາງ, ເນື່ອງໃນໂອກາດທີ່ໄດ້ເດີນທາງມາຢ້ຽມຢາມແຂວງບໍລິຄຳໄຊ.

ໂອກາດນີ້ ທ່ານຜູ້ອຳນວຍການໂຮງໝໍແຂວງ ກໍ່ໄດ້ລາຍງານໂດຍຫຍໍ້ ໃຫ້ທ່ານໄດ້ຮັບຊາບ ເປັນຕົ້ນແມ່ນວຽກງານຄຸ້ມຄອງບໍລິຫານຫ້ອງການ, ຜູ້ຊ່ຽວຊານດ້ານວິຊາການ, ວຽກງານຈັດຕັ້ງ-ຄຸ້ມຄອງພະນັກງານ, ວຽກງານບໍລິຫານການແພດ-ຄຸ້ມຄອງວິຊາການ, ວຽກງານບໍລິຫານພະຍາບານ, ວຽກງານຄວບຄຸມການຕິດເຊື້ອໃນໂຮງໝໍ, ວຽກງານຄຸ້ມຄອງປະກັນສຸຂະພາບ ແລະ ວຽກງານອື່ນໆທີ່ປິ່ນອ້ອມ.

ຈາກນັ້ນ ທ່ານກໍ່ໄດ້ເດີນທາງໄປຢ້ຽມຢາມໂຮງຮຽນ ມ.ສ ສີທ່ານາໄຊ ທີ່ໄດ້ຮັບທຶນຊ່ວຍເຫຼືອລ້າຈາກສະຫາຍ ເລຂາທິການໃຫຍ່ ພັກກອມມູນິດຫວຽດນາມ ທີ່ເປີດນຳໃຊ້ມາໄດ້ 2 ປີແລ້ວ ແລະ ເດີນທາງໄປຢ້ຽມຢາມໂຮງຮຽນອະນຸບານ-ປະຖົມບ້ານສວນສະຫວັນ ທີ່ໄດ້ຮັບທຶນຊ່ວຍເຫຼືອຈາກກອງທຶນໜຶ່ງໃຈບໍລິຄຳໄຊຊ່ວຍເຫຼືອສັງຄົມ ພ້ອມມອບອຸປະກອນການຮຽນ ແລະ ເຂົ້າໜົມ ຈຳນວນໜຶ່ງໃຫ້ຫຼານນ້ອຍນັກຮຽນ, ພ້ອມນີ້ ທ່ານອະດີດນາຍົກລັດຖະມົນຕີ ແລະ ທ່ານເຈົ້າແຂວງ ຍັງໄດ້ຮ່ວມປູກຕົ້ນມ່ວງ ຢູ່ເຂດອະນຸສາວະລີທ່ານ ສີສົມພອນ ລໍວັນໄຊ ອີກດ້ວຍ.

• Facebook
• Twitter
• Line