ໂຮງຮຽນທິດສະດີການເມືອງ – ການປົກຄອງແຂວງ ຫວນຄືນມູນເຊື້ອ ວັນຄູແຫ່ງຊາດ ຄົບຮອບ 28 ປີ

ໃນຕອນເຊົ້າຂອງວັນທີ 7 ຕຸລາ 2022 ຢູ່ໂຮງຮຽນທິດສະດີການເມືອງ – ການປົກຄອງແຂວງບໍລິຄຳໄຊ ໄດ້ຈັດພິທີສະເຫຼີມສະຫຼອງ ວັນຄູແຫ່ງຊາດ ຄົບຮອບ 28 ປີ ( 7 ຕຸລາ 1994 – 7 ຕຸລາ 2022 ) ໃຫ້ກຽດຫວນຄືນມູນເຊື້ອໂດຍ ທ່ານ ສົມນຶກ ລອງອ່ອນ ຮອງຫົວໜ້າໂຮງຮຽນການເມືອງ – ການປົກຄອງແຂວງ, ມີຄະນະຄູອາຈານ ພ້ອມດ້ວຍນັກສຶກສາທິດສະດີການເມືອງພາຍໃນໂຮງຮຽນ ເຂົ້າຮ່ວມ.

ທ່ານ ສົມນຶກ ລອງອ່ອນ ໄດ້ຍົກໃຫ້ເຫັນເນື້ອໃນບາງຕອນວ່າ: ປະເທດລາວຂອງເຮົາໃນຊຸມປີ 1905 ຄົນລາວທີ່ໄດ້ເຂົ້າໂຮງຮຽນແມ່ນໜ້ອຍທີ່ສຸດ, ໃນນັ້ນ ໄດ້ມີຜູ້ໜຶ່ງຊື່ວ່າ ທ້າວ ຄຳ ໄດ້ຮຽນຮອດຫ້ອງທີ I ຫຼື ຈົບ ປ.6 ໄດ້ເຂົ້າຮ່ວມຝຶກອົບຮົມຄູເປັນຄົນທຳອິດຂອງລາວ, ພາຍຫຼັງສຳເລັດການຝຶກອົບຮົມແລ້ວ ທ້າວ ຄຳ ໄດ້ເຂົ້າຮັບລາຊະການເປັນຄູສອນ ຢູ່ນະຄອນຫຼວງວຽງຈັນ, ໃນເວລານັ້ນ ປະເທດຂອງພວກເຮົາ ໄດ້ຕົກເປັນຫົວເມືອງຂຶ້ນຂອງພວກລ່າເມືອງຂຶ້ນຝຣັ່ງ ປະຊາຊົນລາວຕົກເປັນຂ້ອຍຂ້າມ້າໃຊ້ ເຊິ່ງຝຣັ່ງເອີ້ນວ່າ “ ກູລີ ” ເຮັດໃຫ້ປະຊາຊົນມີຄວາມທຸກທໍລະມານ ບໍ່ມີອິດສາລະພາບ ຍ້ອນຕົກເປັນຂ້າທາດຂອງພວກເຂົາ, ຍ້ອນເຫດຜົນນັ້ນ ນາຍຄູຄຳ ຈຶ່ງໄດ້ຕັດສິນໃຈເຂົ້າຮ່ວມຂະບວນການນຳພາປະຊາຊົນລາວລຸກຮື້ຂຶ້ນ ຕໍ່ສູ້ຕ້ານການຮຸກຮານຂອງພວກລ່າເມືອງຂຶ້ນຝຣັ່ງ.

ປະຫວັດສາດຂະບວນການຕໍ່ສູ້ຂອງປະຊາຊົນລາວບັນດາເຜົ່າ ຕ້ານການຮຸກຮານຂອງພວກລ່າເມືອງຂຶ້ນແບບເກົ່າ ແລະ ແບບໃໝ່ ໄດ້ຜ່ານໄລຍະອັນຍືດເຍື້ອຍາວນານ ແລະ ໄດ້ຮັບໄຊຊະນະເປັນແຕ່ລະໄລຍະ ຈົນເຮັດໃຫ້ປະເທດລາວໄດ້ສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວຂຶ້ນໃນວັນທີ 2 ທັນວາ 1975 ຊຶ່ງໄດ້ເປັນເງື່ອນໄຂອັນສະດວກໃນການພັດທະນາການສຶກສາຂອງລາວ, ການພັດທະນາຖັນແຖວຄູ – ອາຈານໄດ້ເພີ່ມຂຶ້ນ ແລະ ຄູ – ອາຈານ ຈຳນວນເຫຼົ່ານັ້ນ ລ້ວນແຕ່ມີນ້ຳໃຈຮັກຫອມປະເທດຊາດ, ມີຄວາມຮູ້, ຄວາມສາມາດ, ຊື່ສຽງຂອງຄູໄດ້ຕິດພັນກັບຂະບວນວິວັດ ແຫ່ງການພັດທະນາປະເທດຊາດແຕ່ລະສະໄໝ, ຈົນເຖີງປະຈຸບັນນີ້ ປະເທດຊາດຂອງພວກເຮົາ ໄດ້ມີນັກວິຊາການ, ນາຍທະຫານ, ນາຍຕຳຫຼວດ, ນັກການເມືອງ ແລະ ນັກທຸລະກິດຈຳນວນບໍ່ໜ້ອຍ ລ້ວນແຕ່ມີຄວາມຮູ້ຈາກຄູສອນ, ປະເທດຊາດມີການພັດທະນາເທົ່າໃດ ກໍ່ຍິ່ງເຮັດໃຫ້ສັງຄົມມີຄວາມສຳນຶກ ເຖິງບຸນຄຸນອັນລ້ຳເລີດຂອງຄູ – ອາຈານຫຼາຍຂຶ້ນເທົ່ານັ້ນ, ເພື່ອສະແດງເຖິງຄວາມຮູ້ບຸນຄຸນຕໍ່ຄູ – ອາຈານໃນທົ່ວສັງຄົມ ລັດຖະບານຈຶ່ງໄດ້ກຳນົດເອົາວັນທີ 7 ເດືອນ ຕຸລາ ຂອງທຸກໆປີ ເປັນວັນຄູແຫ່ງຊາດລາວ.

ເພື່ອເປັນການຕອບແທນ ຮູ້ບຸນແທນຄຸນ ຂອງຄູອາຈານ ຕອນທ້າຍຂອງພິທີ ນັກສຶກສາທິດສະດີການເມືອງ ກໍ່ໄດ້ມອບກະຕ່າຂອງຂວັນແກ່ໃຫ້ຄູ – ອາຈານ ທີ່ໄດ້ສຸມທຸກສະຕິປັນຍາ ຖ່າຍທອດຄວາມຮູ້ ໃຫ້ແກ່ນັກຮຽນ – ນັກສຶກສາ ໃນໄລຍະຜ່ານມາ.

• Facebook
• Twitter
• Line