ເພື່ອຕິດຕາມ, ກວດກາການຈັດຕັງປະຕິບັດວຽກງານພາກສະໜາມ ໂຄງການຂຸດຄົ້ນ – ປຸງແຕ່ງຄຳເຄົ້າ (ແບບທົດລອງ) ແລະ ຈັດກອງປະຊຸມປືກສາຫາລື, ໃນວັນທີ 7 ກຸມພາ 2023 ເຊິ່ງນຳພາໂດຍ ທ່ານ ແສງແກ້ວ ໃສມະນີ ຮອງເຈົ້າເມືອງຄໍາເກີດ ແລະ ທ່ານ ອຸທອນ ສິງຫາດວງບັນຍາ ຮອງພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງບໍລິຄຳໄຊ ພ້ອມດ້ວຍຄະນະທີມງານພາກສ່ວນທີ່ກ້ຽວຂ້ອງຂັ້ນແຂວງ, ຂັ້ນເມືອງ, ມີນາຍບ້ານວັງຜາ, ບ້ານວັງກໍ່, ບ້ານທົ່ງແຄະ ແລະ ບ້ານນາທ່ອນ ເຂົ້າຮ່ວມ.
ໃນພິທີ ໄດ້ຮັບຟັງສະພາບລວມຂອງໂຄງການບໍ່ຄໍາ ບໍລິສັດ ທ້າຍຊານ ມິງຈີນ ມາຍນີ້ງ ຈຳກັດ ເຊິ່ງເປັນໂຄງການ ຮ່ວມມືຂອງບໍລິສັດລັດ 20 ມັງກອນພັດທະນາ ກະຊວງປ້ອງກັນປະເທດ ຮ່ວມກັບ ບໍລິສັດ ແສງອາລຸນ ຂຸດຄົ້ນແຮ່ – ຫີນ ອຸດສາຫະກຳຈຳກັດ ແລະ ບໍລິສັດ ບໍລິຄຳໄຊ ມາຍນີ້ງຈຳກັດ ເຊິ່ງໄດ້ຮັບການເຊັນສັນຍາສຳຫຼວດ, ຂຸດຄົ້ນ – ປຸງແຕ່ງຄໍາເຄົ້າ (ແບບທົດລອງ) ກັບ ລັດຖະບານແຫ່ງ ສປປ ລາວ ໃນເນື້ອທີ່ 24,28 ກິໂລຕາແມັດ ຢູ່ເຂດບ້ານວັງຜາ, ວັງກໍ່, ທົ່ງແຄະ, ນາກະດົກ ແລະ ນາທ່ອນ ເມືອງຄຳເກີດ, ໂດຍມີພະນັກງານກຳມະກອນ 126 ຄົນ, ຍິງ 14, ໃນນັ້ນມີ ພະນັກງານຄົນຈີນ 39 ຄົນ, ຍິງ 1 ຄົນ.
ໂຄງການດັ່ງກ່າວ ໄດ້ມີການເຈາະອຸໂມງສໍາຫຼວດທີ່ມີຂະໜາດຕັ້ງແຕ່ 1,5 x 2 ແມັດ ຈົນເຖິງຂະໜາດ 3 x 3 ແມັດ, ລວມທັງໝົດ 13 ອຸໂມງ ມີຄວາມຍາວຂອງອຸໂມງທັງໝົດ 5422 ແມັດ ແຕ່ເນື່ອງຈາກການເຈາະອຸໂມງບາງແຫ່ງບໍ່ພົບກັບສາຍແຮ່ຈຶ່ງໄດ້ຢຸດເຈາະແລ້ວ 9 ອຸໂມງ ສືບຕໍ່ເຈາະ 4 ອຸໂມງ, ເຈາະຂຸມສ້າງ ແລະ ອຸໂມງຂະໜາດນ້ອຍ 10 ອຸໂມງ ເຊິ່ງການເຈາະບາງອຸໂມງ ແມ່ນເຈາະຕາມຂຸມສ້າງເກົ່າຂອງການລັກລອບຂຸດຄົ້ນໃນເມື່ອກ່ອນ ແລະ ບາງອຸໂມງເປັນການເຈາະໃໝ່, ເຊິ່ງມາຮອດປັດຈຸບັນໄດ້ຢຸດເຈາະແລ້ວ 8 ອຸໂມງ ແລະ ຍັງສຶບຕໍ່ 2 ອຸໂມງ.
ຫຼັງຈາກນັ້ນ ຜູ້ເຂົ້າຮ່ວມກອງປະຊຸມ ຍັງໄດ້ເດີ່ນທາງໄປເບິ່ງການຈັດຕັ້ງປະຕິບັດແຕ່ລະກິດຈະກໍາຂອງໂຄງການ ຢູ່ພາກສະໜາມຕົວຈິງ, ແລ້ວກໍ່ຈະໄດ້ຈັດກອງປະຊຸມປືກສາຫາລືປະກອບຄຳຄິດເຫັນຢ່າງກົງໄປກົງມາ ກ່ຽວກັບບັນຫາການນຳໃຊ້ ແລະ ປັບປຸງຄຸນນະພາບນໍ້າ, ການປັບປຸງ ແລະ ສ້ອມແປງເສັ້ນທາງ, ການຄຸ້ມຄອງສັດລ້ຽງຂອງປະຊາຊົນ ຢູ່ເຂດສຳປະທານ, ໃຫ້ກວດຄືນຂໍ້ມູນເນື້ອທີ່ຂອງປະຊາຊົນ ທີ່ຖືກຜົນກະທົບຈາກ 11 ຄອບຄົວ ແລະ ບັນຫາອື່ນໆ.
Users Today : 1211
Users Yesterday : 494
This Month : 9052
This Year : 129089
Total Users : 515313
Who's Online : 41