ອູ່ລົດນິເວຍ ບຸ່ງກວາງ ປາກກະດິງ ຈັບມືກັບ ພະແນກ ຖວທ ຄວ້າອັນດັບ 1 ກິລາເປຕັງ

ເພື່ອເປັນການສ້າງຂະບວນການ ຂ່ຳນັບຮັບຕ້ອນວັນຄູແຫ່ງຊາດ ຄົບຮອບ 28 ປີ ( 7 ຕຸລາ 1994 – 7 ຕຸລາ 2022 ) ໃຫ້ເປັນຂະບວນຟົດຟື້ນ ແລະ ມີຄວາມໝາຍຄວາມສຳຄັນ, ໃນລະຫວ່າງວັນທີ 29 – 30 ກັນຍາ 2022 ພະແນກສຶກສາທິການ ແລະ ກິລາ ຮ່ວມກັບສະຫະພັນເປຕັງແຂວງ ໄດ້ຈັດການແຂ່ງແຂ່ງກິລາເປຕັ້ງຂຶ້ນ ຢູ່ເດີ່ນເປຕັ້ງແຂວງບໍລິຄຳໄຊ, ໃຫ້ກຽດເຂົ້າຮ່ວມໂດຍ ທ່ານ ຄຳເພັດ ໄຊປັນຍາ ຮອງຫົວໜ້າພະແນກສຶກສາທິການ ແລະ ກິລາແຂວງ, ປະທານສະຫະພັນກິລາເປຕັງ, ບັນດາພະແນການ ຕະຫຼອດຮອດບັນນັກທຸລະກິດພາຍໃນແຂວງ ເຂົ້າຮ່ວມແຂ່ງຂັນ.

ການແຂ່ງຂັນ ໄດ້ດຳເນີນມາເປັນເວລາ 2 ວັນ ຈຶ່ງສຳເລັດການແຂ່ງຂັນ ເຊິ່ງມີທັງໝົດ 69 ທີມ ໃນນັ້ນ ທີມຊາຍ 45 ທີມ ແລະ ທີມຍິງ 24 ທີມ, ການແຂ່ງຂັນດໍາເດີນໄປດ້ວຍບັນຍາກາດຟົດຟື້ນມ່ວນຊື່ນ ເຕັມໄປດ້ວຍຄວາມສາມັກຄີຮັກແພງເຊີ່ງກັນ ແລະ ກັນ.

ຈາກຜົນການແຂ່ງຂັນ ທີມທີ່ສາມາດຍາດໄດ້ອັນດັບທີ 1 ປະເພດທີມຊາຍ ໄດ້ແກ່ ອູ່ລົດນິເວຍ ບຸ່ງກວາງ ປາກກະດິງ, ອັນດັບ 2 ກອງບັນຊາການ ປກສ ແຂວງ, ອັນດັບ 3 ຮ່ວມ ໄດ້ແກ່ທີມ ສະໂມສອນເປຕັງແຂວງ ແລະ ພະແນກກະສິກຳ ແລະ ປ່າໄມ້ແຂວງ.

ປະເພດທີມຍິງ ອັນດັບທີ 1 ໄດ້ແກ່ທີມ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ອັນດັບ 2 ພະແນກຍຸຕິທຳແຂວງ, ອັນດັບ 3 ໄດ້ແກ່ທີມ ກອງບັນຊາການ ປກສ ແຂວງ ແລະ ລັດວິສາຫະກິດໄຟຟ້າ ສາຂາແຂວງບໍລິຄຳໄຊ.

ສຳລັບປະເພດລາງວັນ ອັນດັບ 1 ໄດ້ຮັບຂັນ 1 ໜ່ວຍພ້ອມເງິນສົດ 6 ແສນກີບ, ອັນດັບ 2 ໄດ້ຮັບເງິນສົດ 5 ແສນກີບ ແລະ ອັນດັບ 3 ຮ່ວມ ໄດ້ຮັບເງິນສົດ 4 ແສນກີບ, ເປັນກຽດມອບລາງວັນໂດຍ ທ່ານ ຄຳເພັດ ໄຊປັນຍາ ຮອງຫົວໜ້າພະແນກສຶກສາທິການ ແລະ ກິລາແຂວງ, ທ່ານ ທະນູສອນ ນວນຜາລີ ປະທານສະຫະພັນກິລາເປຕັງແຂວງ ແລະ ທ່ານ ສີທາ ແກ້ວດາລາວົງ ຮອງຫົວໜ້າພະແນກສຶກສາທິການ ແລະ ກິລາແຂວງ ໃຫ້ກຽດມອບຕາມລຳດັບ.

• Facebook
• Twitter
• Line