ກອງປະຊຸມຄົບຄະນະ ປະຈຳປີ 2022 ຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ 11 ແຂວງບໍລິຄຳໄຊ ໄດ້ຈັດຂຶ້ນໃນຕອນເຊົ້າຂອງວັນທີ 30 ມັງກອນ 2023 ຢູ່ຫ້ອງປະຊຸມຂອງສະພາປະຊາຊົນແຂວງບໍລິຄຳໄຊ ໂດຍພາຍໃຕ້ການເປັນປະທານຂອງທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງ, ມີສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກການ ແລະ ແຂກຖືກເຊີນ ເຂົ້າຮ່ວມ.
ໃນໄລຍະ 1 ປີຜ່ານມາ ການເຄື່ອນໄຫວວຽກງານ ມີບາງດ້ານທີ່ພົບກັບຄວາມຫຍຸ້ງຍາກ ແລະ ເປັນສິ່ງທ້າທາຍ ແຕ່ເຖິງຢ່າງໃດກໍ່ຕາມ ການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ເຫັນວ່າມີຫຼາຍດ້ານທີ່ເປັນສິ່ງອໍານວຍຄວາມສະດວກ ເຮັດໃຫ້ວຽກງານບັນລຸຕາມຕາມຄາດໝາຍທີ່ໄດ້ກຳນົດໄວ້ ເຊິ່ງສະແດງອອກຜົນສຳເລັດແຕ່ລະດ້ານ ຄື: ເຂົ້າຮ່ວມພິຈາລະນາຮັບຮອງເອົາການສ້າງ ແລະ ປັບປຸງກົດໝາຍ ໃນກອງປະຊຸມສະໄໝສາມັນເທື່ອທີ 3 ແລະ 4 ຂອງສະພາແຫ່ງຊາດ ຊຸດທີ IX ຈຳນວນ 21 ສະບັບ, ພິຈາລະນາຮັບຮອງເອົານິຕິກຳໃຕ້ກົດໝາຍຕາມການສະເໜີຂອງອົງການປົກຄອງແຂວງຢູ່ໃນກອງປະຊຸມສະໄໝສາມັນ ເທື່ອທີ 2, 3 ຂອງສະພາປະຊາຊົນແຂວງບໍລິຄໍາໄຊຊຸດທີ II ຈໍານວນ 06 ສະບັບ, ເຂົ້າຮ່ວມກອງປະຊຸມກັບຄະນະປະຈຳສະພາແຫ່ງຊາດ ໃນການຕົກລົງບັນຫາສຳຄັນພື້ນຖານຂອງຊາດ ຈຳນວນ 198 ເນື້ອໃນ ແລະ ຮັບຮອງເປັນມະຕິຈຳນວນ 7 ສະບັບ.
ເຂົ້າຮ່ວມຕິດຕາມ ກວດກາ ການພິຈາລະນາຄຳຕັດສິນຂອງສານ ກ່ຽວກັບຄະດີອາຍາ ແລະ ຄະດີແພ່ງ ໄດ້ຈຳນວນ 18 ຄັ້ງ ມີ 97 ເລື່ອງ, ພິຈາລະນາແກ້ໄຂຄຳຮ້ອງທຸກຂອງປະຊາຊົນທີ່ຍື່ນຜ່ານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະພາປະຊາຊົນແຂວງ ລວມທັງໝົດ 32 ເລື່ອງ ແລະ ຄ້າງມາ 2 ເລື່ອງ, ລວມເປັນ 34 ເລື່ອງ, ໃນນີ້ ມີຄຳສະເໜີຈຳນວນ 19 ເລື່ອງ, ຄຳຮ້ອງຂໍຄວາມເປັນທຳ 15 ເລື່ອງ, ໃຫ້ຄຳປຶກສາທາງດ້ານກົດໝາຍແກ່ປະຊາຊົນບັນດາເຜົ່າ 22 ຄັ້ງ 47 ຄົນ, ລົງໂຄສະນາເຜີຍແຜ່ຜົນສຳເລັດ ຂອງກອງປະຊຸມສະໄໝສາມັນ ເທື່ອທີ 2, 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງບໍລິຄຳໄຊ ຊຸດທີ II ເຊິ່ງສາມາດເຄື່ອນໄຫວໄດ້ທັງໝົດ 124 ຈຸດ ໃນນັ້ນ ມີ 100 ບ້ານ, ມີ 5 ກົມກອງ, 12 ສຳນັກເມືອງ, 3 ໂຮງຮຽນ, 1 ດ່ານປະເພນີ ແລະ ຂັ້ນແຂວງ 6 ຈຸດ, ໄດ້ຮັບຄຳສະເໜີ ຈຳນວນ 445 ຂໍ້, ລະດົມມອບເຄື່ອງອຸປະໂພກ-ບໍລິໂພກ, ອຸປະກອນການຮຽນ, ຄອມພິວເຕີ, ເຄື່ອງຈັກດູດນໍ້າ, ໃຫ້ໂຮງຮຽນ, ກົມກອງ ແລະ ປະຊາຊົນບັນດາເຜົ່າ ລວມມູນຄ່າ 85,363.000 ກີບ ແລະ 1.500 ໂດລາສະຫະລັດ, ພິເສດແມ່ນໄດ້ລະດົມທຶນໃນການກໍ່ສ້າງຂົວອູ່ຂ້າມນໍ້າສະໂງຍບ້ານຄໍາກູນາ ເມືອງໄຊຈຳພອນ ລວມມູນຄ່າທັງໝົດ 176.784.000 ກີບ.
ກອງປະຊຸມຍັງໄດ້ປະກອບຄຳເຫັນຕໍ່ບົດລາຍງານດັ່ງກ່າວ ແລະ ການຮັບຮອງເອົາບົດລາຍງານການຕິດຕາມ ກວດກາ ກ່ຽວກັບການສ້າງວິຊາຊີບ, ການພັດທະນາສີມືແຮງງານ ແລະ ວຽກເຮັດງານທຳໃຫ້ປະຊາຊົນ ເພື່ອແກ້ໄຂບັນຫາການວ່າງງານຢູ່ພາຍໃນແຂວງບໍລິຄຳໄຊ.
Users Today : 1180
Users Yesterday : 494
This Month : 9021
This Year : 129058
Total Users : 515282
Who's Online : 38