ກອງປະຊຸມໃຫຍ່ອົງຄະນະພັກເມືອງປາກຊັນ ຄັ້ງທີ VII ໄດ້ໄຂຂຶ້ນໃນຕອນເຊົ້າຂອງວັນທີ 15 ມັງກອນ ແລະ ໄດອັດລົງຢ່າງເປັນທາງການ ໃນວັນທີ 16 ມັງກອນ 2020 ຢູ່ສະໂມໃຫຍ່ຂອງເມືອງປາກຊັນ ພາຍໃຕ້ການເປັນປະທານຂອງສະຫາຍ ໄມຈອມ ວັນນະສານຄຳ ກຳມະການພັກແຂວງ ເລຂາຄະນະບໍລິຫານງານພັກເມືອງ-ເມືອງປາກຊັນ, ເປັນກຽດເຂົ້າຮ່ວມຂອງສະຫາຍ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ-ແຂວງບໍລິຄຳໄຊ ມີຜູ້ແທນສົມບູນ 123 ສະຫາຍ, ຍິງ 5 ສະຫາຍ, ແຂກຖືກເຊີນຈາກບັນດາເມືອງ, ບັນດາບ້ານ ແລະ ຫ້ອງການອ້ອມຂ້າງເມືອງ ເຂົ້າຮ່ວມ.
ກອງປະຊຸມໃຫຍ່ ໄດ້ຮັບຟັງລາຍງານການເມືອງທັງສອງພາກ ເຊິ່ງສະເໜີໂດຍ ສະຫາຍ ໄມຈອມ ວັນນະສານຄໍາ ກໍາມະການພັກແຂວງ, ເລຂາຄະນະບໍລິຫານງານພັກເມືອງ, ລາຍງານການເມືອງໄດ້ຕີລາຄາເຖິງຜົນງານ ແລະ ໄຊຊະນະຂອງການຈັດຕັ້ງປະຕິບັດແນວທາງແຜນນະໂຍບາຍ, ມະຕິຄັ້ງທີ X ຂອງພັກ, ມະຕິຄັ້ງທີ VI ອົງຄະນະພັກແຂວງ, ອົງຄະນະພັກເມືອງທີ່ຜ່ານມາ. ໂດຍຊີ້ໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງ, ສາເຫດຕ່າງໆ ເຊິ່ງຈະຕ້ອງໄດ້ສືບຕໍ່ແກ້ໄຂໃນຕໍ່ໜ້າ ແລະ ສະຫຼຸບສັງລວມເປັນບົດຮຽນໃຫ້ແກ່ການນຳພາຂອງຕົນ, ພ້ອມນີ້ ຍັງໄດ້ເປັນເອກະພາບກັນຮັບຮອງເອົາທິດທາງແຜນພັດທະນາເສດຖະກິດ-ສັງຄົມ 5 ປີຄັ້ງທີ V (2019-2024) ເຊິ່ງມີເນື້ອໃນຕົ້ນຕໍ ດັ່ງນີ້: ເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ, ຮັບປະກັນສະຖຽນລະພາບທາງດ້ານເສດຖະກິດມະຫາພາກ, ດຸນດ່ຽງລະຫວ່າງການພັດທະນາ ແລະ ການສະໜອງທຶນໃຫ້ສອດຄ່ອງກັບເງື່ອນໄຂໃໝ່, ສູ້ຊົນສ້າງໃຫ້ເມືອງປາກຊັນເປັນເມືອງທີມີຄວາມເຂັ້ມແຂງຮອບດ້ານ ໂດຍສະເພາະທາງດ້ານວຽກງານການເງິນ ຕ້ອງໃຫ້ສາມາດກຸ້ມຕົນເອງເທື່ອລະກ້າວ ເປັນຕົ້ນ: ເງິນເດືອນ, ເງິນອຸດໜູນ, ນະໂຍບາຍ, ເງິນບໍລິຫານ, ເງິນດັດສົມສົ່ງເສີມ, ເຮັດໃຫ້ການພັດທະນາເສດຖະກິດ-ສັງຄົມ ແລະ ການປົກປັກຮັກສາສິ່ງແວດລ້ອມກາຍເປັນສີຂຽວ ແລະ ຍືນຍົງ, ການພັດທະນາຂະແໜງເສດຖະກິດ ແລະ ວັດທະນະທຳ-ສັງຄົມໄປພ້ອມໆກັນ ນັບທັງຕົວເມືອງ ແລະ ຊົນນະບົດ, ການແກ້ໄຂຄວາມທຸກຍາກຕາມທິດ 3 ສ້າງໃຫ້ປະກົດຜົນເປັນຈິງ. ພັດທະນາຊັບພະຍາກອນມະນຸດໃຫ້ມີຄຸນນະພາບ, ມີຄວາມຮູ້-ຄວາມສາມາດໃນການສ້າງກຳລັງແຮງງານໃຫ້ມີສີມື, ມີລະບຽບວິໄນ ແລະ ດຸໝັ່ນ, ອົດທົນ.ຮັກສາສະຖຽນລະພາບທາງດ້ານການເມືອງ, ຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມຢ່າງໜັກແໜ້ນ, ສ້າງສັງຄົມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ. ສືບຕໍ່ເປີດກ້ວາງການຮ່ວມມືກັບປະເທດເພື່ອນມິດທີມີແລ້ວ ໃຫ້ມີປະສິດທິຜົນຍິງຂຶ້ນ.
ກອງປະຊຸມໄດ້ຮັບຟັງການລາຍງານ ແລະ ການປະກອບຄຳເຫັນຈາກບັນດາເມືອງ, ຜູ້ຕາງໜ້າຈາກຂົງເຂດຕ່າງໆອ້ອມຂ້າງເມືອງ ແລະ ຄອບຄົວຕົວແບບ ເຊີ່ງເຮັດໃຫ້ລາຍງານການເມືອງ ມີເນື້ອໃນອັນອຸດົມສົມບູນ ແລະ ຢັ້ງຢືນເຖິງການປະກອບສ່ວນຢ່າງຕັ້ງໜ້າ ເຂົ້າໃນຜົນສຳເລັດຂອງການຈັດຕັ້ງປະຕິບັດໜ້າທີ່ການເມືອງຂອງຕົນ ເປັນຕົ້ນການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ການສ້າງບ້ານ ແລະ ກຸ່ມບ້ານພັດທະນາ ໃຫ້ໄປຕາມທິດ 3 ສ້າງ, ການຊຸກຍູ້-ສົ່ງເສີມການຜະລິດເປັນສິນຄ້າ, ແກ້ໄຂຄວາມທຸກຍາກ ແລະ ສ້າງຂະບວນການຕາມຂໍ້ແຂ່ງຂັນຮັກຊາດ ແລະ ພັດທະນາ.
ກອງປະຊຸມ ຜູ້ແທນໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານພັກເມືອງປາກຊັນສະໄໝທີ VII, ໂດຍເລືອກໄດ້ 23 ສະຫາຍ, ຍິງ 4 ສະຫາຍ ແລະ ໃນກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກເມືອງປາກຊັນ ສະໄໝທີ VII ໄດ້ເປັນເອກະສັນກັນເລືອກເອົາສະຫາຍ ໄມຈອມ ວັນນະສານຄໍາ ເປັນເລຂາຄະນະບໍລິຫານງານພັກເມືອງ, ສະຫາຍ ແສງອາລຸນ ແສງອາພອນ ເປັນຮອງເລຂາຄະນະບໍລິຫານງານພັກເມືອງ, ສະຫາຍ ນ. ຄໍາເພັດ ດວງມະນີ ເປັນຮອງເລຂາຄະນະບໍລິຫານງານພັກເມືອງ ທັງເປັນປະທານກວດກາພັກ, ສະຫາຍ ມະນີວົງ ຈັນທະວົງສາ, ສະຫາຍ ຈັນທະວອນ ພົມມະຈັນ, ສະຫາຍ ສຸພາລັກ ໄຊຊະນະສີ ແລະ ສະຫາຍ ສຸລິຍາ ລາດສະບົວສີ ເປັນຄະນະປະຈຳພັກເມືອງ.
ພ້ອມດຽວກັນ ໃນກອງປະຊຸມຍັງໄດ້ເລືອກຕັ້ງເອົາຜູ້ແທນສົມບູນ 24 ສະຫາຍ, ຍິງ 4 ສະຫາຍ ແລະ ຜູ້ແທນສໍາຮອງ 3 ສະຫາຍ, ຍິງ 0 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງບໍລິຄຳໄຊ.
Users Today : 107
Users Yesterday : 409
This Month : 10370
This Year : 130407
Total Users : 516631
Who's Online : 4