ໄຊຈຳພອນ ປະກາດຮັບຮອງ 2 ບ້ານ ເປັນບ້ານປ້ອງກັນຊາດເຂັ້ມແຂງ

ພິທີປະກາດຮັບຮອງເອົາບ້ານວັງບານ ແລະ ບ້ານໂພນຄຳ ເປັນບ້ານປ້ອງກັນຊາດເຂັ້ມແຂງ ເປັນບ້ານທີ 3 ແລະ ທີ 4 ຂອງເມືອງໄຊຈຳພອນ ໄດ້ຈັດຂຶ້ນໃນວັນທີ 16 ກຸມພາ 2023 ທີ່ຫ້ອງການບ້ານໂພນຄຳ, ໃຫ້ກຽດເຂົ້າຮ່ວມໂດຍທ່ານ ໂກ່ ໄຊສົມບັດ ເຈົ້າເມືອງໄຊຈຳພອນ ແລະ ທ່ານ ພັທ ວຽງໄຊ ຈັນທະບຸນມີ ຫົວໜ້າກອງບັນຊາການທະຫານເມືອງ, ມີເລຂາພັກບ້ານ-ນາຍບ້ານທັງ 2 ບ້ານ ພ້ອມດ້ວຍອົງການປົກຄອງບ້ານ, ປະຊາຊົນ ແລະ ແຂກຖືກເຊີນ ເຂົ້າຮ່ວມ.

ທ່ານ ບົວວຽງ ຜີວໄຊຍະວົງ ເລຂາພັກບ້ານ-ນາຍບ້ານໂພນຄຳ ໄດ້ໃຫ້ຮູ້ວ່າ: ຜ່ານການປະເມີນຜົນຕາມ 6 ມາດຖານເຫັນວ່າ: ບ້ານ ໂພນຄຳ ແລະ ບ້ານວັງບານ ມີພົນລະເມືອງທັງໝົດ 1.376 ຄົນ, ຍີງ 671 ຄົນ, ມີ 209 ຫຼັງຄາເຮືອນ, ມີ 236 ຄອບຄົວ, ໃດ້ເຂົ້າປະເມີນຕົວຈີງ 236 ຄອບຄົວ, ໄດ້ຮັບໃບຢັ້ງຢືນຄອບຄົວປ້ອງກັນຊາດເຂັ້ມແຂງ 236 ຄອບຄົວ ເທົ່າກັບ 100% ຂອງຄອບຄົວທັງໝົດ ແລະ ສາມາດຮັບຮອງເປັນບ້ານປ້ອງກັນຊາດເຂັ້ມແຂງ, ເປັນບ້ານທີ 3 ແລະ ທີ 4 ຂອງເມືອງໄຊຈຳພອນ ແລະ ເປັນບ້ານທີ 46 ແລະ 47 ຂອງແຂວງບໍລິຄຳໄຊ.

ໃນຕອນທ້າຍພິທີ ທ່ານ ໂກ່ ໄຊສົມບັດ ເຈົ້າເມືອງໄຊຈຳພອນ ໄດ້ເນັ້ນໃຫ້ອົງການປົກຄອງບ້ານ ສືບຕໍ່ສືກສາອົບຮົມການເມືອງແນວຄິດໃຫ້ປະຊາຊົນ ແລະ ປະຕິບັດແນວທາງ ປ້ອງກັນຊາດປ້ອງກັນຄວາມສະຫງົບທົ່ວປວງຊົນຮອບດ້ານ, ສືບຕໍ່ຍູ້ແຮງການຜະລິດກະກຳຂອງປະຊາຊົນ ຫັນປ່ຽນແບບມີວິທະຍາສາດ, ເພີ່ມຄວາມສາມັກຄີ ອານຸລັກຮັກສາຮິດຄອງປະເພນີທີ່ດີງາມ, ເອົາໃຈໃສ່ປັບປຸງກໍ່ສ້າງກຳລັງ ປກຊ, ປກສ ບ້ານຂອງຕົນເອງ ໃຫ້ມີຄວາມສະຫງົບໂດຍພື້ນຖານ ເພື່ອໃຫ້ກາຍເປັນບ້ານປ້ອງກັນຊາດເຂັ້ມແຂງ ທີ່ມີຄຸນນະພາບ ເພື່ອປະກອບສ່ວນໃນການສ້າງສາພັດທະນາບ້ານເມືອງ ໃຫ້ມີການຂະຫຍາຍຕົວຂຶ້ນເປັນກ້າວໆ.

• Facebook
• Twitter
• Line