ບໍລິຄຳໄຊ ສະຫຼຸບການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ 5 ປີ

ກອງປະຊຸມ ສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະ ວຽກງານ 3 ສ້າງ ທົ່ວແຂວງບໍລິຄຳໄຊ 5 ປີ ( 2016 – 2020 ) ໄດ້ຈັດຂຶ້ນໃນຕອນເຊົ້າຂອງວັນທີ 28 ພະຈິກ 2022 ຢູ່ຫ້ອງປະຊຸມຫ້ອງວ່າການແຂວງ ພາຍໃຕ້ການເປັນປະທານຂອງທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງບໍລິຄຳໄຊ, ມີຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກການ ພ້ອມດ້ວຍຂະແໜງການກ່ຽວຂ້ອງ ເຂົ້າຮ່ວມ.

ຕະຫຼອດໄລຍະ 5 ປີຜ່ານມາ ແຂວງໄດ້ຫັນພະນັກງານຫຼັກແຫຼ່ງລົງກໍ່ສ້າງຮາກຖານການເມືອງຕາມສະພາບ ແລະ ຈຸດພິເສດຂອງແຕ່ລະເມືອງ, ແຕ່ລະບ້ານ ຕິດພັນກັບການສ້າງພະນັກງານນຳພາຄຸ້ມຄອງ ເພື່ອກະກຽມໃສ່ກອງປະຊຸມ 3 ຂັ້ນ.

ນອກຈາກນັ້ນ, ການລົງກໍ່ສ້າງຮາກຖານການເມືອງ ແມ່ນໄດ້ລົງແບບປະຈຳປົກກະຕິ, ຕາມຈຸດຫຼໍ່ແຫຼມ, ລົງແກ້ໄຂຕາມກໍລະນີ ແລະ ຕາມຂະແໜງການສາຍຕັ້ງ ເຊິ່ງມີພະນັກງານລົງກໍ່ສ້າງຮາກຖານການເມືອງ ທັງໝົດ 997 ສະຫາຍ, ຍິງ 63 ສະຫາຍ, ສາມາດປັບປຸງອົງການປົກຄອງບ້ານຕາມລະບົບ 5 ໜ່ວຍງານສຳເລັດ 100%, ບ້ານທີ່ມີຫ້ອງການບ້ານ ແລະ ປະຈຳການໄດ້ 197 ບ້ານ, ປັບປຸງ ແລະ ສ້າງກົດລະບຽບບ້ານໄດ້ທັງໝົດ 284 ບ້ານ ກວມເອົາ 100%.

ການແກ້ໄຂຄວາມທຸກຍາກ ທົ່ວແຂວງມີ 7 ເມືອງ, ມີ 284 ບ້ານ, ມີ 55.716 ຄອບຄົວ ເພີ່ມຂື້ນ 8.947 ຄອບຄົວ, ພົນລະເມືອງ 314.579 ຄົນ, ຍິງ 157,371 ຄົນ ເພີ່ມຂື້ນ 38.053 ຄົນ ( ທຽບໃສ່ປີ 2016 ), ຄອບຄົວທຸກຍາກຍັງເຫຼືອ 3.172 ຄອບຄົວ, ກວມ 5,69% ລຸດລົງ 916 ຄອບຄົວ ຫຼື 1,64%, ຄອບຄົວອານາຖາ 102 ຄອບຄົວ, ບ້ານທຸກຍາກຍັງເຫຼືອ 35 ບ້ານກວມ 12,32%, ເມືອງທຸກຍາກ 2 ເມືອງ ຄື: ເມືອງວຽງທອງ, ເມືອງໄຊຈຳພອນ, ມີຄອບຄົວພັດທະນາ 11.366 ຄອບຄົວ, ກວມ 97,71%, ເພີ່ມຂື້ນ 1.894 ຄອບຄົວ, ກວມ 3,39%, ແລະ ສ້າງບ້ານພັດທະນາໄດ້ 216 ບ້ານກວມ 76,06%, ເພີ່ມຂື້ນ 12 ບ້ານ ກວມ 4,22%.

ການສ້າງແຂວງເປັນຫົວໜ່ວຍຍຸດທະສາດຕາມ 7 ດ້ານ, ແຂວງບໍລິຄຳໄຊບັນລຸ 6 ດ້ານ ທົ່ວແຂວງ ມີ 66 ຕົວຊີ້ບອກ, ສາມາດຈັດຕັ້ງປະຕິບັດ ບັນລຸ 58 ຕົວຊີ້ບອກ, ເທົ່າກັບ 87 87%, ຕົວຊີ້ບອກບໍ່ສາມາດບັນລຸ 8 ຕົວຊີ້ບອກ, ເທົ່າກັບ 12,12%, ການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ຕາມ 5 ດ້ານ 47 ຊີ້ບອກ, ເມືອງບັນລຸ 5 ດ້ານ ມີ 6 ເມືອງ, ເມືອງບັນລຸ 4 ດ້ານ ມີ 4 ເມືອງ, ເມືອງບັນລຸ 3 ດ້ານ ມີ 1 ເມືອງ, ສ້າງບ້ານເປັນຫົວໜ່ວຍພັດທະນາ 4 ດ້ານ 30 ຕົວຊີ້ບອກ, ບ້ານພັດທະນາ 4 ດ້ານ ມີ 176 ບ້ານ ກວມ 61,97% ຂອງຈຳນວນບ້ານທົ່ວແຂວງ, ບ້ານພັດທະນາ 3 ດ້ານ ມີ 59 ບ້ານ, ບ້ານພັດທະນາ 2 ດ້ານ ມີ 33 ບ້ານ, ບ້ານພັດທະນາ 1 ດ້ານ ມີ 8 ບ້ານ ແລະ ບ້ານທີ່ບໍ່ບັນລຸຈັກດ້ານມີ 8 ບ້ານ.

ຫຼັງຈາກນັ້ນ ໃນກອງປະຊຸມ ກໍ່ຍັງໄດ້ຮັບຟັງການລາຍງານບາງວຽກງານພົ້ນເດັ່ນຈາກບັນດາເມືອງ ແລະ ພາກສ່ວນກ່ຽວຂ້ອງ, ພ້ອມນັ້ນ ຍັງມີການແລກປ່ຽນບົດຮຽນເຊິ່ງກັນ ແລະ ກັນ ໃນຫຼາຍບັນຫາສຳຄັນ ທັ້ງນີ້ ກໍ່ເພື່ອສົ່ງເສີມວຽກງານດ້ານດີ, ຮັບປະກັນບາງຂໍ້ຄົງຄ້າງ ໄດ້ຮັບການປັບປຸງແກ້ໄຂ ໃຫ້ມີຄວາມຖືກຕ້ອງສອດຄ່ອງກັບຄວາມເປັນຈິງ ແລ້ວນໍາໄປຈັດຕັ້ງປະຕິບັດໃຫ້ໄດ້ຮັບຜົນສຳເລັດ ໄດ້ຮັບທັງປະລິມານ ແລະ ຄຸນນະພາບ.

• Facebook
• Twitter
• Line