ໃນວັນທີ 2 ພະຈິກ 2022 ທ່ານ ຄໍາແພນ ວິລືທໍາ ເຈົ້າເມືອງວຽງທອງ ໄດ້ລົງຊຸກຍູ້ການຜະລິດກະສີກໍາການປູກ – ການລ້ຽງຂອງຄອບຄົວ ທ່ານ ຊຽງບານ ສີບູນເຮືອງ ປະຊາຊົນຢູ່ບ້ານນາເພີນ, ເມືອງວຽງທອງ ເຊີ່ງເປັນຄອບຄົວຕົວແບບໃນການລ້ຽງສັດແບບປະສົມປະສານ ເຊີ່ງເປັນພື້ນຖານໃນການສ້າງເສດຖະກິດຄອບຄົວ ເຮັດໃຫ້ຫລຸດພົ້ນອອກຈາກຄວາມທຸກຍາກເທື່ອລະກ້າວ.
ທ່ານ ຊຽງບານ ໃຫ້ຮູ້ວ່າ ໄດ້ເລີ່ມລ້ຽງສັດມາແຕ່ປີ 2018 ເປັນຕົ້ນມາ ເຖີງປະຈຸບັນນີ້ມີງົວ 45 ໂຕ, ຄວາຍ 32 ໂຕ, ແບ້ 30 ໂຕ, ໝູ 15 ໂຕ, ໜອງປາ 4 ໜອງ ແລະ ສັດປີກຈໍານວນ 50 ກ່ວາໂຕ, ລວມເນື້ອທີ່ຄັງລ້ຽງສັດທັງໝົດ 10 ກ່ວາ ເຮັກຕາ ໂດຍໄດ້ແບ່ງເປັນລັອກ, ເຊິ່ງກິດຈະການດັ່ງກ່າວ ແມ່ນນຳໃຊ້ທຶນຂອງຕົນເອງ, ພ້ອມນັ້ນ ຍັງໄດ້ເຮັດສວນມັນຕົ້ນ 4 ເຮັກຕາອີກ, ສ້າງລາຍຮັບໃຫ້ຄອບຄົວ ສະເລ່ຍ 100 ກ່ວາລ້ານກີບຕໍ່ປີ.
ສຳລັບທິດທາງແຜນການໃນຕໍ່ໜ້າ ຈະຢຶດໝັ້ນອາຊີບດັ່ງກ່າວນີ້ໃຫ້ມີຄວາມໝັ້ນຄົງຍາວນານ, ລ້ຽງສັດ ໃຫ້ຫຼາຍຂຶ້ນ, ຂະຫຍາຍເນື້ອທີ່ປູກຫຍ້າສັດເພີ່ມ ເພື່ອເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນເລື້ອຍໆ ແລະ ພ້ອມທີ່ຈະຖອດຖອນບົດຮຽນໃຫ້ແກ່ຄອບຄົວ ທີ່ຮັກມັກອາຊີບກະສິກໍາຢ່າງຈິງໃຈ.
ທ່ານເຈົ້າເມືອງວຽງທອງ ໄດ້ໃຫ້ຄວາມຍ້ອງຍໍຊົມເຊີຍຕໍ່ຜົນງານ, ແນວຄິດ, ຄວາມສາມາດ ທີ່ສ້າງສາພັດທະນາຄອບຄົວເຮັດໃຫ້ມີລາຍຮັບທີ່ດີ, ໃຫ້ສືບຕໍ່ພັດທະນາເພື່ອໃຫ້ຄອບຄົວອື່ນໆໄດ້ຖອດຖອນບົດຮຽນຕໍ່ໄປ.
Users Today : 1203
Users Yesterday : 494
This Month : 9044
This Year : 129081
Total Users : 515305
Who's Online : 40