ໃນວັນທີ 28-29 ມິຖຸນາ 2025 ນັກສື່ມວນຊົນ 4 ແຂວງພາກກາງ ໄດ້ລົງທັດສະນະສຶກສາເກັບກຳຂໍ້ມູນຕົວຈິງຢູ່ອ່າງຫຼວງ ເມືອງວັງວຽງ ແຂວງວຽງຈັນ ພາຍໃຕ້ໂຄງການສ້າງຄວາມເຂັ້ມແຂງໃຫ້ແກ່ນັກສື່ມວນຊົນລາວ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມເພື່ອການພັດທະນາສີຂຽວ Green Action through Media and Civil Society in Laos ( ໂຄງການ GAMCIL ) ເຊິ່ງນຳພາຂະບວນໂດຍທ່ານ ສະຫວັນຄອນ ຣາຊະມຸນຕຣີ ປະທານສະມາຄົມນັກຂ່າວແຫ່ງ ສປປ ລາວ, ທ່ານ ນາງ ບົວຄຳ ດວງປັນຍາ ຫົວໜ້າໂຄງການແຄຣ໌ນານາຊາດປະຈຳລາວ ພ້ອມດ້ວຍ ວິທະຍາກອນ ແລະ ນັກສຳມານາກອນສື່ມວນຊົນຈາກ ແຂວງວຽງຈັນ, ໄຊສົມບູນ, ບໍລິຄຳໄຊ ແລະ ນະຄອນຫລວງວຽງຈັນ.
ຈຸດປະສົງ ກໍ່ເພື່ອນຳໃຊ້ທັກສະ ຈາກພາກທິດສະດີທີ່ໄດ້ຮຽນຮູ້ 5 ວັນຜ່ານມານັ້ນ ເຂົ້າຊ່ວຍໃນການເກັບກຳຂໍ້ມູນຢູ່ສະຖານທີ່ຕົວຈິງ ຢູ່ສະຖານທີ່ທ່ອງທ່ຽວອ່າງຫຼວງ ແລະ ວຽງທາຣາ ຣີສອດ ເຊິ່ງເປັນແຫຼ່ງທ່ອງທ່ຽວທີ່ເປັນຕົວແບບດ້ານການທ່ອງທ່ຽວສີຂຽວ ຂອງເມືອງວັງວຽງ ແຂວງວຽງຈັນ, ເພື່ອນຳມາຂຽນເປັນບົດ ເປັນຂ່າວ ເຜີຍແຜ່ຜ່ານສື່ຕ່າງໆຂອງສູນກາງ ກໍ່ຄືສື່ທ້ອງຖິ່ນໃຫ້ສັງຄົມໄດ້ຮັບຮູ້ ແລະ ເຂົ້າໃຈໃນການຮັກສາສິ່ງແວດລ້ອມ ທັງຄົນໃນຊາດ ແລະ ຕ່າງຊາດຢຸດພຶດຕິກຳທີ່ເປັນການທຳລາຍສິ່ງແວດລ້ອມ ແລະ ໃຫ້ປະຊາຊົນມີຄວາມຮັບຮູ້ເພີ່ມຂຶ້ນ ພ້ອມມີສ່ວນຮ່ວມໃນການແກ້ໄຂບັນຫາສິ່ງແວດລ້ອມຢ່າງມີປະສິດທິພາບ.
ທ່ານ ສະຫວັນຄອນ ຣາຊະມຸນຕຣີ ປະທານສະມາຄົມນັກຂ່າວແຫ່ງ ສປປ ລາວ ໃນນາມເປັນຫົວຫນ້ານຳພາຂະບວນທັດສະນະໃນຄັ້ງນີ້ ໄດ້ມີຄຳເຫັນຊີ້ນຳວ່າ: ການລົງທັດສະນະໃນຄັ້ງນີ້ແມ່ນມີຄວາມຫມາຍສຳຄັນ ເພາະນັກສຳມະນາກອນທຸກຄົນຈະໄດ້ນຳໃຊ້ຄວາມຮູ້ຄວາມສາມາດ ທັກສະຕ່າງໆ ໃຫ້ນັກຂ່າວມີຄວາມເຂົ້າໃຈຢ່າງແທ້ຈິງ ເພື່ອມາຖອດຖອນບົດຮຽນໃຫ້ປະຊາຊົນເຂົ້າໃຈງ່າຍ ໂດຍການຮູ້ນຳໃຊ້ເຄື່ອງມືດິຈິຕອລຕ່າງໆ ເປັນໂຕຊ່ວຍໃນການຂຽນຂ່າວເຜີຍແຜ່ຜ່ານສື່ຕ່າງໆ ໃຫ້ສັງຄົມໄດ້ຮັບຮູ້ເຖິງບັນຫາສິ່ງແວດລ້ອມ ການພັດທະນາສີຂຽວ ການທ່ອງທ່ຽວແບບຍືນຍົງ ແລະ ອື່ນໆ.
Users Today : 607
Users Yesterday : 669
This Month : 1941
This Year : 95888
Total Users : 629852
Who's Online : 13