ກອງປະຊຸມສາມັນຄົບຄະນະກຳມະການແນວລາວສ້າງຊາດແຂວງບໍລິຄຳໄຊ ຄັ້ງທີ 3 ສະໄໝທີ 7

ກອງປະຊຸມສາມັນຄົບຄະນະກຳມະການແນວລາວສ້າງຊາດແຂວງບໍລິຄຳໄຊ ຄັ້ງທີ 3 ສະໄໝທີ 7 ໄດ້ຈັດຂຶ້ນໃນຕອນເຊົ້າຂອງວັນທີ 21 ກຸມພາ 2023 ຢູ່ຫ້ອງວ່າການແຂວງບໍລິຄຳໄຊ ໂດຍການເປັນປະທານຂອງທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງບໍລິຄຳໄຊ ແລະ ທ່ານ ບຸນຄຳ ໄຊເຍຍລໍວື່ ຄະນະປະຈຳພັກແຂວງ ປະທານແນວລາວສ້າງຊາດແຂວງ, ມີຮອງປະທານແນວລາວສ້າງຊາດແຂວງ, ຄະນະກຳມະການແນວລາວສ້າງແຂວງ, ເມືອງ, ອົງການຈັດຕັ້ງ ແລະ ແຂກຖືກເຊີນ ເຂົ້າຮ່ວມ.

1 ປີຜ່ານມາ ຄະນະກຳມະການແນວລາວສ້າງຊາດແຕ່ລະຂັ້ນ ໄດ້ນຳເອົາແນວທາງນະໂຍບາຍຂອງພັກ, ມະຕິ, ຄຳສັ່ງ, ຄຳແນະນຳ, ຂໍ້ກຳນົດ ແລະ ກົດໝາຍຂອງລັດ, ມະຕິກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XI, ມູນເຊື້ອວັນສ້າງຕັ້ງແນວລາວສ້າງຊາດ, ວັນສໍາຄັນຕ່າງຕ່າງໆ ຂອງຊາດ, ຂອງພັກ ລົງໂຄສະນາເຜີຍແຜ່ເຊື່ອມຊຶມໃຫ້ອໍານາດການປົກຄອງ, ອົງການຈັດຕັ້ງຂອງບ້ານ ແລະ ປະຊາຊົນບັນດາເຜົ່າ ລວມທັງໝົດໄດ້ 50 ຄັ້ງ, ມີຜູ້ເຂົ້າຮ່ວມ 3,062 ເທື່ອຄົນ, ຮັບຮອງເປັນຄອບຄົວສາມັກຄີປອງດອງ 979 ຄອບຄົວ, ທຽບໃສ່ປີຜ່ານມາເພີ່ມຂຶ້ນ 1,80%, ຮັບຮອງເປັນບ້ານສາມັກຄີປອງດອງ 7 ບ້ານ ເທົ່າກັບ 2,46% ແລະ ປະກາດຮັບຮອງເປັນເມືອງສາມັກຄີປອງດອງໄດ້ 2 ເມືອງ ເພີ່ມຂື້ນ 28,57%, ປະຈຸບັນ ແຂວງບໍລິຄຳໄຊ ສາມາດຮັບຮອງເປັນຄອບຄົວສາມັກຄີປອງດອງໄດ້ທັງໝົດ 49.628 ຄອບຄົວ ເທົ່າກັບ 91,21%, ຮັບຮອງເປັນບ້ານສາມັກຄີປອງດອງໄດ້ 270 ບ້ານ ເທົ່າກັບ 95,07%, ປະກາດຮັບຮອງເມືອງສາມັກຄີປອງດອງ 6 ເມືອງ ຄື: ເມືອງທ່າພະບາດ, ປາກຊັນ, ຄຳເກີດ, ປາກກະຕິງ, ບໍລິຄັນ ແລະ ວຽງທອງ ເທົ່າກັບ 85,71%.

ປຸກລະດົມເງິນປະກອບສ່ວນຊ່ວຍຄອບຄົວເຈັບເປັນ ຢູ່ບ້ານທົ່ງນ້ອຍ ເມືອງປາກຊັນ ຈຳນວນ 3.230.000 ກີບ, ປຸກລະດົມ ເຄື່ອງອຸປະໂພກ, ບໍລິຝຶກ, ເຂົ້າສານ, ເຄື່ອງນຸ່ງຫົ່ມຊ່ວຍຄອບຄົວທຸກຍາກ, ຄອບຄົວອານາຖາ ຈຳນວນ 44 ຄອບຄົວ, ລວມມູນຄ່າ 67.090.000 ກີບ ແລະ ຄະນະ ອພສ ເມືອງປາກກະຕິງ ຍັງໄດ້ສ້າງກອງຜ້າປ່າສາມັກຄີ ເພື່ອສົມທົບທຶນ ກໍ່ສ້າງອາລາມວັດບ້ານໂພນຈະເລີນ ຈຳນວນເງິນ 147,398,000 ກີບ, ມອບໂທລະໂຄງ ຈຳນວນ 1 ຊຸດ ເປັນມູນຄ່າ 15.000.000 ກີບ ໃຫ້ອົງການປົກຄອງບ້ານນໍ້າອ້ອນ ເມືອງໄຊຈຳພອນ ເພື່ອນຳໃຊ້ເຂົ້າໃນວຽກງານລວມຂອງບ້ານ, ຕິດຕາມກວດກາ ແລະ ປະກອບສ່ວນເຂົ້າຮ່ວມ ແກ້ໄຂຂໍ້ຂັດແຍ່ງ, ປະກົດການຫຍໍ້ທໍ້ຕ່າງໆ ຢູ່ພາຍໃນແຂວງໄດ້ 111 ຄັ້ງ.

ຕອນທ້າຍ ຍັງໄດ້ມອບໃບຍ້ອງຍໍຂອງປະທານແນວລາວສ້າງຊາດແຂວງ ໃຫ້ແກ່ຄະນະກຳມະການແນວລາວສ້າງຊາດແຂວງ ທີ່ໄດ້ປະກອບສ່ວນເຂົ້າໃນວຽກງານປະຈຳປີ 2022 ໃຫ້ກຽດມອບໂດຍທ່ານ ບຸນຄຳ ໄຊເຍຍລໍວື່ ຄະນະປະຈຳພັກແຂວງ ປະທານແນວລາວສ້າງຊາດແຂວງ.

• Facebook
• Twitter
• Line