ເຜີຍແຜ່ກົດລະບຽບຈະລາຈອນ ແລະ ການຂັບຂີ່ປອດໄພ ຢູ່ 02 ໂຮງຮຽນ ທ່າພະບາດ

ວັນທີ 13 ຕຸລາ 2022 ພະແນກໂຍທາທິການ ແລະ ຂົນສົ່ງ ແຂວງ ບໍລິຄຳໄຊ ໄດ້ສົມທົບກັບພະແນກຕໍາຫຼວດຈະລາຈອນ ປກສ ແຂວງ ບໍລິຄໍາໄຊ ສືບຕໍ່ລົງໂຄສະນາເຜີຍແຜ່ກົດລະບຽບຈະລາຈອນ ແລະ ການຂັບຂີ່ປອດໄພ ຢູ່ 02 ໂຮງຮຽນຄື: ໂຮງຮຽນມັດທະຍົມຕອນຕົ້ນ ທ່າພະບາດ ແລະ ບ້ານທວາຍ ເມືອງທ່າພະບາດ ແຂວງບໍລິຄໍາໄຊ. ນໍາໂດຍ ທ່ານ ບຸນທໍາ ຄໍາມະວົງ ຫົວໜ້າຂະແໜງຂົນສົ່ງ ພະແນກໂຍທາທິການ ແລະ ຂົນສົ່ງແຂວງ ພ້ອມດ້ວຍຄະນະທີມງານ, ມີທ່ານ ຮ້ອຍເອກ ອ່ອນ ດາລາວັນ ຫົວໜ້າກອງໂຄສະນາ ພະແນກຕໍາຫຼວດຈະລາຈອນ ປກສ ແຂວງ, ມີບັນດາອໍານວຍການ, ຄູ – ອາຈານ ແລະ ນ້ອງນັກຮຽນ 02 ໂຮງຮຽນ ເຂົ້າຮ່ວມ.

ທ່ານ ບຸນທໍາ ຄໍາມະວົງ ຫົວໜ້າຂະແໜງຂົນສົ່ງ ພະແນກໂຍທາທິການ ແລະ ຂົນສົ່ງ ແຂວງ, ໄດ້ກ່າວວ່າ: ການເຜີຍແຜ່ໂຄສະນາປູກຈິດສໍານຶກກ່ຽວກັບກົດລະບຽບຈະລາຈອນ, ການຂັບຂີ່ປອດໄພ ແລະ ການສັນຈອນທາງຫຼວງໃຫ້ນ້ອງນັກຮຽນໃນຄັ້ງນີ້ ເພື່ອແນ່ໃສ່ເຮັດໃຫ້ຄູອາຈານ ແລະ ນ້ອງນັກຮຽນໄດ້ຮັບຮູ້, ເຂົ້າໃຈຢ່າງເລິກເຊິ່ງ ພ້ອມນໍາໄປຈັດຕັ້ງປະຕິບັດໃຫ້ຖືກຕ້ອງ ຕາມກົດລະບຽບຈະລາຈອນຢ່າງເຂັ້ມງວດ.

ຫຼັງຈາກນັ້ນ ບັນດາຄະນະຮັບຜິດຊອບຈາກ ພະແນກໂຍທາທິການ ແລະ ຂົນສົ່ງ ແຂວງ, ກອງໂຄສະນາ ພະແນກຕໍາຫຼວດຈະລາຈອນ ປກສ ແຂວງ, ໄດ້ພັດປ່ຽນກັນເຜີຍແຜ່ບັນລະຍາຍ ເອກະສານທີ່ສໍາຄັນ ເຊັ່ນ: ກົດໝາຍວ່າດ້ວຍການຈະລາຈອນທາງບົກ, ບັນດາເຄື່ອງໝາຍ, ປ້າຍຫ້າມ ປ້າຍເຕືອນອັນຕະລາຍ, ປ້າຍກໍານົດ, ປ້າຍບອກສິດ, ປ້າຍແນະນໍາຈຸດໝາຍປາຍທາງ, ສາລະບານເດີນລົດ, ລະບຽບວ່າດ້ວຍການຍ່າງ, ການຂີ່ລົດຖີບ, ການຂັບຂີ່ລົດຈັກ, ລົດໃຫຍ່, ການຂັບຂີ່ລົດໄຖ່ນາເດີນຕາມ.

ຍົກໃຫ້ເຫັນ ດໍາລັດ ເລກທີ 568/ລບ ວ່າດ້ວຍການປັບໃໝຜູ້ລະເມີດກົດໝາຍຈະລາຈອນທາງບົກ, ໜ້າທີ່ ແລະ ຂໍ້ຫ້າມສໍາລັບຜູ້ຂັບຂີ່, ຄວາມສ່ຽງໃນການຍ່າງ ແລະ ວິທີປ້ອງກັນ, ການສັນຈອນ ຫຼື ການຍ່າງຕາມເສັ້ນທາງ, ການຂັບຂີ່ລົດຈັກທຸກຄັ້ງຕ້ອງໃສ່ໝວກກັນກະທົບທັງຜູ້ຂັບ ແລະ ຜູ້ຊ້ອນ.

ພ້ອມທັງສາຍພາບວິດີໂອຈາກການບັນທຶກພາບເຫດການເກີດອຸປະຕິເຫດ, ເຊິ່ງຍົກໃຫ້ເຫັນສາເຫດຕົ້ນຕໍຂອງການເກີດອຸປະຕິເຫດຢູ່ຕາມເສັ້ນທາງຕ່າງໆ ທີ່ເກີດຈາກຂາດການກວດກາສະພາບເຕັກນິກລົດ, ດື່ມສິ່ງມຶນເມົາແລ້ວຂັບລົດ, ການໃຊ້ຄວາມໄວເກີນກໍານົດ, ບໍ່ປ່ອຍສິດ, ລ້ຽວຊ້າຍ – ລ້ຽວຂວາ ແລະ ປ່ຽນທິດທາງເດີນກະທັນຫັນ, ການແຊງບໍ່ຮັບປະກັນ, ເຊີ່ງເປັນສາເຫດຫຼັກກໍ່ໃຫ້ເກີດອຸປະຕິເຫດທີ່ສ້າງຄວາມເສຍຫາຍທາງດ້ານຊັບສິນ, ຊີວິດ ແລະ ສຸຂະພາບ ໃຫ້ບັນດານ້ອງນັກຮຽນໄດ້ຮັບຮູ້, ເຂົ້າໃຈຕໍ່ຜົນຮ້າຍ ແລະ ໄພອັນຕະລາຍດັ່ງກ່າວ. ເນັ້ນໜັກໃຫ້ຄູ-ອາຈານ ແລະ ນ້ອງນັກຮຽນທຸກຄົນ ຈົ່ງພ້ອມກັນນໍາເອົາຄວາມຮູ້ກ່ຽວກັບກົດລະບຽບຈະລາຈອນ ທີ່ໄດ້ຮຽນຮູ້ໃນຄັ້ງນີ້ ໄປຈັດຕັ້ງປະຕິບັດໃຫ້ຖືກຕ້ອງ ມີສະຕິເຄົາລົບ ແລະ ປະຕິບັດກົດລະບຽບຈະລາຈອນ ຢ່າງເຂັ້ມງວດ ແນໃສ່ເຮັດໃຫ້ບັນຫາອຸປະຕິເຫດ ຕາມທ້ອງຖະໜົນ ຢູ່ແຂວງບໍລິຄໍາໄຊ ນັບມື້ຫຼຸດໜ້ອຍຖອຍລົງເທື່ອລະກ້າວ.

ຕອນທ້າຍ ຍັງໄດ້ຈັດກິດຈະກຳ ຖາມ – ຕອບ ເພຶ່ອທົບທວນຄືນຄວາມຮັບຮູ້ຂອງນ້ອງນັກຮຽນ ພ້ອມທັງມອບເສື້ອ ແລະ ໂປຼດສະເຕີ ໃຫ້ຄູອາຈານ ແລະ ນ້ອງນັກຮຽນ.

• Facebook
• Twitter
• Line