ສຶກສາແຂວງ ຮ່ວມສ້າງຂະບວນການເຕະບານມິດຕະພາບ ກັບການນໍາເມືອງປາກກະດິງ

ໃນຕອນແລງວັນທີ 22 ພະຈິກ 2022 ທີ່ເດີ່ນບານຫຍ້າທຽມ ລີໂອ ເອຟຊີ ເມືອງປາກກະດິງ, ພະແນກສຶກສາທິການ ແລະ ກິລາ ແຂວງບໍລິຄຳໄຊ ຮ່ວມກັບການນໍາເມືອງປາກກະດິງ ໄດ້ຈັດການແຂ່ງຂັນເຕະບານມິດຕະພາບນັດພິເສດ ໂດຍໃຫ້ກຽດເຂົ້າຮ່ວມຂອງ ທ່ານ ຄໍາແຫວນ ປັນຍານຸວົງ ຮອງເຈົ້າແຂວງບໍລິຄໍາໄຊ, ມີການນຳພະແນກສຶກສາທິການ ແລະ ກິລາແຂວງ, ການນໍາເມືອງປາກກະດິງ ພ້ອມດ້ວຍນັກກິລາທັງສອງພາກສ່ວນ ເຂົ້າຮ່ວມ.

ການແຂ່ງຂັນກິລາເຕະບານມິດຕະພາບລະຫວ່າງສອງທີມໃນຄັ້ງນີ້ ແມ່ນເພື່ອເປັນການສ້າງຂະບວນການຊົມເຊີຍວັນສຳຄັນຕ່າງໆຂອງພັກ, ຂອງຊາດ ເວົ້າລວມ, ເວົ້າສະເພາະແມ່ນວັນຊາດທີ 2 ທັນວາ ຄົບຮອບ 47 ປີ ( 2 ທັນວາ 1975 – 2 ທັນວາ 2022 ) ໃຫ້ມີບັນຍາກາດຟົດຟື້ນ ແລະ ເບີກບານມ່ວນຊື່ນ. ນອກນັ້ນ, ກໍຍັງເປັນການສ້າງໂອກາດໃຫ້ກັບນັກກິລາທັງສອງພາກສ່ວນ ໄດ້ອອກກຳລັງກາຍເພື່ອສຸຂະພາບທີ່ດີ ແລະ ເປັນການຜູກສຳພັນທະໄມຕີໃຫ້ມີຄວາມສະໜິດແໜ້ນຂຶ້ນຕື່ມ.

ຜ່ານການແຂ່ງຂັນ ຜົນປະກົດວ່າ ທັງສອງຝ່າຍບໍ່ສາມາດເອົາຊະນະກັນໄດ້ ເປັນການສະເໝີກັນໄປແບບມິດຕະພາບ ແລະ ແບບສຸດມັນ 6 ປະຕູຕໍ່ 6, ຊຶ່ງໃນໄລຍະການແຂ່ງຂັນແມ່ນເຕັມໄປດ້ວຍຄວາມເບີກບານມ່ວນຊື່ນ, ມີໄມຕີຈິດມິດຕະພາບ ແລະ ນັກກິລາທັງສອງຝ່າຍຫຼິ້ນກັນດ້ວຍນ້ຳໃຈ, ຮູ້ໃຫ້ອະໄພເຊິ່ງກັນ ແລະ ກັນ ສົມກັບວ່າການແຂ່ງຂັນກິລາເພື່ອມິດຕະພາບຢ່າງແທ້ຈິງ.

ການແຂ່ງຂັນຄັ້ງນີ້ ທ່ານ ປະສົງ ບຸນສະຫວັນ ຮອງປະທານບໍລິສັດຄົບຫີນ ເມືອງປາກກະດິງ ອຸປະຖໍາເສື້ອກິລາໃຫ້ທີມພະແນກສຶກສາທິການ ແລະ ກິລາແຂວງ ຈໍານວນ 20 ຊຸດ ມູນຄ່າ 1.700.000 ກີບ.

• Facebook
• Twitter
• Line