ເທບພະຈັນ – ໄວຫວານຮາດບິດ ຈັດອົບຮົມວຽກງານສະກັດກັ້ນອັກຄີໄພ

ເພື່ອສຶບຕໍ່ຈັດຕັ້ງປະຕິບັດ ການເຄື່ອນໄຫວໂຄສະນາເຜີຍແຜ່, ຝຶກອົບຮົມວຽກງານ ສະກັດກັ້ນ ແລະ ຕ້ານ ອັກຄີໄພ ໃນທົ່ວແຂວງ ໃຫ້ສໍາເລັດຕາມລະດັບຄາດໝາຍ ທີ່ໄດ້ກໍານົດໄວ້, ໃນວັນທີ 21 ຕຸລາ 2022 ພະແນກຕໍາຫຼວດສະກັດກັ້ນ ແລະ ຕ້ານ ອັກຄີໄພ ປກສ ແຂວງ ບໍລິຄໍາໄຊ, ໄດ້ລົງເຄື່ອນໄຫວໂຄສະນາເຜີຍແຜ່, ຝຶກອົບຮົມວຽກງານ ສະກັດກັ້ນ ແລະ ຕ້ານ ອັກຄີໄພ ຢູ່ ຮ້ານເທບພະຈັນບັນເທິງ ແລະ ຮ້ານບັນເທິງໄວຫວານຮາດບິດ ເມືອງ ປາກຊັນ ແຂວງ ບໍລິຄໍາໄຊ. ນໍາໂດຍ ທ່ານ ພັນໂທ ຄອນສະຫວັນ ຈະເລີນສຸກ ຮັກສາການຫົວໜ້າພະແນກ ຕຳຫຼວດສະກັດກັ້ນ ແລະ ຕ້ານ ອັກຄີໄພ ປກສ ແຂວງ.

ຄະນະຮັບຜິດຊອບ ຍົກໃຫ້ເຫັນເຖີງສາເຫດ, ຜົນເສຍຫາຍຈາກການເກີດອັກຄີໄພໄຟໄໝ້ຢູ່ຈຸດຕ່າງໆ ທີ່ໄດ້ສ້າງຄວາມເສຍຫາຍທາງດ້ານຊັບສິນ, ສຸຂະພາບ ແລະ ຊີວິດຂອງປະຊາຊົນບັນດາເຜົ່າ ເປັນຈໍານວນຫຼວງຫລາຍໃນແຕ່ລະປີ, ການຝຶກອົບຮົມນີ້ ແມ່ນເພື່ອໃຫ້ບັນດາຜູ້ປະກອບການຮ້ານບັນເທິງ ໄດ້ນໍາເອົາຄວາມຮູ້ດັ່ງກ່າວໄປໝູນໃຊ້ເຂົ້າໃນການປົກປ້ອງສິດຜົນປະໂຫຍດ ເພື່ອຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ພ້ອມທັງໄດ້ອະທິບາຍຄວາມຮູ້ພື້ນຖານກ່ຽວກັບການສະກັດກັ້ນ, ຕ້ານອັກຄີໄພ, ວິທີປະຕິບັດເມື່ອເກິດອັກຄີໄພຂື້ນ, ການເອົາຕົວລອດ, ການຊ່ວຍເຫຼືອຜູ້ຖືກເຄາະຮ້າຍອອກຈາກສະຖານທີເກີດເຫດ, ວິທີການນໍາໃຊ້ອຸປະກອນຂັ້ນພື້ນຖານໃນການດັບມອດໄຟໃນເບື້ອງຕົ້ນ ເຊັ່ນ: ການໃຊ້ຜົງເຄມີແຫ້ງ, ການໃຊ້ນໍ້າມອດໄຟ, ເຄມີໂຟມ, ທາດອາຍບໍ່ຕິດໄຟແລະອື່ນໆ, ອະທິບາຍເຖີງວິທີການກວດກາບັ້ງມອດໄຟ, ລະບົບສຽງສັນຍານເຕືອນໄພ ແລະ ລະບົບນໍ້າປະປາທີ່ຕິດຕັ້ງຕາມຈຸດຕ່າງໆ ໃຫ້ຢູ່ໃນສະພາບພ້ອມໃຊ້ງານຢູ່ສະເໝີ.

ຈາກນັ້ນ, ກໍ່ໄດ້ມີການສາທິດ ແລະ ການນໍາໃຊ້ອຸປະກອນມອດໄຟຂັ້ນພື້ນຖານການຈໍາລອງ ເວລາມີເຫດການໄຟໄໝ້ຈາກຖັງແກັດ ໃຫ້ບັນດາຜູ້ເຂົ້າຮ່ວມຮັບຊົມ ແລະ ຈັດຕັ້ງລົງມືປະຕິບັດທົດລອງໂຕຈິງ, ການມອດໄຟຈາກຖັງແກັດການແກ້ໄຂສະກັດກັ້ນເຫດການໄຟໄໝ້ຂັ້ນພື້ນຖານ ກ່ອນທີ່ເຈົ້າໜ້າທີ່ດັບເພີງມາຊ່ວຍ, ວີທີຊ່ວຍເຫຼືອຕົນເອງ ແລະ ຜູ້ຖືກເຄາະຮ້າຍອອກຈາກສະຖານທີ່ເກີດເຫດໄດ້ຢ່າງປອດໄພ.

ພາຍຫຼັງຝຶກອົບຮົມສໍາເລັດແລ້ວ ທ່ານ ພັນໂທ ຄອນສະຫວັນ ຈະເລີນສຸກ ໄດ້ມອບໃບຢັ້ງຢືນການຝຶກອົບຮົມວິທີສະກັດກັ້ນ ແລະ ການຕ້ານອັກຄີໄພໃຫ້ ຮ້ານເທບພະຈັນບັນເທິງ ແລະ ຮ້ານບັນເທິງໄວຫວານຮາດບິດ.

• Facebook
• Twitter
• Line