ໃນວັນທີ 11 ພະຈິກ 2022 ຢູ່ຫ້ອງການບ້ານນາຫາດ ເມືອງຄຳເກີດ ໄດ້ຈັດກອງປະຊຸມຊີ້ແຈງຄອບຄົວຕົວແບບດ້ານໂພຊະນະການ ໂດຍການເປັນປະທານຂອງທ່ານ ຜາສຸກ ຈູມມາລາວົງ ຮອງເຈົ້າເມືອງຄຳເກີດ ຄະນະກຳມະການດ້ານໂພຊະນະການຂັ້ນເມືອງ ແລະ ທ່ານ ດຣ ອຳພອນ ພົມມະສານ ຫົວໜ້າຫ້ອງການສາທາລະນະສຸກເມືອງ, ມີອຳນາດການປົກຄອງບ້ານ, ຄະນະໂພຊະນະການຂັ້ນແຂວງ, ຂັ້ນເມືອງ ຈາກເມືອງວຽງທອງ ແລະ ເມືອງໄຊຈຳພອນ ເຂົ້າຮ່ວມ.
ທ່ານ ດຣ ອຳພອນ ພົມມະສານ ໄດ້ຊີ້ແຈງບ້ານຕົວແບບດ້ານໂພຊະນະການ ແລະ ມາດຕະຖານ 23 ຕົວຊີ້ວັດໃຫ້ແກ່ຄະນະໂພຊະນະການຂັ້ນບ້ານ, ຂັ້ນເມືອງ, ຈຸດປະສົງ ເພື່ອແນ່ໃສ່ສ້າງໃຈກາງຕົວແບບດ້ານກົນໄກການປະສານງານ, ການຈັດຕັ້ງຍຸດທະສາດແບບໜຶ່ງດຽວໂດຍຫຼາຍຂະແໜງການ ແລະ ເພື່ອການແກ້ໄຂບັນຫາການຂາດສານອາຫານໂດຍເນັ້ນໃສ່ໄລຍະ 1.000 ວັນທຳອິດຂອງຊີວິດ, ການຫັນປ່ຽນພຶດຕິກຳແບບດັ້່ງເດີມ, ຄວາມເຊື່ອຖື ແລະວິຖີຊີວິດການກີນແບບເກົ່າ ມາເປັນການດຳລົງຊີວິດແບບຖຶກຫຼັກໂພຊະນະການແບບຍືນຍົງ, ແກ້ໄຂຄວາມທຸກຍາກຂອງປະຊາຊົນ ໃຫ້ກາຍເປັນຕົວແບບທີ່ດີໃນວຽກງານຍຸດທະສາດໜຶ່ງດຽວ ແລະ ພ້ອມທັງຂະຫຍາຍຖອດຖອນບົດຮຽນໃຫ້ແກ່ບ້ານຊຸມຊົນອື່ນຕໍ່ໆໄປ.
ກອງປະຊຸມ ໄດ້ຜ່ານຂໍ້ຕົກລົງບ້ານຕົວແບບດ້ານໂພຊະນະການ ແລະ ແຕ່ງຕັ້ງຄະນະໂພຊະນະການຂັ້ນບ້ານ, ພ້ອມນັ້ນຄະນະໂພຊະນະການກໍ່ໄດ້ປະກອບຄຳຄິດຄຳເຫັນ ແລະ ຖອດຖອນບົດຮຽນເພື່ອເຮັດໃຫ້ມີຄວາມເຂົ້າໃຈເອກະພາບກັນ, ຕອນທ້າຍກອງປະຊຸມ ທ່ານ ຜາສຸກ ຈູມມາລາວົງ ຍັງໄດ້ຮຽກຮ້ອງມາຍັງບັນດາຄະນະໂພຊະນະການຂັ້ນບ້ານ ໃຫ້ນຳເອົາເນື້ອໃນກອງປະຊຸມໄປຈັດຕັ້ງປະຕິບັດດ້ວຍການໂຄສະນາເຜີຍແຜ່ໃຫ້ແກ່ບັນດາຄອບຄົວພາຍໃນບ້ານ ເພື່ອເຮັດໃຫ້ຜູ້ປົກຄອງໄດ້ຮັບຮູ້ ແລະ ເຂົ້າໃຈ ພ້ອມກັນລ້ຽງລູກໆໃຫ້ຖືກຫຼັກໂພຊະນະການ.
ເພື່ອສືບຕໍ່ຊຸກຍູ້ ສົ່ງເສີມການປ່ຽນແປງພຶດຕິກຳດ້ານໂພຊະນາການ ໃຫ້ເຂົ້າເຖີງຊຸມຊົນ ໃນວັນທີ 14 ພະຈິກ 2022 ຄະນະຮັບຜິດຊອບວຽກງານໂພຊະນະການຂັ້ນເມືອງ ໄດ້ຈັດກອງປະຊຸມວຽກງານດັ່ງກ່າວ ຢູ່ຫ້ອງການບ້ານ ໂພນທອງ ໂດຍການເປັນປະທານຂອງ ທ່ານ ຜາສຸກ ຈູມມາລາວົງ ຮອງເຈົ້າເມືອງຄຳເກີດ, ໂດຍມີອຳນາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
Users Today : 1208
Users Yesterday : 494
This Month : 9049
This Year : 129086
Total Users : 515310
Who's Online : 47